Proverbs 1

Amharic Dawro DFBE (ጌሻ ማጻፋ) No Year

Jump to: Chapter 2 →

1ሀዋንቱ እስራኤልያ ካትያ ዳዊታ ናኣ ሶሎሞና ሌምሳቱዋ።

2ሌምሶቱ አሳይ አዳ ኤራተ፥ ሴራነ ኤራ ሃሳያ አኬካናዉ ማዲኖ።

3ኡንቱንቱ አዳ ኤራተን፥ ደአና ደኡዋ፥ ጽሎተ፥ ሱረ ፕርዳነ ሱረተ ታማርስያዋንታ፥

4ቦዛቶ አኬካ፥ ዎዳላቶ ኤራተነ ዎዛናማተ እምያዋንታ።

5አዳ ኤራንቻቱ ሀ ሌምሳቱዋ ስሲደ፥ ኤራ ጉጂኖ፤ አኬካንቻ አሳቱካ ሎኦ ዞርያ አኪኖ።

6ሄዋዳን ሌምሳቱዋነ ኡንቱንቱ ብለ፥ አዳ ኤራንቻቱዋ ሃሳያነ ኡንቱንቱ ቃንእሸቱዋ አኬካናዉ ዳንዳየቴ።

7አዳ ኤራተዉ ዶመይ መና ጎዳዉ ያይያዋ፤ ሽን ቦዛቱ አዳ ኤራተነ ሴራ ካኖ።

8ታ ናአዉ፥ ነ አቡ ዞርያ ስሳ፤ ነ ዳያ ታማርስያዋካ ዶጎፓ።

9ሄዌ ነ ሁጲያዉ ቦንቾ ካላቻ፤ ነ ቆያዉካ ሀብልያ ግዳናዋ።

10ታ ናአዉ፥ ኔና ናጋራንቻቱ ባለፐ፥ ኤኖ ጎፓ።

11ኡንቱንቱ ኔና፥ “ኑናና ደንዳ፤ አሳ ዎናዉ ቆሰቲደ ናጎይተ፤ ጋሱ ዮፐነ ጽሎቱዋ ዎናዉ ቆሰት ኡቶይተ፤

12ስኦሊ ምትያዋዳን፥ ኑንካ ኡንቱንታ ፓጻ ደእሺና ምቶይተ፤ ኑን ኡንቱንታ ጪሞ ኦላን ኦልያ አሳቱዋዳን ኦና።

13ኑን አልኦ ሚሻ ኡባ ደማና፤ ኑ ጎልያካ ኦሞዱዋን ኩንና፤

14ኑናና ዙፐቱዋን፤ ደሜዳዋካ እትፐ ግሸታና” ያጋና።

15ታ ናአዉ፥ ኡንቱንቱና ኦግያ ሀመቶፓ፤ ነ ገድያ ኡንቱንቱ ሎሱዋ የሶፓ።

16አያዉ ጎፐ፥ ኡንቱንቱ ኢታባ ኦናዉ ዎጺኖ፤ አሳ ሱ ጉሳናዉ ኤሌሊኖ።

17ካፉ ጼልሽን፥ አ ኦይቃናዉ ዳባ የግያዌ አይነ ማደና።

18ሽን ኡንቱንቱ ባረንቱ ሱ ጉሳናዉ ባረንቶ ዎጽማድያ ምጪኖ፤ ባረንቱ ሸምፑዋ ዎናዉ ቆሰት ኡቲኖ።

19ቦንቂያን ጎኣ ደምያ ኡባቱዋ ዉርሰይ ሄዋ ማላ፤ ሄዌ እዛዉ ሸምፑዋ አኬ።

20አዳ ኤራተታ ኦግያን ጼሳዉ፤ ጉታራን ባረ ቃላ ቁ ኦደ ስሳዉ።

21አዳ ኤራተታ አሳይ ሺቅያ ሳኣን ኤቃደ ጼሳዉ፤ ካታማ ገልያ ፐንግያን ኤቃደ፥

22“ህንተኖ፥ አኬካይ ፓጬዳዋንቶ፥ ህንተ አኬካ ፓጫ አዉደ ጋካናዉ ዶሲቴ? ቅሊጭያዋንቶ፥ ቅሊጭያዋን አዉደ ጋካናዉ ናሸቲቴ? ቦዛቶ፥ ኤራተ አዉደ ጋካናዉ እጺቴ?

23ታ ሴራኮ ስሞፐ፤ ታን ታ ኤራ ህንተ ቦላ ጉሳና፤ ታ ቃላካ ህንተና ታማርሳና።

24ታን ጼሴዳ ዎደ፥ ህንተ ኮየናን እጼድታ፤ ታን ኩሽያ ምጭናካ፥ ኦንነ አኬክቤና።

25ታ ዞርያ ኡባ ካድታ፤ ታ ሴራካ አክበይክታ።

26ሄዋ ድራዉ፥ ህንተና መቱ ጋክያ ዎደ፥ ታን ህንተ ቦላ ሚጫና፤ ህንተና ባሻይ ጋክያ ዎደ፥ ታን ቅሊጫና።

27ዳጋማይ ኡሹዋዳን ህንተ ቦላ ይያ ዎደ፥ መቱ ጎትያዳን ህንተ ቦላ ይያ ዎደ፥ ቱጋይነ ዋዪ ህንተ ቦላ ጋክያ ዎደ፥ ታን ህንተና ቅሊጫና።

28“ሄ ዎደ ኡንቱንቱ ታና ጼሳና፤ ሽን ታን ኮይከ፤ ኡንቱንቱ ታና ምንሲደ ኮያና፤ ሽን ደምክኖ።

29አያዉ ጎፐ፥ ኡንቱንቱ ኤራተ እጼድኖ፤ መና ጎዳዉ ያይያዋ ዶርበይክኖ።

30ታ ዞርያ አክበይክኖ፤ ታ ሴራ ኡባካ ካድኖ።

31ሄዋ ድራዉ፥ ኡንቱንቱ ባረንቱ ኦዳ ኦሱዋ አይፍያ ማና፤ ባረንቱ ቆፔዳ ቆፋ አይፍያካ ካላና።

32አኬካይ ፓጬዳዋንታ አዳ ኤራተፐ ሃክያዌ ዎ፤ ቦዛቱዋ ሸነኮ ግያዌ ይሴ።

33ሽን ታን ኦድያዋ ስስያዋንቱ ኡባይ ዎፑ ጊደ፥ ሳሮ ደአና፤ መቱዋ ህርጋፐካ ሸምፓና” ያጋዉ።

Jump to: Chapter 2 →