Joel 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Lín tio̍h tī Sek-an pûn sàu-kak, tī góa ê sèng-soaⁿ hoat kéng-pò; kok-lāi ê chū-bîn lóng ōe ngia̍uh-ngia̍uh-chhoah, in-ūi Siōng Chú ê ji̍t teh-beh kàu, í-keng kūn lah.

2Hit-ji̍t o͘-thiⁿ-àm-tōe; hit-ji̍t o͘-hûn-bi̍t-pò͘; ū chi̍t tūi tōa koh kiông ê chháu-meh pek-óa, chhin-chhiūⁿ o͘-àm tà-móa soaⁿ-niá. Chit-khoán chêng-kéng kàu taⁿ m̄-bat ū, í-āu tāi-tāi mā bōe koh ū.

3In thâu-chêng ū lia̍t-hé teh thun-bia̍t, āu-bīn ū hé-iām teh to̍h. In iáu-bē kàu, tōe chhin-chhiūⁿ I-tiân-hn̂g; in kè-liáu, tōe chiâⁿ-chòe pha-hng ê khòng-iá, bô-pòaⁿ-hāng ōe-tàng tô-siám.

4In ê hêng-chōng chhin-chhiūⁿ bé, phun-cháu chhin-chhiūⁿ chiàn-bé.

5In tī chèng-soaⁿ téng-bīn teh thiàu, siaⁿ chhin-chhiūⁿ chiàn-chhia lōng-lōng-hiáng, chhin-chhiūⁿ hé-iām sio ta-chháu pi̍t-pia̍k-kiò; in chhin-chhiūⁿ kiông-béng ê kun-tūi pâi-tīn beh chhut-chiàn.

6Só͘-ū khòaⁿ-tio̍h in ê lâng lóng phòa-táⁿ, bīn chhiⁿ-sún-sún.

7In chhin-chhiūⁿ ióng-sū phun-cháu, chhin-chhiūⁿ chiàn-sū peh-chiūⁿ siâⁿ-chhiûⁿ; in ōe-hiáu chiàu ka-kī ê lō͘-sòaⁿ chìn-kong, bōe phah-loān tūi-ngó͘.

8In bōe khoeh-lâi-khoeh-khì, ta̍k-ê chiàu lō͘-sòaⁿ chìn-kong; in chhiong-kè hông-ōe-sòaⁿ, iáu pó-chhî tūi-hêng.

9In chhiong-ji̍p siâⁿ, tī siâⁿ-chhiûⁿ téng chông-lâi-chông-khì, peh-chiūⁿ chhù-téng; chhin-chhiūⁿ chha̍t tùi thang-á ji̍p-khì chhù-lāi.

10In chi̍t-ē chhut-hiān, tōe tín-tāng, thiⁿ iô-choah, ji̍t-goa̍t-bû-kong, chhiⁿ-sîn àm-tām.

11Siōng Chú tī I ê kun-tūi thâu-chêng hoat hō-lēng, I ê kun-peng sǹg bōe liáu; chip-hêng I bēng-lēng--ê chin kiông-béng. Siōng Chú ê ji̍t tōa koh thang kiaⁿ, siáⁿ-lâng jím-siū ōe tiâu?

12Siōng Chú kóng: Hiān-chāi iáu-bē bān, lín tio̍h ēng kìm-chia̍h, thî-khàu, ai-siong, oa̍t tò-tńg choân-sim kui-ǹg góa.

13Tio̍h thiah-li̍h lín ê sim, m̄-sī thiah-li̍h lín ê saⁿ; tio̍h kui-ǹg Siōng Chú — lín ê Siōng-tè, in-ūi I ū un-hūi lîn-bín, bōe khoài siū-khì, ū hong-sēng ê chû-ài, ōe kái-piàn sim-ì, bōe kàng chai-hō.

14Bô-tiāⁿ-tio̍h Siōng Chú — lín ê Siōng-tè ōe kái-piàn sim-ì, lâu hok-khì hō͘ lín, án-ni lín chiū thang hiàn sò͘-chè kap tiān-chiú-chè hō͘ I.

15Lín tio̍h tī Sek-an pûn sàu-kak, siat chi̍t ê sèng-ji̍t lâi kìm-chia̍h, tiàu-chi̍p giâm-siok-hōe,

16chū-chi̍p bîn-chiòng, sèng-hòa hōe-chiòng; chio-chi̍p sī-tōa, chū-chi̍p gín-á kap chia̍h-lin ê eⁿ-á; sin-lông tio̍h lī-khui i ê chhù, sin-niû lī-khui i ê pâng.

17Ho̍k-sāi Siōng Chú ê chè-si tio̍h tī cháu-lông kap chè-tôaⁿ ê tiong-kan thî-khàu. In tio̍h kóng, “Siōng Chú, kiû lí khoan-sià lí ê chú-bîn; m̄-thang hō͘ lí ê chú-bîn siū lêng-jio̍k, siū lia̍t-kok thí-chhiò. Ná tio̍h hō͘ bān-bîn kóng ‘In ê Siōng-tè tī tó-ūi’?”

