Deuteronomy 34

Amharic Dawro DFBE (ጌሻ ማጻፋ) No Year

← Chapter 33 Jump to:

1ሙሴ ሞኣባ ደምባፐ ደንዲደ፥ ናቦ ደርያ ሁጲያ፥ ቃይ ያርኮፐ አዋይ ዶልያ ባጋና ደእያ ፕስጋ ደርያ ሁጲያ ጋኬዳ። ሄዋን መና ጎዳይ ዳና ጋካናዉ ደእያ ጋላኣደ ቢታ፥

2ንፍታሌማ ቢታ ኡባ፥ ኤፍሬማነ ምናሰ ቢታ፥ አዋይ ዉልያ ባጋና ቢደ ሜድተራነ አባ ጋካናዉ ደእያ ይሁዳ ቢታነ

3ገድሳ ባጋና ጾኣራፐ ደንዲደ፥ ዛምባይ ደእያ እያርኮ ካታማ፥ ዛንጋራን ደእያ ደምባ ኡባ በሴዳ።

4መና ጎዳይ ሙሳ ሀዋዳን ያጌዳ፤ “አብራሃመዉ ይሳቃዉነ ያቆባዉ፥ ‘ታን ህንተ ዛርያዉ እማና’ ያጋደ ጫቄዳ ቢታይ ሀዋ። ሀእ ኔን ነ አይፍያን በአናዳን ታን ኦድ፤ ሽን ኔን ያ ፕናካ” ያጌዳ።

5መና ጎዳ ቆማ ሙሴ መና ጎዳይ ጌዳዋዳን፥ ሄዋን ሞኣባ ጋድያን ሀይቄዳ።

6መና ጎዳይ ቤት-ፓኦራ ካታማፐ ስን ባጋን ሞኣባ ዛንጋራን አ ሞጌዳ፤ ሽን ሀች ጋካናዉ፥ እ ሞገቴዳ ሳኣ ኤርያ አሳይ ባዋ።

7ሙሴ ሀይቂያ ዎደ፥ አ ላይይ ጼታነ ላታማ፤ ሽን አዉ አይፊ እጽቤና፤ አ ዎልቃይካ እጽቤና።

8እስራኤልያ አሳይ ሞኣባ ደምባን ሀታሙ ጋላሳ ሙሴዉ ዬኬድኖ። ሄዋፐ ጉይያን፥ ሙሴዉ ዬክያነ ካዮትያ ዎዲ ዉሬዳ።

9ኔዌ ናአይ ኢያሱ አዳ ኤራተ አያናን ኩሜዳ፤ አያዉ ጎፐ፥ ሙሴ ባረ ኮታን እ ኦናዳን፥ አ ቦላ ባረ ኩሽያ ዎዳ። እስራኤልያ አሳይ ኢያሱዉ አዛዘቴዳ፤ መና ጎዳይ ሙሴ ባጋና እሜዳ አዛዙዋካ ናጌዳ።

10መና ጎዳይ ሶምኡዋን ዱማዪደ ኤሬዳ ሙሴ ማላ ትምቢትያ ኦድያ አሳይ እስራኤልያን ሙለካ ደንድቤና።

11መና ጎዳይ ሙሳ ግብጼ ካትያኮ፥ አናና ኦያ ካፓቱዋኮነ ኩመን አሳኮ የዲደ፥ አ ባጋና ኦራባነ ማላልስያባ ኡባ ኦዳ፥ ሙሴ ማላ ትምቢትያ ኦድያ ሀራ አሳይ ኦንነ ባዋ።

12እስራኤልያ ኡባ ስንን ዎልቃማ ዎልቃን ማላልስያባ ኦዳ ሙሴ ማላ አሳይ ኦንነ ባዋ።

← Chapter 33 Jump to: