Colossians 4

Zande

← Chapter 3 Jump to:

1Abaira oni fú he fu gaoni akanga ni ruru he, wa rengbe he; niini he ya Bairaroni du ngbangbaturũ yo a.

2Oni kpári akpara dedede kindi, ki ta ngera rogo ho ni tambuahe.

3Oni ki nikpari tipa rani a, ya Mbori za ngbadimo gumbapai fu rani, ani gumba gu gbugbu pai nga ga Kristo, si du du mi ti ni ni vodivodi re a;

4ya mi yugu he wa gu mi ka gumba ha.

5Oni tá ni tatamana pati agu yo du zegi yo, nidungura rago tipa mangapai.

6Oni fúra na undahe dedede, si ki hii na tikpo, si du oni ka ina ti ni ya wãi oni ka karaga ha fu akuaroni.

7Gimi apai dunduko Tukiko agúmba ha fu roni, nga wirina du nyemuko ti rani, nga kangara boromangapai du ani na ko ni amoyambu rogo Gbia.

8Mi akedi ko kina mbiko gi pai re, oni ini gaani apai, ko ngarasi kpotoroni yo;

9na Onesimo nadu dagba roni nga kangara wirina du nyemuko ti rani. I ayúgo pa agu apai fu roni dunduko du ni mangimangi he no.

10Arisitaruko sanango roni du ani na ko ni kisikisi rani, na Marako nga wiri dawiri Barunaba. I aima ruga roni tipa ko, ka ko ye koyo du oni ni oni di ko ku gume,

11na Yesu, i niya ti ko Yuseto, nga ayeretise. Kina agi yo re biata nangia aYudo naidi pase ki du na mi ni amangisunge tipa ga Mbori ngbi, nga agu yo nangarãsi re.

12Epafura sanango roni, ko nadu dagba roni, nga ga Kristo Yesu moyambu, ki zungadi he ni gako kpe tipa roni gbe, ya oni ru ziazia teketeke rogo gu pai Mbori akpi nyemu he.

13Mi nga dezireko ya ko amangi pa roni gbe na pa agu yo du Raodikiya yo na pa agu yo du Yerapori yo.

14Ruka nga munganga, ko sanango roni, du nyemuko ti rani, na Dema.

15Oni sánango agu awirina du Raodikiya yo, na Numba, na agu akanisa dungura tiyo ku kpuyo yo.

16Ho i ka geda gi keke waraga ni re dagba roni, oni bi he i gedi he dagba akanisa Raodikiya yo a; oni ki gedi gu pai i akedi ku Raodikiya yo tigaoni a.

17Oni gúmba ha fu Arukipo ya, “Mo bérẽ pa gu sunge mo adi he be Gbia, mo digisi he.”

18Gere nga gi sanango ni boro bere nga Pauro. Oni tingidi pa gimi azogbo. Undahe dú na oni.

← Chapter 3 Jump to: