2 Peter 2

Zande

← Chapter 1 Jump to: Chapter 3 →

1Ono zire anebi adu dagba aboro mbata, wa zire abayugupai nikadu dagba roni a, nga agu yo ayé ni rondo na apai akia nga ga gberã, ki nioro rimo gu Bairayo nangbe yo, ki nigbefe gayo mbusa ku ri yo ni ipo.

2Dungu aboro apéka gayo wasiwasi mangaapai a; aboro agúmba gbegberẽpai tipa gene rengo mbiko yo.

3I ki gumba pai ni iraira ha rogo kpi ahe yo, ki sa roni ni bagibagi he. Gayo mbusa aima nga koyo te, gayo gberã ará nga a te.

4Bambiko ho amaraika aingi ni, ka si du wa Mbori ahe nga ha fu yo te, ono ko aba yo ku rogo bambusa yo, ki fu yo ku rogo azogbo bitimo ka banda yo sa rago sapangbanga;

5ka ko ahe nga ha fu kuru zegino a te, ono ko abatasi Noa nangia batungusi rurupai, na kura aboro saba, ni gu rago i aye na bangirimo ku auru gu zegino nangia ga azangasinombori.

6Mbori ki sa akporo nga Sodoma na Amora ni kuke we, ki nigbarasi ngbanga yo ki ba yo aba gbegberẽ; ki nisa yo i du ni kpiahe fu agu yo nakpi nyemu ka adu ni azangasinombori.

7Ko ki batasi Roto du ni ruru boro. N arungo arungo bakere be gu wasiwasi mangaapai nangia ga gbegberẽ aboro,

8Mbiko gu ruru boro re wa ko anasunga dagba yo, ko arungosi tiko dedede na uru be bi gayo mangaapai zanga rugute na be gia pa ha.

9Gbia ini pa batasa aidipambori be asada, na ka ka kuti azangarurupai tii mbusa yo dati rago sapangbanga;

10ono agu yo bakere gbe nata fuo pa borose rogo nyemu biriko, ki nibasa pa abazogo. I agunde nga te, i napeka kina gu pai i akpi nyemu he tigayo, i nakiga nga ni gu rago i agberã ngbayo yo fu iriiri boro te.

11Ono amaraika tigayo wa du gayo ome na gayo tandu si ki susi ga agu yo re, ono i aye nga na ngbanga ku barangba Gbia nigberẽ ngbayo yo kuti yo te.

12Ono agi yo re i nawira agu anya adu nga na rugatinapai ti ra ya, nga gu kungba anya i avunga ra tipa zia ra na tipa imo ra, agi yo re ninagberã ngbayo yo rogo ngbatunga apai i aruga nga tiyo na paha ya, pai sa rogo gayo zizirĩ apai i azírã azirã a.

13Ono i ani gbegberẽapai ni mosoro gbegberẽpai; i nga agu aboro rago nangba angba ti yo tipa manga gbarakagbaraka pumbo uru, abiriko na asirõ nga yo, i ki nimangi pai ni nzanga rogo gayo pumbo nyemuse ni gu rago i nari riahe na oni.

14Bangiriyo ki hiki na pa bari, ka i arengba nga na ongoda be ingaapai ya; i ki niingisi agu yo nawo; ngbaduyo awiriki pa kpi ahe; awiri motiwa nga yo.

15I ahe ruru gene, ki ningbuo angbuo, wa i apeke gu gene nga ga Birama nga wiri Basoro, nga gu ko naakpi nyemu gu mosoro nga ga manga gbegberẽpai;

16ono i arugu ko tipa gako ingapai; gu nya tindiro afura nga ya, u agumba pai ni fugo boro ki za gu nzanga nangia ga nebi.

17Agi yo re nga aguga zanga ime, i nga andurõ du ni dandidandi he be bakere yuge; nga agu yo du bibiri bitimo ni igiigi he tipa yo.

18Bambiko i nagumba gbanga apai du ni kungba ha, ki ninangi agu yo nikabata be agu yo nanye rogo irairaapai yo, ni gu nyemuhe nga ga borose, na ni wasiro a.

19I ki kido he tipa fu raniri fu yo, na wa du yo tigayo ni akanga fu zirã; mbiko gu he nadia be boro, kina ha du ni ni zizi ni fu he.

20Bambiko ka si du wa i abati be gu gberã nga ga zegino mbiko ina pa Gbia nga Batasi Yesu Kristo, fuo ho i ki du ni zizi yo rogo ho berewe, si ki di be yo, yangada gayo pai ki du ni gbegberẽ he susi gu nadu mbata.

21Bambiko ka i aina nga gene rurupai ya, si angba fu yo ti gu pai nga fuo ina yo paha i ki karaga tiyo pati gu ziazia rugute i aye na ni fu yo.

22Gu pai amangi yo nga gu du rogo ruru sanza, nga gu naya, Ango akaraga tiru berewe fuo gu he u asuku, gu namukuru nazundu tiru ki karaga tiru berewe ku rogo dogoro.

← Chapter 1 Jump to: Chapter 3 →