2 Peter 3

Zande

← Chapter 2 Jump to:

1Abadiangba, awere gi keke waraga re nga ue he ke mi he fu roni; na rogo ho ue mi ki zingisi gaoni ziazia aberã rogo tingida apai fu roni;

2ya oni tingidi agu apai ziazia anebi agumba ha mbata, na gu rugute nga ga Gbia, nga Batasi, ngba gaoni amokedi;

3ki ini gere mbata, ya ti yangara arame airasawia nikaye ki nipeke agu apai boroyo akpi nyemu he,

4niya, “Wari du gu kidohe ni tipa ye ko berewe? Bambiko tona ti rago ti abarani ni rame, ahe dunduko nanye wa si adu rago tonatona manga ahe.”

5Bambiko i tigayo nakpi nyemu gi pai re du ni okooko ho be yo nga, angbangbaturũ adu kina ho bakuru yo, na kpotosende ni mangimangi he be ime na rogo ime, mbiko gu pai nga ga Mbori;

6na be agi apai re gu zegino nadu ho mbata, ime afu afu ku auru he si ki gberẽ.

7Ono agu angbangbaturũ du ho awere na kpotosende si du ni igiigi he be kina gu pai re tipa we, ni bandabanda ha tipa rago sapangbanga na rago gbarasa azangasinombori.

8Ono abadiangba, ka gi pai sa re go nga bangironi ya, nga, uru sa du bangiri Gbia wa agarã 1,000, agarã 1,000 ki du wa kina uru sa.

9Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.

10Ono gu uru nga ga Gbia si ayé wa batuka. Rogo ho angbangbaturũ asúsa ku sa yo na bakere woro ho, agu ahe du ngbangbaturũ yo si azaraga be bakere faarago, kpotosende ki gbi, na gu mangimangi ahe du rogo.

11Wa du agi ahe re nikadu ni gbandakagbandaka ha oni ka du ni gini ngbatunga aboro tipa manga ziazia apai na sinombori?

12Oni ki ngere tipa ye gu uru nga ga Mbori ki niipisi he, nga gu angbangbaturũ agbandaka mbiko ho wa si nagbi be we, na agu ahe nga ga ngbangbaturũ si azáraga be faarago.

13Ono mbiko gako kidohe, ani nangera tipa vovo angbangbaturũ na vovo kpotosende, nga gu ruru apai nikanye rogo ho.

14Were abadiangba, wa oni nangera tipa agi apai re, oni nifú tironi nyanyaki ya i bi roni zezeredi, ka wiri biriko he adú nga ti roni barangba ko na sirõ a ya.

15Oni ki ini he ya gu hipai nga ga gaani Gbia si nga gene bata; kina wo gaani weneringi wirina nga Pauro ake he fu roni, be gu inahe i afu fu ko;

16kina wo ko agumba pai tipa agi apai re rogo gako keke awaraga dunduko; nga gu du bete apai rogo ho yo ni kpakarakpakara ha tipa rugati na paha, agu yo aina nga pai ya i ki irasi he na agu yo nawo a, wa i namanga na kura Ziazia Kekeapai a, ki gbarasi tiyo.

17Were abadiangba, wa ini oni pa agi apai re mbata, oni bánda tironi gu ingapai nga ga gbegberẽ aboro, si ka ndu ka ngbe fu roni ku mbata yo, oni ki ti pati gaoni ru nyanyaki.

18Ono oni sóno rogo gu undahe nga ga gaani Gbia nga Batasirani Yesu Kristo, na rogo ina pako. Taarimo dú fu ko awere, nye anye kindi. Amina.

← Chapter 2 Jump to: