Titus 3

Chinese TTVH 2021 (現代台語譯本漢字版)

← Chapter 2 Jump to:

1著提醒大家服從執政者及當權者，通準備好勢做逐項好事。

2著勸𪜶毋通誹謗別人，毋通冤家；著和氣友善，用溫和的態度對待所有的人。

3因為咱家己以前嘛是無智識，背逆，行迷路，作種種情慾及享樂的奴隸，佇惡毒及怨妒中啲度日，互相怨恨，彼此厭惡。

4毋拘咱的救主上帝慈悲仁愛顯明的時，

5伊有拯救咱；毋是因為咱家己有好行為，是因為伊有憐憫，通過互人重新出世的洗禮及聖神的更新拯救咱；

6通過咱的救主耶穌基督上帝有將聖神豐豐富富給咱灌沃，

7互咱通靠伊的恩典稱做義，承受所向望永遠的活命。

8此句話通相信。我愛你特別強調諸個事，通互信上帝的人全心做好事；諸個事攏真好，閣對人有利益。

9著閃避愚戇的爭論、族譜、紛爭，及律法的爭執，因為諸個攏無路用，無價值。

10製造紛爭的人，給伊警告一兩遍以後就毋通閣及伊來往。

11你知，此款人已經敗壞；伊繼續犯罪是啲給家己定罪。

12我差亞提馬抑是推基古去你遐的時，著趕緊來尼哥坡里尋我，因為我已經決定欲佇遐過冬天。

13著盡所會幫贊西納律師及亞波羅旅程的需要，互𪜶通安心出發。

14著吩咐咱家己的人學習做好事來供給實際的需要，才免做無路用的人。

15所有及我佇遮的人欲給你請安。請替阮給許個同信的好朋友請安。願上帝的恩典及恁大家同在！

← Chapter 2 Jump to: