Amos 5

Zande

← Chapter 4 Jump to: Chapter 6 →

1Ako oni nga ngbatunga aYisaraere, oni gí gi pai re mi agumba tipa roni ni biakpe:

2“Aboro ti, ka i aguari nga berewe ya, nga aboro Yisaraere; i mbu yo rogo gayo ringara, ka boro adu nga ho ka tumba yo ya.”

3Bambiko wo poi Gbia MBORI: “Agu aboro bakporo akuru wa aboro bakporo 1,000 i anyé kina 100 gbua, agu yo nakuru 100 i anyé bawe gbua fu ngbatunga aYisaraere.”

4Bambiko wo poi Yekova fu ngbatunga aYisaraere: “Oni gbáta re, ki nye ni ungaroni;

5ono ka oni gbáta nga Betere ya, ka oni rimi nga ku Girigara yo ya ka oni súsi nga ku Bera-saba yo a ya; bambiko Girigara andú ni zizi he ni rengo, Betere ki du ni kungba he.”

6Oni gbáta Yekova ki nye ni ungaroni, ko ka kura ku ri ngbatunga Yosefa wa we, si ki riti ahe, ka boro adú nga ho ka bisa ha Betere yo ya,

7Ako agu roni nasa sarangbanga wa kere ngua, ki ba rurupai ku sande!

8Gu ko namangi agu akerekuru nga Periade na Oriona, ki sa nduunduu bitimo wa girarago, ki bisi uru wa yuru nga gu ko nayamba aime baime si ye, ki niukaga ha ku ri kpotosende, Yekova nga rimoko,

9nga gu ko naye na gbarasahe rure ku ri airaome, gbarasahe ki ye ku ri nyanyaki ba mbiko ho.

10I nasoga gu ni naza aboro pati ngbanga bakporo yo, i ki nipayasi pa gu ni nape pai ni ruru he.

11Si du, bambiko wa oni nasimba rungorungo aboro ki rogo nganu be yo ni ungbeti, wa dua oni abambu ni sekeseke ambia, ono oni aráka nga rogo ho te; wa rũku oni wene bakakue aati yo, ono oni ambira nga imekakue he te.

12Bambiko mi ini waĩ du gaoni dendekere asamungu, na waĩ nyaki gaoni ingaapai— oni nga agu yo narungosi ruru aboro, nadia marã mabirimo be aboro, nairasi ga airazingohe ngbanga ba ngbanga bakporo yo.

13Si du gu ni du na rugatinapai aónga ni gu rago re; bambiko si nga gbigbita rago.

14Oni gbáta wenepai, gbigbitapai te, oni ki nye ni ungaroni; si du Yekova, ka du ti ni na oni, nga Mbori nga ga arimbasa ko, wa gumba oni he.

15Oni sógo gbigbitapai, ki nikpi nyemu wenepai, ki nimbakadi ruru sarangbanga ba ngbanga bakporo yo; si du ka ngia Yekova, nga Mbori nga ga arimbasa ko nikaina pai fu gu yangara yo nga ga Yosefa yo.

16Si du ya Yekova, nga Mbori nga ga arimbasa ko, nga Gbia wẽ: “Tawawa adú ngba abaagene dunduko; i ayá ngba agene abaakporo dunduko, ‘Ako! Ako!’ I ki yambu abasopobino sa kparakpe ni nunga, na anakparikpe sa tawawa,

17tawawa adú aati bakakue yo dunduko, bambiko mi asúsa dagba roni yo,” wo poi Yekova.

18Na gberẽ he fu agu roni nakpi nyemu gu rago nga ga Yekova! Tipagine oni akpi nyemu gu rago ti ni nga ga Yekova? Si nga bitimo, ka rago aha nga ya;

19wa ka boro aora be bahu, nya nga urisi ki gbia ni; watadu ni ndu ku dimoyo ki zadi vuro bambu, kina wo ki de beni.

20A nga gu rago nga ga Yekova si ni bitimo te? ka rago aha nga ya, si ki du iyo te? ka imarago adu nga rogo ho ya.

21“Mi sogo gaoni apumbo, mi gindiga ha a, rago angba nga ti re mbiko gaoni irisiirisi agbuu te.

22Ka oni vura tumo fere na gaoni zozo motumo na amotumo riahe, mi aída nga pa ha te, ka mi abérã nga pa gaoni amotumo zereda nga ga gaoni anya nzeme a ya.

23Oni di woro gaoni abia ture yo ku sa yo; mi aidá nga ka gia woro gaoni ngbangbari a te.

24Ono oni ídi pa ruru sarangbanga si fu wa ime, na rurupai wa gu wiridi nafu afu kindi.

25“Ako ngbatunga aYisaraere, oni aye na amotumo fere na amotumo nga ga riahe ngbakungba yo garã ki du 40?

26Oni ida pa Sikuta gaoni bakindo, na pa Kuina gaoni akpiahe, na pa gu kerekuru nga gaoni mbori, nga gu oni amangi he fu roni;

27si du mi ka ndu ti ni na oni ni zizi roni ku gii Damaseke yo,” wo poi Yekova, du rimoko nga Mbori nga ga arimbasa ko.

← Chapter 4 Jump to: Chapter 6 →