James 2

Ahirani (आहिराणी नवा करार) - No Year

← Chapter 1 Jump to: Chapter 3 →

1ओ मना विश्वासी भावूसहोण, तुमी आमना महिमामय प्रभु येशु ख्रिस्त वर विश्वास करणारा लोक शेतस, एनासाठे तुमी पक्षपात पासून दूर राहा.

2समजा, एक माणुस सोनानी अंगठी आणि चांगला कपळा घालेल तुमनी मंडळी मा एवो आणि एक गरीब बी मळीन आणि चीवळायेल कपळा घालीसन मंडळी मा एवो.

3आणि तुमी त्या चांगला कपळा वाला ले जास्त मान ना संगे सांगो, “तू आठे चांगली जागा वर बठ,” आणि त्या गरीब ले सांगो, “तू तठे उभा राय,” व मना पायस ना जोळे खाले बठ.

4काय तुमनी आठे भेतभाव नई कर? काय तुमी वाईट विचार कण न्याय करणार नई बननात?

5ओ मना प्रिय विश्वासी भावूसहोण ध्यान कण आयका, परमेश्वर नि ह्या जग मा गरीब लोकस्ले निवाळी लीयेल शे, कि त्या विश्वास मा मालदार हुई जावोत आणि तेना राज्य ना भागी हुई जावोत, जेले देवाना करार तेनी आपला प्रेम करणारस्ले करेल शे.

6पण तुमनी त्या गरीब ना अपमान करेल शे. तुमले माहिती शे कि ज्या मालदार लोक शेतस त्याच तुमना वर अत्त्याचार करतस, आणि त्याच शेतस ज्या तुमले न्यायसाभमा जावाना ना साठे मजबूर करतस.

7त्या त्याच शे ज्या येशु ख्रिस्त ना चांगला नाव नि निंदा करतस जेना तुमी म्हणावतस.

8परमेश्वर ना पुस्तक ना वचन प्रमाणे राज्य ना नियम हय शे कि “तू आपला शेजारी वर आपला सारखा प्रेम ठेव,” तरी जर खरज त्या नियमले पुरा करतस, त चांगलच करतस.

9पण कदी तुमी जात-भेद करतस, त पाप करतस, आणि मोशे ना नियम तुमले आरोपी ठरावस.

10कारण कि जो कोणी मोशे ना नियम ना पालन करस, पण तेस्ना मधून कोणती बी पवित्र शास्त्र नि आदन्या ले माना पासून चुकी जास त तो सर्वा गोष्टीस्मा दोषी ठरस.

11कारण कि जेनी हय सांग, “तू व्यभिचार नको करजो,” तेनीच हय बी सांग, “तू हत्या नको करजो,” एनासाठे कदी तुनी व्यभिचार त नई कर, पण हत्या करशी तरी बी तुले मोशे ना नियम तुमले आरोपी ठरावस.

12तुमनी बोलन आणि तुमना व्यवहार त्या लोकस सारखा पाहिजे, जेस्ना न्याय मुक्त करणारा परमेश्वर ना पुस्तक ना प्रमाणे करामा ईन.

13कारण कि, जेनी दया नई करी, तेना न्याय बिगर दया ना हुईन. दया न्याय वर विजय होस.

14ओ मना विश्वासी भावूसहोण, कदी कोणी सांगो कि मले प्रभु येशु मा विश्वास शे पण तेना प्रमाणे व्यवहार नई करत, त तेना काय फायदा? काय असा विश्वास कदी तेना तारण करी सकीन?

15कदी कोणी विश्वासी भावू नईत बहिण ले कपळास्नि गरज शे, आणि तेस्ले दररोज जेवण नि कमी शे.

16आणि तुमना मधून कोणी तेस्ले सांगो, “परमेश्वर तुमले शांती कण जाव, आणि गरम-गरम कपळा घाला आणि पोट भरीसन खावा,” पण तो तेस्ले शरीर ना साठे गरज वस्तू नई देत, त काय फायदा?

17कदी कोणा विश्वास कार्य ना द्वारे प्रगट नई होत, त तेना विश्वास मा जीवन नई शे.

18कोणी सांगस, “तुले विश्वास शे, आणि मी कर्म करस.” पण मी हय सांगस तू आपला विश्वास मले बिगर काम ना त दाखाळ, आणि मी आपला विश्वास आपला कामस्ना द्वारे तुले दाखाळसु.

19कदी तू विश्वास करस कि एकच परमेश्वर शे, त बर आणि चांगल करस, कारण कि दुष्ट आत्मा बी विश्वास करतस, आणि भीती कण कापतस.

20पण ओ मूर्ख माणुस काय तुले हय बी नई मालूम, कि बिगर कार्य ना विश्वास व्यर्थ शे?

21निश्चितच आमना पूर्वज अब्राहाम नि आपला पोऱ्या इसहाक ले वेदी वर चळाव, त तो आपला कामस्कन धर्मी ठरेल होता.

22तुमी देखतस कि तेना विश्वास तेना कार्य ना संगे सक्रिय होता आणि तेना कार्यस्ना द्वारेच तेना विश्वास सिद्ध हुईना.

23आणि परमेश्वर ना पुस्तक ना हवू वचन सत्य ठरणा कि, “अब्राहाम नि परमेश्वर वर विश्वास कर, आणि तेना विश्वास मुळे परमेश्वर नि तेले एक धर्मी माणुस ना रूप मा स्वीकार कर,” आणि तो परमेश्वर ना मित्र म्हणायना.

24त तुमनी देखी लीध कि माणुस फक्त विश्वास कणच नई, पण तो आपला कर्मस्ना द्वारे धर्मी ठरस.

25तशीच राहाव वेशा बी जव तेनी जासुस्ले आपला घर मा उतार, आणि दुसरा रस्ता कण धाळ, त तिले बी आपला कार्य ना द्वारे धर्मी ठरावामा उणी.

26जसा शरीर बिगर आत्मा ना मरेल शे, तसाच विश्वास बी बिगर कार्य ना मरेल शे.

← Chapter 1 Jump to: Chapter 3 →