Amos 4

Zande

← Chapter 3 Jump to: Chapter 5 →

1“Oni gi gi pai re, oni anaabagara Basana, nga agu ra du bagangara Somorona yo, narungosi rurungbura aboro, ki nigbingbida irazingohe, naya fu akumbayo, ‘Oni yé na he, ani mbiri he!’

2Gbia MBORI zunga he wa du pa pako ziazia ya, mo ngére, arago naye sa roni, ho i ka dia roni ku sa yo ni na ngorã kiwe, na yangara roni a na akombe.

3Oni akúra ti kuadikuadi aba, aboro ni ba sa sa ki nikuru nzunzu ku mbata yo; i abáfa roni ku rogo nyanyaki gbata,” wo poi Yekova.

4“Oni yé ku Betere yo, ka sa mungu; ku Girigara yo, ka ngeesa gaoni asamungu; oni niyé na gaoni amotumo na wiso, na gaoni sa dagba bawe fuo rame biata kindi;

5oni fú motumo tambuahe nga gu du na agbooro ti ni, ki taki pande pa gu motumo fu oni na nyemuhe, ki gbandaka pa ha; Ako oni awiri aYisaraere, mbiko manga wa gere ngba ti roni!” wo poi Gbia MBORI.

6“Mi ka na riahe be roni rogo gaoni abaakporo dunduko, zingo riahe ki du rogo gaoni aba dunduko, ono oni akaraga nga tironi kono du mi ni te,” wo poi Yekova.

7“Mi ki ka na mai be roni a ho du diwi ni biata sa regbo keahe; mi afu mai ku ri bakporo sa, ka mi afu nga ha si na ku ri gu kura bakporo ya; mai ki na ku ri gu bete papara ringara, gu kura papara ringara si ana nga ku ri he ya si ki ugu;

8si du aboro abaakporo ue watadu biata ki merẽ ku rogo bakporo sa ka mbira ime, ka si arengba nga na yo ya; ono oni akaraga nga tironi kono du mi ni te,” wo poi Yekova.

9“Mi amangi roni gaoni aũati ki ngbiimi ki nikuko; mi agbarasi gaoni dungu aati na gaoni aati bakakue; ayere ki riti gaoni vurumo na gaoni aeraya; ono oni akaraga nga tironi kono du mi ni te,” wo poi Yekova.

10“Mi akedi gberãngbi ku dagba roni wa ga Ezipeta; mi aimi gaoni aparanga ni basape, na gaoni zizi afarasi a; mi ki mangi kere fuõ gaoni bataya si gundu kina ku ngba õroni; ono oni akaraga nga tironi kono du mi ni te,” wo poi Yekova.

11“Mi agbarasi agu yo dagba roni, wa ho Mbori agbarasi Sodomo ni na Amora, oni ki du wa gbitiri nyake i adi he we yo; ono oni akaraga nga tironi kono du mi ni te,” wo poi Yekova.

12“Ako aYisaraere, si du mi amánga were fu roni; bambiko mi amánga gere fu roni, Ako aYisaraere, oni mbákadi tironi ka gbia gaoni Mbori!”

13Bambiko oni ngére, gu ko namanga abaagangara, ki nifu yuge, ki nitaki pande pa gu pai fu aboro du rogo gako berã; nga gu ko nasa wiso ni bitimo, ki nindu ri gu gbangagbanga aba du auru kpotosende— nga Yekova, Mbori nga ga arimbasa Ko, nga rimoko!

← Chapter 3 Jump to: Chapter 5 →