Ecclesiastes 7

Chinese TTVR (現代台語譯本羅馬字版)

← Chapter 6 Jump to: Chapter 8 →

1Hó miâ-siaⁿ iâⁿ-kè hó ê phang-iû; lâng sí ê ji̍t pí chhut-sì ê ji̍t khah hó.

2Khì song-sū ê ke pí khì iàn-lo̍k ê ke khah hó, in-ūi sí sī chèng-lâng ê kiat-kio̍k; oa̍h-lâng mā tio̍h chiong chit-ê tāi-chì khǹg tī sim-lāi.

3Iu-būn pí chhiò khah hó; in-ūi bīn-tài-iu-iông tùi sim ū hó-chhù.

4Tì-hūi ê lâng ê sim tī song-sū ê ke; gû-gōng ê lâng ê sim tī khoài-lo̍k ê ke.

5Thiaⁿ tì-hūi-lâng ê chek-pī, pí thiaⁿ gû-gōng ê lâng ê chheng-chàn khah hó.

6Gōng-lâng ê chhiò chhin-chhiūⁿ tiáⁿ-ē sio chhì-á teh to̍h ê siaⁿ; che mā-sī khang-hu.

7Khióng-hat chhú-châi ōe hō͘ tì-hūi ê lâng pìⁿ-chòe gōng; hóe-lō͘ ōe hō͘ lâng ê sim hú-pāi.

8Tāi-chì ê kiat-kio̍k pí tāi-chì ê khai-sí khah hó; thun-lún pí kiau-ngō͘ khah hó.

9M̄-thang sûi-piān siū-khì, in-ūi siū-khì sī gû-gōng.

10M̄-thang kóng: Sī-án-chóaⁿ í-chêng pí hiān-chāi khah hó? Án-ni mn̄g sī bô tì-hūi.

11Tì-hūi kap ke-gia̍p lóng sī hó; tùi oa̍h tī ji̍t-kng ē-bīn ê lâng lóng ū lī-ek.

12In-ūi tì-hūi ōe tì-ìm lâng, chîⁿ-gûn mā ōe tì-ìm lâng; m̄-kú chí-ū tì-hūi ōe pó-choân ū tì-hūi ê lâng ê sìⁿ-miā. Che chiū-sī ū tì-sek ê hó-chhù.

13Lí tio̍h siūⁿ Siōng-tè ê chok-ûi; Siōng-tè hō͘ i oan--ê, siáⁿ-lâng ōe-tàng hō͘ i ti̍t?

14Sūn-kéng ê sî tio̍h hoaⁿ-hí, hoān-lān ê sî tio̍h siūⁿ: Chit nn̄g hāng lóng sī Siōng-tè ê chok-ûi, sī beh hō͘ lâng chhâ bōe chhut chiong-lâi ōe hoat-seng sím-mi̍h tāi-chì.

15Tī khang-hu ê jîn-seng góa ū khòaⁿ--tio̍h: Ū gī-lâng chòe hó tian-tò bia̍t-bông, ū pháiⁿ-lâng chòe pháiⁿ tian-tò chia̍h tn̂g-hè-siū.

16M̄-thang kè-thâu chòe hó, m̄-thang kè-thâu chhong-bêng; ná tio̍h húi-bia̍t ka-kī?

17M̄-thang kè-thâu chòe pháiⁿ, mā m̄-thang chòe gōng-lâng; ná tio̍h sî bē kàu chiū sí?

18Lí lia̍h-tiâu chit-thâu, hit-thâu mā m̄-thang pàng--khì; kèng-ùi Siōng-tè ê lâng ōe-hiáu siang-thâu kiam-kò͘.

19Tì-hūi ōe hō͘ tì-hūi ê lâng ū lêng-le̍k iâⁿ-kè siâⁿ-lāi cha̍p ê chiáng-koân-chiá.

20Sè-kan bô chi̍t ê chí-ū hêng-siān bô hoān-chōe ê gī-lâng.

21Pa̍t-lâng kóng ê ōe m̄-thang lóng khǹg tī sim-lāi; lí khó-lêng ōe thiaⁿ-tio̍h lí ê po̍k-jîn kā lí chiù-mē,

22in-ūi lí ka-kī chai, lí mā bat chin chōe piàn chiù-mē pa̍t-lâng.

23Chiah-ê tāi-chì, góa bat ēng tì-hūi chhì-giām; góa kóng: Góa beh chòe ū tì-hūi ê lâng; m̄-kú tì-hūi lī-khui góa chin hn̄g.

24Tì-hūi hn̄g koh chhim, kiám ū lâng chhē ōe tio̍h?

25Góa it-sim-it-ì ài chai, ài chhâ-khó, ài chhē-kiû tì-hūi kap bān-iú chûn-chāi ê lí-iû, thang chai siâ-ok sī gû-gōng, gû-chhún sī tian-kông.

26Góa koh hoat-kiàn, pháiⁿ ê cha-bó͘-lâng pí sí khah khióng-pò͘; i sī oa̍h-tauh, i ê sim sī lô-bāng, chhiú sī só-liān. Siōng-tè ì-ài ê lâng lóng ōe-tàng siám-pī, m̄-kú siâ-ok ê lâng ōe hō͘ i lia̍h--tio̍h.

27Thoân-tō-chiá kóng: Khòaⁿ leh, góa ài chai bān-iú chûn-chāi ê lí-iû, chi̍t-hāng chi̍t-hāng kā i pí-kàu, chiū chhē-tio̍h chit-ê —

28góa it-ti̍t teh chhē, iáu chhē bōe tio̍h — tī chi̍t-chheng lâng ê tiong-kan góa chhē ōe tio̍h chi̍t ê ta-po͘-lâng sī chèng-ti̍t, m̄-kú liân chi̍t ê chèng-ti̍t ê cha-bó͘-lâng to chhē bōe tio̍h.

29Khòaⁿ leh, góa chí-ū chhē tio̍h chit-ê, chiū-sī Siōng-tè chhòng-chō ê lâng pún-lâi sī chèng-ti̍t, chóng-sī in siūⁿ-chhut chin chōe khúi-kè.

← Chapter 6 Jump to: Chapter 8 →