Psalms 18 — Amharic Gamo (ጋሞ ማጻፋ)

1ኣቤት ጎዳዉ! ኔ ታስ ዎልቃ ኢሚዳ ጊሻስ ታ ኔና ሲቃይስ።

2ጎዳይ ታስ ዛላ፤ ታኒ ኦላፔ ናጌቲዛ ሚጻ፤ ኢዚ ታና ኣሺዛይሳ፤ ታ ጾሳይ ታኒ ኢዛን ጌሜታ ኣቲዛ ዎጋ ዛላ። ኢዚ ታስ ጎንዳሌ፤ ኢዚ ታና ኣሺዛ ካጬ፤ ታስ ኢዚ ሚኖ ዜምፖ።

3ጋላታይ ቤሲዛ ጎዳ ታኒ ጼይጋይስ፤ ኢዚ ታ ሞርኬታፔ ታና ኣሼስ።

4ሃይቆ ዎዶሮይ ታና ጩሊዴስ፤ ይሲዛ ዲኦይ ታና ሚቲዴስ።

5ዱፎ ዎዶሮይ ታና ቃቺዴስ፤ ሃይቆ ዎጺማዴይ ታ ሲንን ዋጼቲዴስ።

6ታና ሜቶይ ኡንኢን ጎዳ ጼይጋዲስ፤ «ታና ማዳ» ጋዳ ታ ጾሳስ ዋሳዲስ፤ ኢዚ ባ ኬን ዲሼ ታ ጬንጉርሳ ሲዪዴስ፤ ታኒ ዋሲዳ ዋሶይ ኢዛ ሃይን ዎዴስ።

7ጾሲ ሃንቄቲዳ ጊሻስ ቢታይ ቃጺዴስ፤ ዙማታ ጻጶይ ኮኮሪዴስ።

8ኢዛ ሲፔ ሃንቆ ጩዋይ ጩዋቲዴስ፤ ኢዛ ዶናፔ ሚዛ ታማ ላጮይ ኬዚዴስ፤ ኢዛ ዶናፔ ጹጊዛ ቦንቆይ ፑልቲዴስ።

9ሳሎ ጳልቂዲ ዎዴስ፤ ሄ ዎዴ ኢዛ ቶሆ ጋርሳራ ፒ ጊዳ ሻራይ ዴስ።

10ኪሩቤን ኡቲዲ ፓሊዴስ፤ ጫርኮ ቄፌ ኤኪዲ ፑዴ ዴንዲ ቢዴስ።

11ባና ማን ካሚዴስ፤ ኢዛ ዱንካኔዛ ፒ ጊዳ ኢራራ ሻራይ ዶዲዴስ።

12ኢዛ ሲንን ዴኢዛ ጊታ ፖኦዛፔ ሻቺኔ ዎልቃን ኬኢዴስ፤ ፒ ጊዳ ሻራካ ካን ኬኢዴስ።

13ጎዳይ ዳዳ ማላ ሳሎፔ ጉሚዴስ፤ ኡባፌ ቃ ጾሳይ ባ ጬንጉርሳ ሲሲዴስ፤ ዎልቃንኒኔ ታማ ላጮን ቆንጪዴስ።

14ባ ዎንዳፌዛ ዪሻ ዬዲዴስ፤ ባ ሞርኬታካ ላሊዴስ፤ ዎልቃን ፖኦ ኪቲዲ ኢስታ ዬዴዴስ።

15ኣቤት ጎዳዉ! ኔኒ ሴሪዳ ዎዴኔ ኔ ሃንቆይ ኤጺዳ ዎዴ፥ ጊታ ኣባቲ ኢቺዳ ቢታይ ቤቲዴስ፤ ቃሴ ሳኣ ዮቻይ ቆንጪዴስ።

16ጎዳይ ቦላፌ ባ ኩሼዛ ዱጌ ዬዲዲ ታና ኦይኪዴስ፤ ጪማ ሃፌ ታና ኬሲዴስ።

17ኢዚ ታ ቦላ ዎልቃቲዛ ታ ሞርኬታፔ፥ ታና ኢጺዛይታፔ ኣሺዴስ።

18ታና ሜቶይ ኡንኢዳ ጋላስ ኢስቲ ታ ቦላ ዴንዲዳ፤ ