Deuteronomy 25

Amharic Dawro DFBE (ጌሻ ማጻፋ) No Year

← Chapter 24 Jump to: Chapter 26 →

1“ላኡ አሳቱ ዋላቀቲደ ፕርዳ ጎልያ ዮፐ፥ ዳናቱ ጌሻ ነ ልከ ጊደ፥ ናቄዳዋ ነ ባይዛንቻ ጊደ ፕርድኖ።

2ባይዛንቻይ ዋ በስያዋ ግዶፐ፥ ትራን ግስሲደ ዞክያ ሾጫናዉ ዳናይ አዛዞ፤ ያቶፐ ባይዛንቻይ ዳና ስንን ባረ ባይዙዋ ኬና ሾጨቶ።

3እ ኦይታሙዋ ጋካናዉ ሾጨቶፐ አትና፥ ሄዋፐ ዳሩዋ ሾጨቶፖ። ሄዋፐ ዳሩዋ አ ሾጮፐ፥ ነ እሻይ ነ ስንን ካዉሻና።

4“ኡዱማን ካ የያ ቦራ ዶና ቃቾፓ።

5“እትፐ ደእያ እሻቱዋፐ እቱ ናኣ የለናን ሀይቆፐ፥ አ ማቻታ ሀራ ባደ ገሉፑ፤ እዝ አስና እሻይ እዞ አኮ፤ እዝዉ ኮሽያዋ ፖሎ።

6ያቶፐ ሀ ሀይቄዳዋ ሱንይ እስራኤልያፐ ፕተት የናዳን፥ አ ኮይሮ የልያ አቱማ ናአይ ሀ ሀይቄዳዋ ሱንን ጼገቶ።

7“ግዶ ሽን፥ እ ባረ እሻ ማቻቶ አካናዉ ኮያና ዮፐ፥ እዛ ካታማ ፐንግያን ኡቴዳ ጭማቱዋኮ ባደ፥ ‘ታ አስና እሻይ ባረ እሻ ሱንይ እስራኤልያን ደአናዉ ኮይቤና፤ ታና አኪደ፥ ታዉ ኮሽያዋ ኩንናን እጼዳ’ ያጋደ ማጋኑ።

8ካታማ ጭማቱ አ ጼጊደ ኦችኖ፤ ሀእካ፥ ‘ታን እዞ አክከ’ ጊደ እጾፐ፥

9ሄ ሀይቄዳዋ ማቻቶ ጭማቱዋ ስንን አኮ ሺቃደ፥ አ ገድያ ጫማፐ እቱዋ ከሳደ፥ አ ሶምኡዋን ጩቻ ጩቻደ ሀዋዳን ያጉ፤ ‘ባረ እሻዉ ዘረይ ደአናዉ ኮየና አሳ ቦላ፥ ሀዋ ማላ ካዉሻይ ጋካናዉ በሴ’ ያጉ።

10አ ዛሪ እስራኤልያን፥ ‘ጫማ ከሴዳዋንቱ ሶያ’ ጌተት ጼገቲደ ደአና።

11“ላኡ አሳቱ ዋትሽን፥ እቱዋ ማቻታ ያደ፥ ባረ አስና ሾጭያዋ ኩሽያፐ አሻናዉ፥ ባረ ኩሽያ የዳደ ህንኩዋ አቱማተ ኦይቆፐ፥

12እዝዉ አይነ ቃረተናን እ ኩሽያ ቃንጽተ።

13“ነ ኬሻ ግዶን ዴጾነ ካዉሻ ግዴዳ ላኡ ሚዛናቱ ደኦፕኖ።

14ነ ሶን ዳርሲደነ ጉደ ልክያ ላኡ ማክያባይ ደኦፖ።

15መና ጎዳይ ነ ጾሳይ ነዉ እምያ ጋድያን አዱሳ ላይ ነ ደአናዳን ኩመንነ ልከ ሚዛናይነ ማክያባይ ነዉ ደኦ።

16አያዉ ጎፐ፥ መና ጎዳይ ነ ጾሳይ ሄዋ ማላባ ኦደ፥ ባለያ አሳ ኡባ ሻቴ።

17“ህንተ ግብጼፐ ከሲደ ቢደ ደእሽን፥ አማሌቃቱ ህንተ ቦላ ኦዳዋ ሀሳይተ።

18ኡንቱንቱ ጾሳዉ ያየና አሳ፤ ህንተ ኦግያን ህንተናና ኤቀቴድኖ። ህንተ ሄመትሽን፥ ዳቡሪደ ጉየ አቴዳ አሳ ኡባ ዎድኖ።

19ሄዋ ድራዉ፥ መና ጎዳይ ህንተ ጾሳይ ህንተና ሄ ቢታ ላትሲደ፥ ህንተ ዩሹዋን ደእያ ሞርከቱዋ ኡባፐ ህንተና ሸምፕስያ ዎደ፥ ሀ ጋድያን ኡንቱንታ ሀሳይያ አሳይ ያና ጋካናዉ፥ አማሌቃቱዋ ኡባ ሳሉዋ ጉፋንፐ ይስተ፤ ሄዋ ኦናዋ ሙለካ ዶጎፕተ።

← Chapter 24 Jump to: Chapter 26 →