Micah 4

Zande

← Chapter 3 Jump to: Chapter 5 →

1Si adú wa gere ti yangara arame ya gu bagangara nga ga ga Yekova bambu i ambákada ha ni bagbanga ha ki susi abaagangara dunduko, si adú ni tumbatumba ha ku ari ki susi agangara dunduko; aboro andú koyo,

2dungu arikaaboro ayé, ki ya: “Oni yé, ani ndú ku ri ga Yekova bagangara yo, ku rogo ga ga Yakoba Mbori bambu yo; ya ko rugu rani na gako asino ani ki nipeke gako agene.” Bambiko Siona yo rugute ka kura ni, ga Yekova pai Yerusarema yo.

3Ko asára ngbanga dagba dungu aboro, ki za nyanyaki arikaaboro du tuturũ; i atáka gayo abasape ni marã sopabino, na gayo abaso ni marã kuya ngua; rikaaboro amó nga basape kuti gu rikaaboro te, i awírika nga pa sovura berewe a te;

4ono aboro ni ba sa sa asúnga kina tii gayo bakakue na tii gayo vurumo a, a nga boro sa nikagundesi yo te; bambiko ngba Yekova nga ga arimbasa ko gumba ha.

5Bambiko aboro dunduko ata ni ba sa sa na rimo gayo mbori, ono ani atá na rimo Yekova gaani Mbori nye anye kindi.

6Ni gu rago re, mi adúngura gu gbarĩgbarĩ yo, wo gumba Yekova ha, ki dungura agu yo i ado yo ku sa yo na agu yo mi arungosi yo;

7mi ki sa gu gbarĩgbarĩ yo i nye ku ba yo; na agu yo i abafu yo ku sa yo, ni nyanyaki rikaaboro; Yekova ki nizogo yo ri Bagangara Siona tona awere na ku mbata yo nye anye kindi.

8Mo tigamo, nga tumbatumba gbata tipa rimbasa akandoro, nga gangara nga ga aboro Siona, si ayé koyo du mo ni, gu bambata zogarago ayé, gu ngbi nga ga aboro Yerusarema.

9Tipagine mo nakpara ti ni awere ni wawa? A nga bakindo kina yo du mo ni te? Ga bororondo kpi, si du ima zi ro wa ga de rago vunga?

10Ako aboro Siona, oni sóro ki niuko, wa de rago ima be vunga; bambiko oni nikaguari bakporo yo awere ki niraki rogo kpasakpasa rago; oni andú ku Babera yo. Yo i ka batasa roni ni, yo Yekova ka tumo roni ni be avuraroni.

11Awere dungu arikaaboro nadungura tiyo kuti ro, niya, “I bírikosi ri, bangirani ki ningana Siona.”

12Ono i aina nga agu aberã nga ga Yekova te, i aruga nga tiyo na sangbako a te, ya ko dungura yo wa vodivodi keke zuzuhe ku batakaahe yo.

13Ako aboro Siona, oni gúari ka taka he, bambiko mi asá gaoni gbanga ni marã na sukuturoni ni sirigi; oni atáka dungu aboro rukutu, ki kpara gayo mokiisa fu Yekova, gayo kumuko fu Gbia nga ga zegino ko dunduko.

← Chapter 3 Jump to: Chapter 5 →