Ruth 4

Chinese TTVR (現代台語譯本羅馬字版)

← Chapter 3 Jump to:

1Pho-a-su lâi siâⁿ-mn̂g-kháu, chē--lo̍h-khì; i só͘ kóng hit-ê chì-chhin tú-tú keng-kè. I chiū kóng, “Hiaⁿ-tī ah, chhiáⁿ kè-lâi chia chē.” Hit-ê lâng chiū oa̍t tńg-lâi chē.

2Pho-a-su koh chhiáⁿ siâⁿ-lāi cha̍p ê tiúⁿ-ló lâi, kā in kóng, “Chhiáⁿ chia chē.” In chiū chē--teh.

3Pho-a-su chiū tùi chit-ê chì-chhin kóng, “Tùi Mô͘-ap -tōe tńg--lâi ê Ná-o-bí beh bōe lán ê hiaⁿ-tī Í-lī-bí-le̍k hit-tè tōe.

4Góa siūⁿ góa tio̍h kā lí kóng, lí tio̍h tī chē tī chia ê lâng kap bîn-kan ê tiúⁿ-ló bīn-chêng bóe--tńg-lâi. Lí nā beh chīn gī-bū kā i bóe--tńg-lâi, chiū hō͘ lí bóe; nā m̄, tio̍h kā góa kóng, hō͘ góa chai. In-ūi bô lâng pí lí koh-khah ū koân thang bóe--tńg-lâi, koh-lâi chiah lûn-tio̍h góa.” Hit-ê lâng chiū kóng, “Góa beh chīn gī-bū kā bóe--tńg-lâi.”

5Pho-a-su kóng, “Lí tùi Ná-o-bí ê chhiú bóe tōe ê sî, mā tio̍h chhōa sí--khì ê lâng ê bó͘ Mô͘-ap lú-chú Lō͘-tek chòe bó͘, thang thòe chit-ê sí--khì ê lâng ê ka-cho̍k pó-liû chit-tè thó͘-tōe.”

6Chit-ê chì-chhin chiū kóng, “Nā án-ni góa m̄ bóe, chiah bián óng-hùi góa ka-kī ê sán-gia̍p. Niū lí bóe, hō͘ lí chīn gī-bū, góa bô beh bóe.”

7Chiàu Í-sek-lia̍t kó͘-chá ê hong-sio̍k, lâng beh khak-tēng sio̍k-hôe á-sī kau-ōaⁿ sán-gia̍p ê chhiú-sio̍k, tio̍h thǹg ôe kau hō͘ tùi-hong. Í-sek-lia̍t -lâng ēng án-ni chòe ha̍p-iok ê chèng-kù.

8Hit-ê chì-chhin chiū kā Pho-a-su kóng, “Hō͘ lí bóe.” I chiū thǹg ôe hō͘ Pho-a-su.

9Jiân-āu, Pho-a-su tùi chèng tiúⁿ-ló kap só͘-ū ê lâng kóng, “Kin-á-ji̍t lín sī chèng-jîn, góa tùi Ná-o-bí ê chhiú bóe it-chhè sio̍k Í-lī-bí-le̍k, Má-lûn, kap Ki-liân ê sán-gia̍p.

10Góa mā beh chhōa Má-lûn ê bó͘ Mô͘-ap lú-chú Lō͘-tek chòe bó͘, thang thòe sí--khì ê lâng pó-liû i ka-cho̍k ê sán-gia̍p, chiah bián i tùi ka-cho̍k kap pún-che̍k siū tû-miâ. Kin-á-ji̍t lín lóng sī chèng-jîn.”

11Só͘-ū tī siâⁿ-mn̂g-kháu ê lâng kap chèng tiúⁿ-ló lóng kóng, “Goán sī chèng-jîn. Goān Siōng Chú hō͘ lí chhōa ji̍p-mn̂g ê bó͘, chhin-chhiūⁿ Lúi-kiat kap Lē-a kiàn-li̍p Ngá-kok ê ke. Goān lí tī Í-hoat-tha chiâⁿ-chòe tōa châi-chú, tī Pek-lī-hêng ū hó miâ-siaⁿ.

12Goān lí ê ke, chiū-sī Siōng Chú thong-kè chit-ê lú-chú siúⁿ-sù lí ê hō͘-tāi, chhin-chhiūⁿ Tha-má kap Iû-tāi só͘ siⁿ Hoat-le̍k-su ê ke siâng-khoán.”

13Pho-a-su chiū chhōa Lō͘-tek chòe bó͘. Pho-a-su kap i tâng-pâng; Siōng Chú hō͘ i hoâi-īn, i chiū siⁿ chi̍t ê kiáⁿ.

14Hū-jîn-lâng lóng lâi kā Ná-o-bí kóng, “Goān Siōng Chú tit-tio̍h chheng-chàn, in-ūi I kin-á-ji̍t hō͘ lí chi̍t ê ōe-tàng kè-sêng lí ê sán-gia̍p koh chiàu-kò͘ lí ê lâng. Goān chit-ê gín-á tī Í-sek-lia̍t ū hó miâ-siaⁿ.

15Goān i hôe-ho̍k lí ê goân-khì, tī lí nî-lāu ê sî kā lí hōng-ióng, in-ūi i sī thiàⁿ lí ê sin-pū siⁿ--ê. Chit-ê sin-pū pí chhit ê kiáⁿ khah hó.”

16Ná-o-bí chiū phō chit-ê gín-á tī heng-chêng, chhiâⁿ i tōa-hàn.

17Chhù-piⁿ ê hū-jîn-lâng kóng, “ Ná-o-bí tit-tio̍h chi̍t ê kiáⁿ lah.” In chiū kā i hō-miâ kiò-chòe Gô-pī-tek; i chiū-sī Iâ-se ê lāu-pē, Iâ-se sī Tāi-pi̍t ê lāu-pē.

18Che sī Hoat-le̍k-su ê hō͘-tāi: Hoat-le̍k-su siⁿ Hi-su-lûn,

19Hi-su-lûn siⁿ Lân, Lân siⁿ A-bí-ná-ta̍t,

20A-bí-ná-ta̍t siⁿ Ná-sūn, Ná-sūn siⁿ Sat-bûn,

21Sat-bûn siⁿ Pho-a-su, Pho-a-su siⁿ Gô-pī-tek,

22Gô-pī-tek siⁿ Iâ-se, Iâ-se siⁿ Tāi-pi̍t.

← Chapter 3 Jump to: