James 3

Zande

← Chapter 2 Jump to: Chapter 4 →

1Awirinami, ka oni idi nga ka du ni abayugupai ni dungu roni ya, wa ini oni ya i asapa ngbanga abayugupai nyanyaki ti agu yo.

2Bambiko ani nakota dunduko rogo dungu apai. Ka boro akota nga rogo fugoni ya, ni du ni ziazia boro, rengbe na ruga kpotoni dunduko a.

3Ani namaa marãrugangba ku ngba afarasi yo, ya ami mangi sangbarani, ani ki nisa kpotora dunduko ku sa yo.

4Mo bí, abaakurungba a, wa vura du he ni bakere he susi, ki du ni dandidandi he be gugugu yuge, i nasa ha na gu he i naruga bakurungba na ni, du ni wiri toni he, ho barugu bakurungba nakpi nyemusindukuhoni.

5Kina wo a du mirãse ni toni pa boro, ki nigumba bakere apai ni enda. Mo bi, nga gu bakere ngua i naziga ha ni toni we!

6Were mirãse nga we. Zegino gbegberẽpai dagba aparani yo nga mirãse, nga gu nabirikosi kpotose dunduko, ki nitigi pa borose dunduko na we, ki du ni tigitigi he be Geyena.

7Ngbatunga agu anya dunduko du ni zogozogo ra be aboro na azire, na agu agbiro nagbe tira sande, na agu ra du baime yo, ami adu ni zogozogo ra mbata a.

8Ono mirãse, ka boro zogo nga ha te, si nga nvurãnvurã gbegberẽ he, ki nihi be gbegberẽ kere ngua.

9Ani natambua Gbia na ni nga Ba; ani ki nitiwa aboro na ni, nga agu yo i afu yo ni kpia Mbori,

10tambuahe na motiwa si nakura kina ngba yo sa. Awirinami, ru nga pai wo te.

11Guga nafu nzinziri ime na hihii he a ti genehe sa?

12Awirinami, ka vurumo zu aeraya, bakakue a, ka si zu rindi vurumo? Kina wo a ka ime tikpo fu nga nzinziri ime te.

13Da du ni iratatamana, ni boro inahe dagba roni yo? Ni yúgu gani mangaapai rogo wene sinoni ni gu umbasiti nga ga tatamana.

14Ono ka ngia oni na kere kpiboro na kpata kpotoroni yo, ka oni támbua nga tironi ya, ka oni gúmba nga zire kuti rengo a ya.

15Gi tatamana re, si azorã nga ari yo te, si nga ũzegino, nga ũborose, nga ũdaimona.

16Bambiko ho du kpiboro ni na kpata, yo du gbarakagbaraka pai ni na ngbatunga gbigbitapai dunduko.

17Ono gu tatamana naye ari yo si du na wene sino mbata, fuo gure si du na zera, ki du yee, ki ipi na gia kpe, ki hi be inapai na wene zuzuhe, adu nga na kparaka aberã, i na biriki a ya.

18Zuzu rurupai du ni r ũrũ he rogo zereda fu agu yo namanga zereda.

← Chapter 2 Jump to: Chapter 4 →