Joel 3

Chinese TTVR (現代台語譯本羅馬字版)

← Chapter 2 Jump to:

1Lín khòaⁿ, tī hiah-ê ji̍t, sî chi̍t-ē kàu, góa beh hôe-ho̍k Iû-tāi kap Iâ-lō͘-sat-léng ê hoân-êng,

2góa beh chū-chi̍p bān-kok, chhōa in lo̍h-khì Iok-sa-hoat Soaⁿ-kok, tī hia kā in sím-phòaⁿ, in-ūi in chiong góa ê chú-bîn, chiū-sī góa ê sán-gia̍p Í-sek-lia̍t, hun-sòaⁿ khì lia̍t-kok, koh pun góa ê thó͘-tōe.

3In thiu-chhiam pun góa ê chú-bîn, ēng ta-po͘ gín-á ōaⁿ ki-lú, bōe cha-bó͘ gín-á bóe chiú lim.

4Thài-ní, Se-tùn, Hui-lī-sū só͘-ū tōe-khu ê lâng ah, lín beh kā góa án-chóaⁿ? Beh kā góa pò-ho̍k sī--bô? Lín nā kā góa pò-ho̍k, góa chiū beh sûi-sî kā lín pò-èng.

5Lín chhiúⁿ góa ê kim-gûn, toa̍t góa kùi-tiōng ê châi-pó, kng ji̍p-khì lín ê sîn-biō,

6koh kā Iû-tāi kap Iâ-lō͘-sat-léng ê lâng bōe hō͘ Hi-la̍h -lâng, hō͘ in oán-lī hiong-thó͘.

7Góa beh chhui-pek in tùi lín kā in bōe--khì ê só͘-chāi tò-tńg--lâi. Góa beh chiàu lín ê só͘-chòe kā lín pò-èng.

8Góa beh chiong lín ê kiáⁿ cha-bó͘-kiáⁿ bōe hō͘ Iû-tāi -lâng; Iû-tāi -lâng ōe kā in choán-bōe hō͘ hn̄g-hn̄g ê Sī-pa -lâng. Siōng Chú án-ni soan-pò͘.

9Tio̍h tùi bān-kok soan-pò͘: Chún-pī khai-chiàn! Hoàn-khí ióng-sū ê tò͘-chì, tiàu-chi̍p choân-thé chiàn-sū chham-chiàn.

10Tio̍h chiong lín ê lôe-thâu phah-chòe to-kiàm, chiong lín ê liâm-to phah-chòe chhiuⁿ. Loán-jio̍k--ê tio̍h kóng, “Góa chin ióng!”

11Sì-ûi ê lia̍t-kok ah, kóaⁿ-kín chi̍p-ha̍p. Siōng Chú ah, phài lí ê ióng-sū lo̍h--lâi.

12Tio̍h hoàn-khí bān-kok ê lâng lóng chiūⁿ-lâi Iok-sa-hoat Soaⁿ-kok; tī hia góa beh chē-teh sím-phòaⁿ sì-ûi ê lia̍t-kok.

13Tio̍h gia̍h liâm-le̍k-á koah, siu-koah ê sî kàu lah. Lâi, ta̍h--lo̍h-khì, in-ūi chiú-khut móa lah, chiú-tî ek--chhut-lâi lah, in ê chōe-ok koàn-boán.

14Ū chheng-chheng-bān-bān ê lâng tī soan-phòaⁿ ê soaⁿ-kok, in-ūi Siōng Chú ê ji̍t beh lîm-kàu sím-phòaⁿ-kok.

15Ji̍t-goa̍t-bû-kong, chhiⁿ-sîn àm-tām.

16Siōng Chú tī Sek-an hoat-chhut chhin-chhiūⁿ sai teh háu ê siaⁿ, tī Iâ-lō͘-sat-léng hoat-chhut chhin-chhiūⁿ lûi teh tân ê siaⁿ, thiⁿ tōe chiū tōa tín-tāng; m̄-kú Siōng Chú beh chòe I chú-bîn ê pī-lān-só͘, chòe Í-sek-lia̍t -lâng ê pó-lúi.

17Hit-sî, lín chiū ōe chai góa sī Siōng Chú — lín ê Siōng-tè, khiā-khí tī Sek-an góa ê sèng-soaⁿ. Iâ-lō͘-sat-léng ōe chiâⁿ-chòe Sèng-siâⁿ, bōe koh hō͘ gōa-cho̍k-lâng chhim-hoān.

18Tī hit-ji̍t, tōa-soaⁿ ōe tih sin-chiú, sió-soaⁿ ōe lâu lin, Iû-tāi ê khoe lóng ū chúi teh lâu; ū chúi-chôaⁿ ōe tùi Siōng Chú ê tiān lâu--chhut-lâi, lūn-te̍k Si̍p-têng -kok.

19Ai-ki̍p ōe pha-hng, Í-tong ōe pìⁿ-chòe hong-hòe ê khòng-iá, in-ūi in ge̍k-thāi Iû-tāi -lâng, tī in ê tōe lâu bû-ko͘ ê lâng ê huih.

20Chóng-sī Iû-tāi ōe éng-oán ū lâng khiā-khí, Iâ-lō͘-sat-léng ōe chûn-sio̍k kàu bān-tāi.

21Chá-chêng góa m̄-bat sóe-chheng in thâi-lâng lâu-huih ê chōe, hiān-chāi beh kā in sóe-chheng. Siōng Chú éng-oán tī Sek-an khiā-khí!

← Chapter 2 Jump to: