Psalms 102

Amharic Gamo (ጋሞ ማጻፋ)

← Chapter 101 Jump to: Chapter 103 →

1ኣቤት ጎዳዉ! ታ ዎሳ ሲያ፤ ታ ዋሶይ ኔኮ ጋኮ።

2ታ ሜቶቲዳ ጋላስ ኔ ሲን ታፔ ጌንፋ፤ ኔ ሃይ ታኮ ዛራ፤ ታኒ ኔኮ ዋሲዛ ዎዴ ታስ ኤሶን ኣላ።

3ኣይስ ጊኮ ታ ላይይ ጩዋ ማላ ዬስ፤ ታ ሜቄይካ ታማ ቦንቆ ማላ ኤጼስ።

4ታ ዎዚናይ ኣዋይ ላቢዳ ማታ ማላ ሃንዴስ፤ ታስ ቆይ ካ ኢጺዴስ።

5ታስ ኦሌ ዳሮፔ ዴንዶይሳን ሜቄ ጻላ ኣቲዴስ።

6ታኒ ባዞን ዲዛ ቢያ ካፎ ዎይኮ ላሌቲዳ ኬን ዴኢዛ ጉቶ ማላ።

7ታኒ ኢቺን ስኮይ ዬና፤ ታኒ ኬ ሁኤን ባርካ ኡቲዳ ካፎ ማላ ጊዳዲስ።

8ታ ሞርኬቲ ኡባ ጋላስ ታና ጫዬቴስ፤ ታና ኢሴዛይቲ ታ ሱን ቃንጌቲዳ ማላ ቆዲዳ።

9ታኒ ቢዲን ሌ ማላ ቃምኣዲስ፤ ታ ኣፉንካ ኡሻራ ዋላካ ኡያዲስ።

10ኔ ሃንቆ ጋሶኒኔ ኔ ቦሻ ጋሶን ኔ ታና ፑዴ ዴንሶፔ ዱጌ ኦላዳሳ።

11ታ ዴኦ ላይይ ኦማርሳ ዎዴ ኩዋ ማላ፤ ታኒ ማታ ማላ ሜላዲስ።

12ጊዶ ኣቲን ኣቤት ጎዳዉ! ኔኒ ካዎቴ ኣራታን ሜርናስ ኡታዳሳ፤ ኔ ሱንይካ ዬሌታፔ ዬሌታ ጋካናስ ሃሳኤታና።

13ኔኒ ጺዮኒስ ኪያቴ ኦዛ ዎዴይ ጋኪዳ ጊሻሲኔ ዎዴዚካ ሃኢ ጊዲዳ ጊሻስ ኔኒ ዴንዳዳ ኢዚስ ቃታና።

14ኔ ኦሳንቻቲ ኢዛን ዲዛ ሹቻታ ዶሴቴስ፤ ቡቲዳ ቢታስካ ቃቴቴስ።

15ካዎቴቲ ጎዳ ሱንስ ያያና፤ ሳኣ ካዎቲ ኡባይ ኢዛ ቦንቻና።

16ጎዳይ ጺዮኖ ዛሪ ኤሲዛ ዎዴ ኢዚ ባ ጊታቴ ቤሳና።

17ኢዚ ሂዬሳታ ዎሳ ሲያና፤ ኢስታ ሾቤካ ካና።

18ቡሮን ዬሌታናይ ጎዳ ጋላታና ማላ ሃይሲ ዪዛ ዬሌታስ ጻፌቶ።

19ጎዳይ ቃን ዲዛ ባ ጌሻ ሶሆፔ ዱጌ ጼሊዴስ፤ ኢዚ ሳሎፔ ዱጌ ሳኣ ቤኢዴስ።

20ሄሲካ ቃሼቲዳ ኣሳታ ዋሶ ሲያናሲኔ ሃይቆስ ፒርዴቲዳ ኣሳታ ቃሾፔ ቢርሻናሳ።

21ሄሳ ጊሻስ ጎዳ ሱን ጺዮኒን ዮቴታና፤ ኢዛ ጋላታይ ዬሩሳላሜን ኣዋጄታና።

22ዴሬቲኔ ካዎቲ ኢሲፌ ሺቂዲ ጎዳስ ሄ ዎዴ ጎይናና።

23ታኒ ናቴቴን ዲሺን፥ ኢዚ ታ ሚኖቴ ኦጌን ኣሺዴስ፤ ታ ዳና ላይካ ቃንዴስ።

24ሂስቲን ታኒ፥ «ኣቤት ታ ጾሳዉ! ታኒ ዳና ላይ ቡሮ ባጋሲሺን ኔ ታና ኤኮፋ። ኣቤት ጎዳዉ! ኔኒ ዬሌታፔ ዬሌታ ጋካናስ ዳሳ» ጋይስ።

25ኔኒ ቤኒ ሳኣ ሜዳሳ፤ ሳሎቲካ ኔ ኩሼ ኦሶ።

26ሄይቲ ኡባይ ያና፤ ጊዶ ኣቲን ኔኒ ሚና ዳና፤ ኢስቲ ኡባይካ ኣፋላ ማላ ዉራና፤ ኔኒ ኢስታ ጫርቃ ማላ ላማና፤ ኢስቲካ ኣና።

27ጊዶ ኣቲን ኣዉዴካ ኔኒ ኔና፤ ኔ ላይይ ሙሌካ ዉሬና።

28ኔስ ኦዛይታ ናይቲ ሳሮቴን ዳና፤ ኢስታ ዜሬይካ ኔ ሲንን ሚኒ ኤቃና።

← Chapter 101 Jump to: Chapter 103 →