Zechariah 12

Chinese TTVH 2021 (現代台語譯本漢字版)

← Chapter 11 Jump to: Chapter 13 →

1這是上主有關以色列的啟示。給天搋開，建立大地的根基，創造人性命的上主按呢講：

2「我欲互耶路撒冷成做一杯酒，互四圍諸個國家飲甲醉醉醉；耶路撒冷受圍困的時，猶大全地嘛會受攻擊。

3諸個國家聚集來攻擊的時，我欲互耶路撒冷成做重的石頭，互欲夯伊的人攏受重傷。」

4上主講：「佇彼日，我欲拍所有的馬，互𪜶著驚，互騎馬的掠狂；我欲搋開目睭看顧猶大家，拍列國的馬，互𪜶無看見。

5猶大的族長心內按呢講：『耶路撒冷的住民是阮的氣力，因為𪜶倚靠上主 — 萬軍的統帥、𪜶的上帝。』

6「佇彼日，我欲互猶大的族長親像柴堆中的火種，親像麥稿頂的火把；𪜶會燒對倒旁正旁，將四圍的列國燒滅。耶路撒冷會佇原來的所在堅固徛在。

7「上主欲代先拯救猶大的布棚，才免大闢王朝的榮光及耶路撒冷住民的榮光贏過猶大。

8佇彼日，上主欲保護耶路撒冷的住民。按呢，𪜶中間上軟汫的會親像大闢赫呢勇猛；大闢王朝會親像上帝，親像上主的使者佇頭前引導𪜶。

9彼日，來攻擊耶路撒冷的列國，我一定欲給𪜶剿滅。」

10「我欲將憐憫及祈求的神摒落互大闢的後代及耶路撒冷的住民；𪜶欲仰望我，就是𪜶鑿死彼位；閣欲為著伊哀哭，親像人為著孤子哀哭；閣為著伊憂苦，親像人為著失落大子憂苦。

11佇彼日，耶路撒冷有大哀哭，親像佇米吉多平原的哈達‧臨門的哀哭。

12全國每一家攏會哀哭：大闢家、拿單家、利未家、示每家，及其他所有的家族，攏各做一堆，男女分開哀哭。」

← Chapter 11 Jump to: Chapter 13 →