18Hit-sî Siōng Chú ōe chhim-chhim thiàⁿ-sioh I ê thó͘-tōe, koh lîn-bín I ê chú-bîn.

19Siōng Chú ìn I ê chú-bîn, kóng, “Góa beh sù lín ngó͘-kok, sin-chiú, kap sin-iû, hō͘ lín sim-móa-ì-chiok; góa bōe koh hō͘ lín siū lia̍t-kok lêng-jio̍k.

20Góa beh hō͘ pak-hng lâi ê kun-tūi lī-khui lín hn̄g-hn̄g, kā in kóaⁿ-khì khòng-hān pha-hng ê tōe: Chêng-tūi kóaⁿ-ji̍p tang-pêng ê Sí-hái, āu-tūi kóaⁿ-ji̍p sai-pêng ê Tōe-tiong-hái; in si-thé ê pháiⁿ-bī chhèng-koân, chhàu-bī chhiong-thian. Khak-si̍t, Siōng Chú ū oân-sêng chiah-ê tōa tāi-chì!”

21Thó͘-tōe ah, m̄-bián kiaⁿ, tio̍h hoaⁿ-hí khoài-lo̍k. Siōng Chú khak-si̍t ū chòe tōa tāi-chì!

22Chhân-iá ê cháu-siù ah, m̄-bián kiaⁿ, in-ūi khòng-iá ê chháu-po͘ pìⁿ chhiⁿ-chhùi, chhiū-ba̍k kiat ké-chí; bû-hoa-kó-chhiū, phû-tô-chhiū lóng kiat chin chōe ké-chí.

23Sek-an ê chú-bîn ah, lín tio̍h hoaⁿ-hí, tio̍h in-ūi Siōng Chú — lín ê Siōng-tè khoài-lo̍k. I chiàu-sî lo̍h chhiu-thiⁿ ê hō͘ hō͘ lín; kap í-chêng kâng-khoán, koh kā lín lo̍h chhun-lîm chhiu-ú.

24Ngó͘-kok-tiûⁿ ū móa-móa ê ngó͘-kok, chiú-khut ū sin-chiú, iû-khut ū sin-iû móa--chhut-lâi.

25Góa phài-lâi lín chia chi̍t-kûn koh chi̍t-kûn ê chháu-meh tāi-kun, chháu-meh, chháu-meh-á-kiáⁿ, chháu-meh-kong, kap tōa-chiah chháu-meh, kúi-nā nî kā lín chia̍h--khì ê lông-chok-bu̍t, góa lóng beh pó͘-sióng lín.

26Lín ū chin chōe thang chia̍h, chia̍h kàu pá, koh ōe chheng-chàn Siōng Chú — lín ê Siōng-tè ê miâ; in-ūi I ūi-tio̍h lín chòe kî-biāu ê sū. Góa ê chú-bîn éng-oán bōe koh sit-pāi kiàn-siàu.

27Lín chiū ōe chai góa tī Í-sek-lia̍t -lâng tiong-kan, koh chai chí-ū góa sī Siōng Chú — lín ê Siōng-tè, í-gōa bô pa̍t-ê; góa ê chú-bîn éng-oán bōe koh sit-pāi kiàn-siàu.

28Í-āu, góa beh chiong góa ê sîn piàⁿ lo̍h-khì hō͘ só͘-ū ê lâng; lín ê kiáⁿ, cha-bó͘-kiáⁿ ōe kóng ū-giân, lín ê lāu-lâng ōe choh-bāng, siàu-liân-lâng ōe khòaⁿ-kìⁿ īⁿ-siōng.

29Tī hiah-ê ji̍t, góa sīm-chì beh chiong góa ê sîn piàⁿ lo̍h-khì hō͘ po̍k-jîn kap lú-pī.

30Góa beh tī thiⁿ-téng hián-chhut kî-sū, tī tōe-chiūⁿ ū huih, ū hé, kap hé-hun ê thiāu.

31Tī Siōng Chú tōa koh thang-kiaⁿ ê ji̍t lâi-lîm í-chêng, ji̍t-thâu ōe pìⁿ-chòe o͘-àm, ge̍h pìⁿ-chòe chhin-chhiūⁿ huih hiah-ni̍h âng.

32Hit-sî, kiû-kiò Siōng Chú ê miâ ê lâng lóng ōe tit-tio̍h kiù. Chiàu Siōng Chú ê èng-ún, tī Sek-an-soaⁿ kap tī Iâ-lō͘-sat-léng ū tô-thoat ê lâng; tī chiah-ê chhun--lo̍h-lâi ê chú-bîn tiong-kan ū Siōng Chú soán-tiàu ê lâng.

← Chapter 1 Jump to: Chapter 3 →