Proverbs 3

Amharic Dawro DFBE (ጌሻ ማጻፋ) No Year

← Chapter 2 Jump to: Chapter 4 →

1ታ ናአዉ፥ ታን ኔና ታማርስያዋ ዶጎፓ፤ ታ አዛዞቱዋካ ነ ዎዛናን ዎ።

2አያዉ ጎፐ፥ ኡንቱንቱ ነ ላይ አዱሳና፤ እሻሎ ደኡዋነ ሳሮተ ነዉ ጉጃና።

3አገና ሲቁነ ቱማተይ ኔፐ ሃኮፕኖ፤ ኡንቱንታ ነ ቆያን ቃቻ፤ ነ ዎዛናንካ ኡንቱንታ ጻፋ።

4ያቶፐ፥ ኔን ጾሳነ አሳ ስንን ሳበታናነ ናሸታና።

5ነ ፖሎ ዎዛናን መና ጎዳ አማነታ፤ ነ አኬካን ዘምፖፓ።

6ኔን ኦያ ኦሱዋ ኡባን አ ስንያ፤ እ ኔና ሱረ ኦግያ ካለና።

7ኔና ነ ሁጲያን አዳ ኤራንቻ ከሶፓ፤ መና ጎዳዉ ያያ፤ ኢታፐካ ሃካ።

8ሄዌ ነ ቦላ ፓጻ ዎና፤ ነ መቀካ ምንሳና።

9መና ጎዳ ነ ዱረተን ቦንቻ፤ ኮይሮ አይፌዳ ካ ኡባፐካ ጼራ አዉ እምያዋን አ ቦንቻ።

10ያቶፐ፥ ነ ዬሰቱዋን ካይ ኩማና፤ ነ ባካ አይፈ ዎይንያ ኤሳይ ኩሚደ ፓላሀና።

11ታ ናአዉ፥ መና ጎዳ ሴራ ካፓ፤ እ ኔና ሴርያ ዎደካ ላንጮፓ።

12አያዉ ጎፐ፥ አዉ ባረ ሲቅያ ናኣ ሴርያዋዳን፥ መና ጎዳይ ባረ ዶስያ ኡራ ሴሬ።

13አዳ ኤራተ ደምያ ኡራይ፥ አኬካካ ባረዋ ኦያ ኡራይ አንጀቴዳዋ።

14አያዉ ጎፐ፥ አፐ ደምያ ጎአይ ዎርቃፐነ ብራፐ ደምያ ጎኣፐ አነ ኬኬ።

15አዳ ኤራተይ እንቁዋፐ ሎይ አልኤ፤ ኔን ደማናዉ አሞትያ ኡባይ አዳ ኤራተና ልከተና።

16አዳ ኤራተይ ነ ላይ አዱሴ፤ እ ነዉ ዱረተነ ቦንቹዋ ጉጄ።

17አ ኦገቱ ናሸችያ ኦገቱዋ፤ አ ሎሱዋ ኡባይካ ሳሩዋ።

18እ ባረና ኦይቂያዋንቶ ደኡዋ ም፤ አ ምንስ ኦይቂያ ኡባቱካ አንጀቴዳዋንታ።

19መና ጎዳይ ባረ አዳ ኤራተን ሳኣ መዳ፤ ባረ አኬካንካ ሳሎቱዋ ምንሴዳ።

20አ ኤራተን ሻፋቱ ጎጊኖ፤ ሻራቱዋፐካ እራይ ቡኬ።

21ታ ናአዉ፥ ሎኦ አዳ ኤራተነ አዱስ ቆፕያዋ ናጋ፤ ኡንቱንቱ ኔፐ ሻከቶፕኖ።

22ኡንቱንቱ ነዉ ደኡዋ ግዳና፤ ኡንቱንቱ ነዉ እሻሉዋነ ናሸቻ ደኡዋ እማና።

23ሄ ዎደ ኔን ነ ኦግያን ህርግ ባይናን ሀመታና፤ ነ ገዲካ በተና።

24ኔን ግሴዳ ዎደ፥ ያያካ፤ ግሳደካ ማልኦ ገምእሹዋ ገምእሻና።

25አኬከናን ጋክያ ባሻዉ፥ ዎይ ኢታቱ ይያ ዮ ያያካ።

26አያዉ ጎፐ፥ መና ጎዳይ ነዉ አማነትያዋ ግዳና፤ ነ ገዲካ ጲርያን ኦይቀተናዳን፥ እ ኔና ናጋና።

27ነዉ ዎልቃይ ደእሺና፥ መቶቴዳዎ ሎኦባ ኦያዋ አጎፓ።

28ሀእ ነዉ ደእሺና፥ ነ ሾሮ፥ “ስማደ ያ፤ ታን ነዉ ዎንት እማና” ያጎፓ።

29ኔናን አማነቲደ፥ ነ ማታን ደእሺና፥ ነ ሾሩዋ ቦላ ኢታባ ኦናዉ ቆፖፓ።

30ኔና ናቂቤና አሳ፥ ጮ ሞቶፓ።

31ሱገ ኦያ አሳቱዋ ቁሎፓ፤ ኡንቱንቱ ኢታ ኦሱዋካ ካሎፓ።

32አያዉ ጎፐ፥ መና ጎዳይ ኢታ ኦያዋንታ እጼ፤ ሽን ሱረቱዋ እ ኡሎፐ ሲቄ።

33መና ጎዳ ሸቃይ ኢታ ኦያዋንቱ ሶይና፤ ሽን አ አንጁ ሱረባ ሀንያዋንቱ ሶይና።

34ኦቶረቲደ ቅሊጭያዋንታ ጾሳይካ ቅሊጬ፤ ሽን ባረንታ ካዉሽያዋንታ ናሼ።

35አዳ ኤራንቻቱ ቦንቹዋ ደማና፤ ሽን ቦዛቱ ካዉሻና።

← Chapter 2 Jump to: Chapter 4 →