Colossians 3

Zande

← Chapter 2 Jump to: Chapter 4 →

1Ka si du wa i amongo zingisi roni na Kristo, oni gbáta agu ahe du ari yo, yo du Kristo ni, nisungu ku kumbabe Mbori.

2Oni moi gaoni berã ti agu ahe du ari yo, ti agu ahe du sende no te.

3Bambiko oni akpi, ungaroni ni okooko ho na Kristo rogo Mbori yo.

4Ho i ka yugo Kristo ni, nga ungarani, i ayúgo roni na ko a ni taarimo.

5Oni ími apa kpotoroni yo du auru kpotosende no; pa bari, na meteka, na gbagaura, na kpi nyemu gbegberẽ apai, na kpihe, si nga irisa kpiahe;

6bambiko ga Mbori zinga naye ku ri awiri basapai mbiko agi apai re.

7Si nga agu ahe oni ata rogo ho mbata a ho oni adu ni na agi apai re.

8Ono awere oni mbú agi apai re du a; erã, na zinga, na sogote, na wawaru, na gbegberẽ fugo ngbaroni yo.

9Ka oni re nga zire dagba roni yo ya; mbiko oni aima mbu gu kuru boro, na gani mangaapai.

10Oni aukadi gu vovo boro, i ambakadi ni ni vovo ni sa inahe wa du kpia gu ko nafu ni.

11Si du adu nga aGiriki ho na aYudo ti ni berewe ya, yeratise na zangayeratise, na aboro kura aringara na agu yo fugoyo adu akiaakia, kanga na raniri a ya, ono Kristo nga ahe dunduko, ki du rogo ahe yo dunduko a.

12Ziazia amangure, wa du oni ni ga Mbori siasia yo, oni úkadi ngbadu inapai, na weneringise, na umbasitise, na zera, na gbanga hipai;

13nihi pai fu akuaroni, nivu akuaroni, ka pai dũ bangiri gu boro kuti kura ni; wa Gbia avu roni, kina wo oni ka manga.

14Ku ri agi apai re dú oni úkadi nyemuse, nga gu úvodatise nga ga ziaziapai.

15Oni ídi he fu ga Kristo zereda si zogo kpotoroni yo, nga gu pai i ayambu roni sa ni rogo boro sa; kinitambuahe.

16Oni ídi he fu ga Kristo pai si nye rogo roni yo ni babakere he na tatamana dú; ki yugu pai fu akuaroni ki nirugu pai rogo abia tambuahe yo, na abia wasa, na agu abia Toro nayugo, nibi he na undahe kpotoroni yo fu Gbia.

17Gu oni amanga, watadu ni fura, na mangapai, oni mángi he dú ni rimo Gbia Yesu, ki nifu tambuahe fu Mbori nga Ba mbiko ko.

18Dere akumba, oni rá fu kina akumbaroni, wa re he rogo Gbia yo.

19Akumba, oni nikpí nyemu adiaroni ka ngbaduroni ími nga fu yo ya.

20Agude, oni gí sangba avunguroni rogo apai dú, bambiko gere ngba rogo Gbia yo.

21Aba, ka oni wi nga ngba awironi ni wia ya i ka mbu.

22Akanga, oni gí sangba agu yo du ni abairaroni ku sangba borose yo; ka manga pai ku bangirise, wa agu yo nambakada tiyo ku bangiri aboro te, ni kpotoroni yo, ni gunde ti Gbia.

23Na gu oni amanga oni mángi he na kpotoroni yo wa manga ha fu Gbia, wa fu aboro te;

24ki niini he ya oni abí gu mosoro du ti dikumbo be Gbia; oni mangi pa Gbia Kristo.

25Bambiko gu ni nanamanga gbegberẽ pai, ni adia mbusa be gu gbegberẽ pai berewe ni amangi. Mbori akpara nga boro te.

← Chapter 2 Jump to: Chapter 4 →