Deuteronomy 21

Amharic Dawro DFBE (ጌሻ ማጻፋ) No Year

← Chapter 20 Jump to: Chapter 22 →

1“ህንተ ላታናዳን መና ጎዳይ ህንተ ጾሳይ ህንተንቶ እምያ ጋድያን፥ ኦን ዎደንቶ ኤረና አሃይ ኩንዲደ ቤቶፐ፥

2ህንተ ዳናቱነ ህንተ ጭማቱ ቢደ፥ ሄዋ ዩሹዋን ደእያ ካታማቱዋፐነ ሄ አሃፐ ግዱዋን ደእያ ሃኮተ ልክኖ።

3ሄዋፐ ጉይያን፥ አሃይ ኩንዴዳሳ ማታትያ ካታማ ጭማቱ፥ ኦሶ ጋካቤና፥ እ ሞርግያን ቃምባራይ ዎቤና ኡሳቶ አክኖ።

4ጎግያ ሃይ ደእያ ጎሸትቤና ሳነ ዘረትቤና ዛንጋራ አፊደ፥ ሄ ኡሳት ሞርጊያ ምርቂደ መንኖ።

5ያቶፐ ሌዊያ ናናይ፥ ቄሳቱ ሄ ሳኣ እትፐ ቢኖ፤ አያዉ ጎፐ፥ ሀዋ ማላ ኢታ ሀይቁዋነ ሞቱዋ ሻኪደ ፕርዳናዉ፥ መና ጎዳይ ህንተ ጾሳይ ባረ ስንን ኦናዉ፥ መና ጎዳ ሱንንካ አንጃናዉ ኡንቱንታ ዶሬዳ።

6ሄዋፐ ጉይያን፥ ሄ አሃይ ኩንዴዳሳ ማታትያ ካታማ ጭማቱ ኡባይ፥ ዛንጋራን ሞርጊያ ምርቂደ ዎዳ ኡሳት ቦላ ባረንቱ ኩሽያ ሜጨቲደ፥ ሀዋዳን ያግኖ፦

7‘ኑ ኩሺ ሀ ሱ ጉስቤና፤ ኑ አይፊካ ሀዋ ኦዳዋ በእቤና።

8አቤት መና ጎዳዉ፥ ኔን ዎዜዳ ነ አሳ፥ እስራኤልያ ማራ፤ ሀ ጌሻ ሱ ነ አሳ ቦላ ናቁዋ ኦደ ፓይዶፓ ያግኖ’። ሄ ሱ ድራዉ፥ ኡንቱንቶ አቶ ጌተታና።

9ህንተ መና ጎዳ አይፍያ ስንን ሄዋዳን ኦደ፥ ጌሻ ሱይ ጉኬዳ ናጋራ ህንተ ግዶፐ ድግተ።

10“ህንተ ሞርክያና ህንተ ኦለታናዉ ከስና፥ መና ጎዳይ፥ ህንተ ጾሳይ፥ ኡንቱንታ ህንተ ኩሽያን አ እምና፥ ኡንቱንታ ኦሞድያ ዎደ፥

11ኦሞደቴዳ አሳ ግዶን እት ማላንቻ ምሽራቶ በኣደ፥ እዞ አሞታደ፥ ማቼ ኡዳናዉ ኮዮፐ፥

12ነ ጎለ አያ፤ እ ሁጲያ ሜዳ፤ እ ጹጉንካ ጭጋ።

13ኦሞደትያ ዎደ ደእያ ማዩዋ ቃራ ድጋደ፥ ነ ሶን ኡታደ፥ ባረ አዎነ ባረ ዳይዉ እት አግና ኩመን ካዮቱ። ሄዋፐ ጉይያን፥ እዞ አካ።

14ያታ ስምና፥ እዝና ደእያዌ ኔና ናሸቼናን ዮፐ፥ አ ባረ ኮዮሳ ባናዳን የዳ አጋ። ኔን እዞ ማቼ ኦደ እትፐ አቄዳ ድራዉ፥ እዞ ሻሉዋን ዛልአናዉ ዎይ ካዉሻናዉ በሰና።

15“እት አሳዉ እ ዶስያነ እጽያ ላኡ ማጫ አሳቱ ደኦፐ፥ ቃይ ሀ ላአቱካ አዉ አቱማ ናናቱዋ የሌዳዋንታ ግድሽን፥ ባይራ የለቴዳዌ ሀ እጽያ ማጫ ምሽራትፐ የለቴዳዋ ግዶፐ፥

16ባረ ናናዉ ባረ አቁዋ እ ላትስያ ዎደ፥ እ እጽያንፐ የለቴዳ ባይራይ ደእሽን፥ እ ዶስያንፐ የለቴዳ ቴፋ ባይራያናዉ በሰና።

17ሀራ ናናዉ እምያዋፐ ላኡ ኩሽያ አ እምያዋን ሀ እጽያን ናአይ ባይራ ግድያዋ ኤርሳናዉ በሰ። አያዉ ጎፐ፥ ሄ ናአይ አዉ ኩሽያ ገድያ ጳልቄዳ ባይራ ግድያ ድራዉ፥ ባይራቱዋ እ አካናዉ በሰ።

18“አዎነ አትዉ አዛዘተናን እጼዳ፥ ኡንቱንቱ ሴርናካ ስመና ሞርግያ ዞዳነ ማካላንቻ ግዲደ ስመና ናእ ደኦፐ፥

19አዉነ አታ ሄ ካታማ ፐንግያን ደእያ ጭማቱዋኮ አ ኦይቂ አክ አህኖ።

20ጭማቶ ሀዋዳን ያግኖ፤ ‘ሀዌ ኑ ናአይ ሞርግያ ዞዳነ ማካላንቻ፤ እ ኑዉ ሙለካ አዛዘተና፤ ሚሻ ላል ካእያዋነ ኡሻንቻ’ ያጊደ ኦድኖ።

21ሄዋፐ ጉይያን፥ ሄ ካታማን ደእያ አቱማ አሳይ ኡባይ እ ሀይቃና ጋካናዉ፥ ሹቻን ጫዲደ አ ዎኖ። ሄዋዳን ኦያዋን ህንተ ግዶፐ ኢታ ይስተ። ያቶፐ እስራኤልያ ኡባይ ሄዋ ስሲደ ያያና።

22“እት አሳይ ሀይቁዋ ፕርድስያ ዳባ ኦና፥ ህንተ አ ምን ካቂ ዎፐ፥

23ሄ ካቀቴዳ ምን አ አሃይ አቆፖ፤ አ ሄ ጋላስ ሞግተ። አያዉ ጎፐ፥ ም ቦላን ካቀት ሀይቂያ ኦንነ ጾሳን ሸቀቴዳዋ። መና ጎዳይ ህንተ ጾሳይ ህንተንቶ ላታ ኦደ እምያ ህንተ ቢታ ህንተ ቱንሶፕተ።

← Chapter 20 Jump to: Chapter 22 →