Titus 2

Ahirani (आहिराणी नवा करार) - No Year

← Chapter 1 Jump to: Chapter 3 →

1पण ओ तीत तू विश्वासीस्ले त्या गोष्टी शिकाळत जा ज्या खरी शिक्षा ना नुसार शेतस.

2धल्ला माणसस्ले समजाळजो कि त्या संयमशील, समजदार, गंभीर, विश्वास मा पक्का, प्रेम आणि सहनशीलता मा कदीच नई फाकणार बनोत.

3त्याच प्रमाणे मंडळी ना धल्ल्या बायास्ले बी समजाळ कि परमेश्वर ना आदर करत पवित्र जीवन जगोत. त्या कोणी निंदा करणारी आणि नईत दारू पिणारी राहोत, पण ती चांगल्या गोष्टी सिखाळनारी पाहिजे.

4जेना कण कि ती स्वता ले जवान बायास्ना समोर उदाहरण ना रूप मा ठराई सको, आणि तीस्ले शिकाळी सको कि त्या आपला नवरास्वर आणि पोरस्वर प्रेम करोत.

5आणि सामंजस्य, आपला नवरा ना प्रती प्रामाणिक म्हणजे शुध्दाचरणी, आणि घर ना कारभार ले समायणारी, चांगली आणि आपला नवरा ना आधीन राहणारी होवो, एनासाठे कि कोणी परमेश्वर ना वचन नि निंदा नई करी सको.

6तसाच जवान माणसस्ले बी समजाळ्या कर कि सामंजस्य बनोत.

7ह्या सर्व्या गोष्टीस्मा स्वता ले चांगला कामस्ना उदाहरण बनावा. जव तू विश्वासीस्ले शिकाळस, त तुना उपदेश मा कायम साफ गंभीरता ना संगे होवो.

8तुना उपदेश मा कायम सत्य राहो, जेना कण कि तुना विरोधीस्ले आमना बारामा निंदा करानी कोणतीच गोष्ट नई भेटो आणि त्या लज्जित हुई जावोत.

9दासस्ले समजाळ कि त्या प्रत्येक स्थिती मा आपला मालक ना आधीन राहोत, आणि सर्वा गोष्टीस्मा तेस्ले खुश ठेवो आणि परत फिरीसन उत्तर नई देवो, पण तेस्नी आदन्यास्ले मानोत.

10तेस्ना पासून काही चोरी चाकारी नका करा पण स्वता ले विश्वास योग्य साबित करो, अस करावर त्या आपला तारणहार परमेश्वर नि शिक्षा नि शोभा वाळावतीन.

11कारण कि परमेश्वर नि आपली कृपा सर्वा माणसस्ना तारण साठे प्रगट करेल शे.

12परमेश्वर नि कृपा आमले जताळस कि आमी अभक्ति आणि जग ना ईच्छास्ले सोळी देवोत, आणि संयमी, धर्मी, आणि भक्ती कण ह्या जग मा जीवन जगा.

13आणि आमी त्या धन्य दिन नि वाट देखतस जव आशा पुरी हुई जाईन आणि आमना महान परमेश्वर आणि तारणार येशु ख्रिस्त नि महिमा प्रगट हुईन.

14ह्या ख्रिस्त येशु नि स्वता ले आपला साठे दि टाक कि आमले प्रत्येक प्रकार ना अधर्म पासून सोळाई लेवो, आणि शुद्ध करीसन आपली प्रजा बनाई लेवो ज्या चांगला कामस्ले करासाठे तयार राहीन.

15तू ह्या गोष्टीस्ले पुरा अधिकार कण आपला आयकनारस्ले शिकाळ, तेस्ले उत्साहित कर आणि समजाळ. कोणी तुले तुच्छ नको समजा ले पाहिजे.

← Chapter 1 Jump to: Chapter 3 →