1 Peter 1

Zande

Jump to: Chapter 2 →

1Petero, ga Yesu Kristo mokedi, Fu agu yo du ni siasia yo, nga agu yo du ni gbandakagbandaka yo ku Pondo yo, na Garatia yo, na Kapadokia yo, na Asia yo, a Bitunia yo,

2i du ni siasia yo rogo gu inapaikumbatayo nga ga Mbori nga Ba, ni gu sa boro ni ziazia ni nga ga Toro, tipa gia sangba Yesu Kristo i ki migidi yo ni kureko: Undahe moi pai fu roni na zereda.

3I táasi rimo Mbori, Ba gaani Gbia Yesu Kristo, wa du ko navungu rani berewe ni gako bakere inapai ku rogo ga unga maabangirise mbiko gu zingabekpio nga ga Yesu Kristo,

4ku rogo gu ũkumbo azirã nga ya, agberã nga ya, agbandaka nga a ya, du ni igiigi he fu roni ngbangbaturũ yo.

5Si fu agu roni i nabanda roni ni gu tandu nga ga Mbori, mbiko idapase, tipa gu bata i amangi he ka kusa ha rogo yangara rame.

6Rogo ho oni nangi angi na bakere ngbarago ti roni, ono awere, ka si du wo, oni avura rungo ngbutuko be dungu aasada,

7ya asada gaoni idapase, nga kikipa he susi marã dahabu nago ago, ka i vura asada ha na we, i ki bi he ni tambuatambua ha, ni irisiirisi he, ni taasitaasi he rago kusa yo Yesu Kristo gbayaga.

8Ko oni abi nga ko ya, ono oni ki nikpi nyemu ko. Rogo ko yo, oni avura bi nga ko awere ya, ono wa idi oni pa ko oni nangi angi na bakere ngbarago susi gu ka boro gumba paha, ki hiki na taarimo;

9bambiko oni nadia gu digida he nga ga gaoni idapase, nga batasa mbisimoroni.

10Tipa gi bata re anebi anasana he ti ni ki niwisigi paha nyanyaki, nga agu yo nagumba pa gu undahe nikaye fu roni,

11ki niwisigi pa ragoho na gini ngbatunga rago nga ha, nga gu ga Kristo Toro adu rogo yo yo naagumba pa ha, nigumba pa agu aima nga ga Kristo fu yo mbata, na gu taarimo nikaye fuo ho.

12I ayugu he fu yo, ya i amanga nga agi apai re tipa tiyo te, ono tipa roni; nga agu apai i agumba pa ha awere fu roni ngba agu yo natungusi wene pangbanga fu roni, rogo Ziazia Toro yo, gu ko i akedi ko ngbangbaturũ yo. Agi apai re amaraika akpi nyemu ka wisiga ha.

13Si du ka oni mbakadi gaoni aberã ti ni, ki du na rugatise, ki nimoi bangironi nyanyaki sa gu undahe i ka ye na ni fu roni rago kusa yo Yesu Kristo gbayaga.

14Oni dú wa agude giasangba, ka oni mbákadi nga tironi sa gu kuru nyemuahe nadu ti roni mbata ya, ho oni aruga nga tironi ni na pai ya.

15Ono wa du gu ko nayambu roni du ni ziazia ko oni dú a wo ni ziazia roni rogo gaoni apai dũ,

16mbiko Ziazia Kekeapai naya, “Oni dú ziazia bambiko mi du ziazia.”

17Wa oni nakpara fu gu ko nga Ba, akpara nga dagba aboro ya, ono ko nasapa ngbanga aboro kuti gayo mangaapai, oni súngu rogo gu ba du oni rogo ho ni kina gunde ti ko.

18Oni ini he ya i atumo nga roni ni agu ahe nikagberã, wa feda na dahabu, be gu kungba apai oni agi ngba abaroni te;

19ono I atumo roni ni gu kikipa kure nga ga Kristo, wa gu wiri kandoro zerenge kpotoru azerenga, adu nga wiri he ti ru ya.

20Ko, i aima ina pa ko mbata i nikatona mburu zegino, ono i akusi ko ti gi yangara arame re tipa roni,

21nga aidipa Mbori mbiko ko. Mbori azingisi ko dagba kangba aboro yo ki nifu taarimo fu ko; ya gaoni idapase du rogo Mbori yo na gaoni maabangirise a.

22Wa du wo du he oni azíasi mbisimoroni rogo gia sangba rengo dati wene kpi nyemu awirina, oni kpi nyemu akuaroni akpi kakaka kpotoroni yo.

23I avunga nga roni berewe ni gbegberẽ tunga te, ono ni kina gu tunga nikaagberã nga ya, nga gu pai nga ga Mbori, du na unga, nikanye anye kindi.

24Bambiko, “Borose dunduko du wa kina nvuo, na gaha wene ngbanya dunduko wa kina mbumbuda nvuo. Nvuo nita uga, mbumbudaha ki nigboroka,

25ono gu pai nga ga Gbia, si anye anye kindi.” Were, gi pai re, si nga gu pai nga ga wene pangbanga i atungusa ha fu roni.

Jump to: Chapter 2 →