Ecclesiastes 1

Chinese TTVR (現代台語譯本羅馬字版)

Jump to: Chapter 2 →

1Tī Iâ-lō͘-sat-léng choh-ông, Tāi-pi̍t ê kiáⁿ, Thoân-tō-chiá ê ōe.

2Góa — Thoân-tō-chiá kóng: Khang-hu ê khang-hu; khang-hu ê khang-hu; it-chhè lóng sī khang-hu.

3Lâng it-chhè ê lô-khó͘ phah-piàⁿ, chiū-sī tī ji̍t-kng ē-bīn ê lô-lo̍k ū sím-mi̍h lī-ek?

4Chi̍t-tāi kè-liáu koh chi̍t-tāi, m̄-kú tōe chiàu-siông chûn-chāi.

5Ji̍t chhut, ji̍t lo̍h, kín-kín tò-tńg-khì chhut--lâi ê só͘-chāi.

6Hong ǹg lâm chhe, koh tò-tńg ǹg pak, bô-thêng tńg-se̍h, koh se̍h tńg-khì goân-lâi ê só͘-chāi.

7Kang-hô lóng lâu-ji̍p hái, m̄-kú hái mā bōe móa; kang-hô lâu kàu tó-ūi, koh lâu tńg-khì goân-lâi ê só͘-chāi.

8Chiah-ê tāi-chì hō͘ lâng siān koh ùi; kóng mā kóng bōe liáu, khòaⁿ mā khòaⁿ bōe pá, thiaⁿ mā thiaⁿ bōe oân.

9Í-chêng í-keng ū--ê, chiong-lâi ōe koh ū; í-chêng í-keng chòe--ê, chiong-lâi ōe koh chòe; ji̍t-kng ê ē-bīn bô sin ê tāi-chì.

10Kiám ū sím-mi̍h sū, lâng ōe-tàng kóng “Lí khòaⁿ, che sī sin--ê”? Tī lán í-chêng ê sè-tāi, chá chiū ū lah.

11Í-keng kè--khì ê sè-tāi, bô lâng ōe-kì--tit; chiong-lâi ê sè-tāi, āu-lâi ê lâng mā bōe-kì--tit.

12Góa — Thoân-tō-chiá bat tī Iâ-lō͘-sat-léng chòe Í-sek-lia̍t -ông.

13Góa choan-sim ēng tì-hūi gián-kiù chhâ-khó thiⁿ-ē só͘ hoat-seng it-chhè ê tāi-chì, chiū chai che sī Siōng-tè só͘ hō͘ lâng bô ì-gī ê lô-khó͘.

14Góa koan-chhat ji̍t-kng ê ē-bīn só͘ hoat-seng it-chhè ê tāi-chì, khòaⁿ-chhut it-chhè lóng sī khang-hu, lóng sī lia̍h-hong.

15Oan-khiau--ê bōe-tàng hō͘ i ti̍t; khiàm-kheh--ê pó͘ bōe móa.

16Góa siūⁿ-kóng, góa ū tōa tì-hūi, pí chêng-kàu-taⁿ só͘-ū tī-lí Iâ-lō͘-sat-léng ê lâng khah ū tì-hūi; góa mā ū khip-siu chin chōe tì-hūi kap kiàn-sek.

17Góa choan-sim tì-ì bêng-pe̍k tì-hūi, ài bêng-pe̍k tian-kông kap gû-gōng, chiū chai che mā-sī lia̍h-hong.

18In-ūi lâng jú ū tì-hūi jú ū hoân-ló, jú ū tì-sek jú ū iu-siong.

Jump to: Chapter 2 →