Proverbs 8

Amharic Dawro DFBE (ጌሻ ማጻፋ) No Year

← Chapter 7 Jump to: Chapter 9 →

1ቱሙ አዳ ኤራተታ ጼሰኬ? አኬካይካ ባረ ቃላ ቁ ኦኔ?

2ኦግያ ዶናን ደእያ ዞዘቱዋ ቦላነ ኦገቱ ዳንትያሳን እዛ ኤቃዉ፤

3ድርሳ ፐንግያ ማታን፥ ካታማ ገልያ ፐንግያን ኤቃደ፥ ባረ ቃላ ቁ ኦደ፥ ሀዋዳን ያጋዉ፤

4“ህንተኖ አሳቶ፥ ታን ህንተና ጼሳይ፤ ታን አሳ ኡባ ጼሳይ።

5ህንተኖ አኬካይ ፓጬዳዋንቶ፥ ሂላ ደማናዉ ታማርተ። ህንተኖ ቦዛቶ፥ አኬካ ደምተ።

6ታን ዳሮ ሎኦባ ኦድያ ድራዉ ስስተ፤ ታን ሱረባ ኦዳናዉ ታ መተርሻ ዶያይ።

7ታ ዶናይ ቱሙዋ ሃሳዬ፤ ታ መተርሻይ ዎርዶባ እጼ።

8ታ ዶናይ ሃሳይያዌ ኡባይ ቱማ፤ ጌላ ዎይ ምርቀ ግደና።

9አኬካይ ደእያ ኡራዉ ታ ሃሳያይ ልከ፤ ኤራይ ደእያዋንቶ ታ ሃሳያይ ቆንጨ።

10“ብራ አጊደ፥ ታ ዞርያ ዶርተ፤ በርተ ዎርቃካ አጊደ፥ ኤራተ ዶርተ።

11አያዉ ጎፐ ታን፥ አዳ ኤራተታ፥ እንቁዋ ግያ ዳሮ አልኦ ሹቻፐካ አይ፤ ኔን አሞትያዌ ኡባይካ ታናና ላገታናዉ ዳንዳየና።

12“ታዉ፥ አዳ ኤራተትዉ አኬካይ ደኤ፤ ኤራተይካ አዱሳ ቆፋይካ ታናና እትፐ ደኢኖ።

13መና ጎዳዉ ያይያዌ ኢታተ እጽያዋ፤ ታን ኦቶሩዋነ አዩዋ እጻይ፤ ኢታሳ አፍያ ኦግያነ ዎርዱዋ ሃሳያ ዶስከ።

14ዞሪነ ሎኦ ኤራይ ታዋንታ፤ አኬካይነ ዎልቃይነ ታዉ ደኢኖ።

15ካተቱ ታናን ካዉቲኖ፤ ቃይ ሞድያዋንቱ ሱረ ህግያ ታናን ከሲኖ።

16ካፓቱ ታን ማድና፥ አሳ ሞድኖ፤ ሳኣን ጋድያ ሞድያ ዎልቃማ አሳቱዋ ኡባካ ታን ማዳይ።

17“ታን ታና ሲቅያዋንታ ሲቃይ፤ ታና ምንሲደ ኮይያዋንቱካ ደማና።

18ዱረተይነ ቦንቹ ታናና ደኢኖ፤ ዉረና አቁነ እንጂ ታ ማታና።

19ህንተ ታፐ ደምያ አይፊ በርተ ዎርቃፐነ ታ ጫርሻይ ሙሽስ ከሴዳ ብራፐ አ።

20ታን ጽሎተ ኦግያን ሀመታይ፤ ሱረ ፕርዳ ሎሱዋና አይ።

21ታና ሲቅያዋንቶ ታን ማጹዋ እማና፤ ኡንቱንቱ ጎልያካ ታን ሚሻን ኩንና።

22“መና ጎዳይ ታና ባረ ኦሱዋ ኡባፐ ኮይሮ መዳ፤ በንፐካ አ ኦሶ ዶመይ ታና።

23በን ዎደ፥ ቢታይ ሳአይ መታናፐ ካሰ ታን ሱንታድ።

24ዎልቃማ አባቱ ባይና ዎደ፥ ሃ ፑልቶቱ እቤና ዎደ፥ ሄ ዎደ ታን የለታድ።

25ደረቱነ ደቱ መታናፐ ካሰ ታን የለታድ።

26መና ጎዳይ ሳኣነ ሳኣን ደእያ ጋደቱዋ ኡባ መናፐ ካሰ፥ ዎይ እት ኮጰ ግድያ ባናይ አላምያን ኦሰታናፐ ካሰ ታን የለታድ።

27“መና ጎዳይ ሳሎቱዋ ምጬዳ ዎደነ ዎልቃማ አባቱዋፐ ቦላና ደእያ ሳሉዋ ጊግሴዳ ዎደ፥ ታን ያን ደአይ።

28መና ጎዳይ ሻረቱዋ ቦላን ዎዳ ዎደ፥ ዎልቃማ አባ ፑልቶቱዋ ሴዳ ዎደ፥

29አባ ሃቱ ባረንቶ እመቴዳ ዛዋፐ ፕኒደ፥ ቦላዉ አናዳን፥ እ ኡንቱንታ አዛዜዳ ዎደ፥ ሳኣ ባሱዋ እ ባሴዳ ዎደ፥ ታን ያን ደአይ።

30ሄ ዎደ ታን አ ማታን ኤረቴዳ ኦሳንቻ፤ ኡባ ጋላስ ታን ናሸቻን ኩማይ፤ ታዉካ አ ስንን ናሸታይ።

31እ መዳዌ ኡባይ፥ ሳአይካ አሳ ናናቱካ ታና ናሸቺኖ።

32“ሀእካ ስም ታ ናቶ፥ ስስተ፤ ታን ኦድያዋዳን ኦያዋንቱ አንጀቴዳዋንታ።

33ታ ትምርትያ ስስተ፤ አዳ ኤራንቻ ግድተ፤ ስሴዳዋ ሸነኮ ጎፕተ።

34ታና ስስያ ኡራይ፥ ሀች ሀች ታ ፐንገን ቤትያ ኡራይ፥ ታ ጎለ ገልያሳንካ ናግያ ኡራይ አንጀቴዳዋ።

35ታና ደምያዌ ደኡዋ ደሜ፤ መና ጎዳፐ እ ሳባ ደሜ።

36ሽን ታና ደመናን አግያ ኡራይ ባረና ቆሄ፤ ታና እጽያ ኡባቱ፥ ሀይቁዋ ሲቂኖ” ያጋዉ።

← Chapter 7 Jump to: Chapter 9 →