James 5

Ahirani (आहिराणी नवा करार) - No Year

← Chapter 4 Jump to:

1ओ मालदासहोण आयका, तुमी लोकस्ले रळाले आणि दुखी होवाले पाहिजे, कारण कि क्लेश तुमना वर ईपळनार शेतस.

2तुमना धन नाश हुई जायेल शे आणि तुमना कपळास्ले किळा लागी जायेल शेतस.

3तुमना सोना चांदी मा जंग लागी जायेल शे, आणि ज्या दिन परमेश्वर तुमना न्याय करीन त्या दिन तो जंग तुमना विरोध मा साक्षी दिन, आणि नरक ना आग ना सारखी तुमना नाश करीन. तुमी आखरी दिनस्मा धन एकत्र करी लीयेल शेतस.

4आयका, ज्या मजुरस्नि तुमना वावर कापेल शेतस, तेस्नी मजुरी जी तुमनी तेस्ले नई दिधी, त्या मजुर परमेश्वर ना जोळे आराया मारी ऱ्हायनात, आणि त्या मजूरस्ना रळाना आवाज सैन्यस्ना परमेश्वर नि आयकी लीयेल शे.

5तुमी लोकस्नी पृथ्वी वर सुख आणि विलास ना जीवन जगेल शेतस, आणि ह्या प्रकारे तुमी स्वता साठे परमेश्वर ले न्याय कराना साठे तयार करेल शेतस.

6तुमना काहीच विरोध नई करना तरी बी धर्मी ले तुमी दोषी ठराईसन मारी टाकेल शेतस.

7एनासाठे विश्वासी भावूसहोण, प्रभु ना एवा लगून धीर धर, जसा शेतकरी जमीन ना मोलवान पिकस्नी वाट देखतांना पहिला आणि शेवटला पाऊस होता लगून धीर धरस.

8त्याच प्रकारे तुमी बी धीर धरा, आणि हिम्मत ठेवा, कारण कि प्रभु लवकरच येणार शे.

9ओ विश्वासी भावूसहोण, एक दुसरा वर दोष नका लावा कारण कि तुमी बी दोषी नई ठरोत, देखा, न्यायाधीश येवावर शे.

10ओ विश्वासी भावूसहोण, ज्या भविष्यवक्तास्नी प्रभु ना नाव कण गोष्टी करी, तेस्ले दुख उचलाले आणि धीर धराना एक आदर्श समजा.

11देखा, आमी धीरज धरणारस्ले धन्य सांगतस. तुमी ईयोब ना धीर ना बारामा त आयकेलच शेतस, आणि प्रभु कळून जो तेना फय भेटणा ते बी माहिती शे, जेना कण प्रभु नि अत्यंत कृपा आणि दया प्रगट होस.

12पण ओ विश्वासी भावूसहोण, सर्वास्तून खास गोष्ट हय शे, कि शेप्पत नका खायज्यात, नईत स्वर्ग नि नईत पृथ्वी नि, नईत कोणती वस्तू नि, पण तुमन बोलन हा त हाच, आणि नईत नईच पाहिजे, कारण कि तुमी परमेश्वर ना दंड ना योग्य नई ठरोत.

13कदी तुमना मधून कोणी संकट मा शे, त तो प्रार्थना करो, कदी खुश हुईन, त तो स्तुती ना गान म्हणो.

14कदी तुमना मा कोणी रोगी शे, त मंडळी ना वरिष्ठ ले बलावा, आणि त्या प्रभु ना नाव कण तेनावर तेल लाईसन तेना साठे प्रार्थना करोत.

15आणि विश्वास नि प्रार्थना ना व्दारे रोगी वाची जाईन आणि परमेश्वर तेले चांगला करीन, कदी तेनी पाप बी करेल हुईन, त परमेश्वर तेले माफ करीन.

16एनासाठे तुमी आपस मा एक दुसरा ना समोर आपला आपला पापस्ले कबूल करील्या, आणि एक दुसरा साठे प्रार्थना करा, जेना कण बरा हुई जावोत, धर्मीजन नि प्रार्थना कण गैर काही होवू सकस.

17एलीया भविष्यवक्ता बी त आमना सारखा दुख-सुख भोगणार माणुस होता, आणि तेनी आपला पुरा मन कण प्रार्थना करना, कि पाऊस नई पळो, आणि साळे तीन वरीस लगून जमीन वर पाऊस नई पळणा.

18नंतर तेनी प्रार्थना करी, त आकाश मधून पाऊस पळणा, आणि जमीन पिकदार हुईनी.

19ओ मना विश्वासी भावूसहोण, कदी तुमना मा कोणी सत्य ना रस्ता ले सोळी देस, आणि जर कोणी तेले पश्चाताप कराले मदत करस,

20त तुमले हय समजी लेवाले पायजे, कि जो कोणी पापी ले चुकीना रस्ता वरून परत लयस, तो तेनी आत्मा ले मोत पासून वाचाळस, अस कराना द्वारे तेना गैरा पाप झाकामा येतस.

← Chapter 4 Jump to: