James 5

Zande

← Chapter 4 Jump to:

1Oni rú nga, airakumuko, oni kpári ni aume ki nikpari ku ari mbiko agu agberãngbi nikaye fuo roni.

2Gaoni ũkumuko zirĩ, ayawe riti gaoni aroko.

3Gbegbe zi gaoni dahabu na gaoni feda; gaha gbegbe nikadu ni dezire kuti roni, ki niri pasioroni wa we. Oni adungura ũkumuko rogo yangara arame.

4Oni bí, gu mosoro nga ga amangisunge nga agu yo nake gaoni aati, si nakpara, nga gu oni aka na ni be yo ni wia. Gu kpe nga ga agu yo nake he, si da tu Gbia yo, nga Iraarimbasa.

5Oni ara na kina ũkumuko rogo kpotosende, ki nipeke kina gu he bororoni akpi nyemu he; oni arigi ngbaduroni sa rago kpio.

6Oni agbarasi ngbanga fu ruru boro, ki imi ruru boro; ka ko aka nga fu roni ya.

7Were, oni hí pai, awirina, daho Gbia ka yega ni. Oni ngére, babandaati nasunguda wene zuzu kpotosende, ki nihi pai pati he gbe, daho bambata mai ka nada ha ni na yangara ha a.

8Oni hi pai a tigaoni; oni nyákasi ngbaduroni, bambiko rago yega Gbia nambeda.

9Awirina, ka oni kpákana nga he dagba roni ya, i ka sapa ngbanga roni. Oni ngére, basapungbanga naru ngbadimo.

10Awirinami, oni dí agu anebi nagumba pai ni rimo Gbia, ni gaoni kpia hipai na zadapai.

11Oni bí, ya ani ti agu yo naru nyanyaki dati digida pai ya betedi aboro du. Oni agi pa gu zadapase nga ga Eyobo, oni ki bi waĩ Gbia amangi fu ko ti digidaha, wa du ko na bakere nunga ti ko, na bakere inapai.

12Ono ti apai dunduko, awirinami, ka oni zúnga nga he ya, kuti ngbangbaturũ yo ya, kuti kpotosende a ya, na kuti kura zunga he a ya. Ono gaoni ii, si dú ni kina ii, na gaoni oó, si dú ni kina oó; oni ka ti ku rogo sapangbanga.

13Gu ni du dagba roni yo nahi pai? Ni kpári kpe. Gu ni du na wasa? Ni bí bia tambuahe.

14Gu ni du dagba roni yo na kaza? Ni yámbu ga kanisa abaakumba i ki kpari auru ni, niuka nzeme ku auru ni ni rimo Gbia.

15Gu kpe nga ga idapase abátasa gu ni nakaza, Gbia atúmba ni ku ari; si ngia ni amangi ingaapai, i avú ni avu ti ni.

16Were gu ni kúsi gani ingaapai fu gu ni, gu ni fu gu ni, oni kpári tipa akuaroni, ya i husi roni. Gu nyanyaki kpe nga ga ruru boro du na bakere tandu.

17Eriya adu ni boro nihi dungu apai wa kina rani, ko akpari nyanyak: ya ka mai na nga ya; garã biata na diwi sita ka mai azia nga sende ya.

18Ko ki kpari berewe; ngbangbaturũ Ki fu mai, sende ki batika gaha zuzuhe.

19Awirinami, ka gu ni ingi dagba roni yo ti rengo, gu ni ki karaga ni,

20ni ini he ya, gu ni ka karaga ingiingi boro ngba gani iraira gene ni ki batasi gu boro be kpio, i ki vu gu boro ti badungu ingaapai mbiko ni.

← Chapter 4 Jump to: