1 Peter 2

Zande

← Chapter 1 Jump to: Chapter 3 →

1Wa du he were oni moi gbegberẽapai dunduko ku sa yo, na biriki dunduko na asawia, na kpiboro, na gbegberẽ fugo dunduko.

2Oni ki du wa fogo agude ki nikpi nyemu gu mai nga ga toro adu nga na biriki ti ni ya, ya oni sono be he dati bata;

3bambiko oni ahia Gbia ki ini he ya ngba ko angba.

4Oni yé koyo du ko ni, nga unga mbia, nga gu aboro aba ha aba wa kungba he, ono si bangiri Mbori ni siasia ha, ni kikipa ha.

5Oni nga unga ambia a tigaoni, i nadua bambu toro na oni, oni ki du ni ziazia aboromotumo tipa tumo ni agu amotumo nga ga toro, du ni wene he gbe ku bangiri Mbori mbiko Yesu Kristo.

6Mbiko si rogo Ziazia Kekeapai yo, ya, “Mo ngere, mi namaa bakumba tukpu mbia Siona yo, ni siasia ha, ni kikipa ha; gu ni ka idi pa ko zee amánga nga ni te.”

7Si du agu roni idi pa ko irisa du fu roni; ono fu agu yo nabasa pa ko, “Gu mbia abaduabambu agindiga ha, kina ha du ni mbia tukpu he ku ri bambu,”

8na “Si ki du ni mbia kota, nga mbia tigo fu yo a.” Mbiko i nga agu yo nakota ti gako pai, wa du yo ni keretukeretu aboro, nga gu i aringbisi yo tipa ha.

9Ono oni nga siasia ngbatunga aboro, nga ga bakindo aboromotumo, nga ziazia rika aboro, nga aboro du ni kina ga Mbori yo, ya oni yugu gu wene sino gbayaga nga ga gu ko nayambu roni bitimo yo ku rogo gako iiriwo imarago yo.

10Oni adu nga ni rika aboro mbata te, ono awere oni nga gu rika aboro nga ga Mbori yo, oni adia nga inapai mbata te, ono awere oni aima dia inapai.

11Abadiangba, mi nazungadi roni wa du nungunungu aboro nga oni, nga tata aboro, oni né gu nyemuahe nga ga borose, nga gu naso vura na mbisimo.

12Gaoni mangapai ki du ni wene he ku bangiri aGendiria; wa i nagumba rimoroni ki ya aboro gbegberẽ apai nga oni, i ki taasi rimo Mbori rago ye ko mbiko bi yo wene mangaapai ti roni.

13Oni gí agu arugute nga ga aboro dunduko mbiko Gbia, ki nigi pa bakindo wa du ko ni bahe,

14na pa abazogo, nga agu yo ko nasia yo tipa mbusa aboro gbegberẽpai na tipa tambua agu yo namanga wenepai.

15Bambiko wo du sangba Mbori ya rogo manga wene pai oni za fugo mumungo aboro.

16Wa du aboro raniri nga oni ka oni sá nga gaoni raniri ni údada gbegberẽpai ya, ono oni dú ni ga Mbori azogo.

17Oni írisi aboro dunduko. Oni kpi nyemu awirina. Oni gúnde ti Mbori. Oni írisi bakindo.

18Amoyambu, oni rá fu abairaroni ni gunde; fu kina agu yo du ni weneringi aboro, na fu agu yo du ni bayee yo sa te, ono fu agu yo angba nga ringiyo a ya.

19Bambiko gere nga wenepai nga ka boro hi arungosi, ki nihi he gbua, mbiko wa du pa Mbori bangirini.

20Ono ka oni ingi, i ki ta roni mbiko ho, oni ki idi pa ha ni zera, gini tambuahe du ti ni? ono ka oni mangi wenepai, ki nihi apai mbiko ho, oni ki idi pa ha ni zera, si du ni wenepai ku bangiri Mbori.

21Were, gi nga gu pai i ayambu roni kuti ni re: mbiko Kristo ahi pai a tigako tipa roni, ki he kpia pai fu roni, oni peke fuo ko.

22Ko nga gu ko namanga nga gbegberẽpai ya, i abi nga biriki ngbako yo te.

23Ho i agberã ngbayo yo ni fu ko, ko agberã nga ngbako yo fu yo te; ho ko aima ni, ko aserã nga yo a te, ono ko afu tiko ku be gu ko nasapa ngbanga nzunzu.

24Kina ko tigako aaka gaani ingaapai ni boroko ti ngua, ya ani kpi ti ingaapai, ki nye ni ungarani tipa rurupai; ani au mbiko gako amandoro.

25Bambiko oni angbuo angbuo wa akandoro, ono awere oni yega koyo du gu ko ni nga Babanda mbisimoroni, nga gaoni Barumbatayo.

← Chapter 1 Jump to: Chapter 3 →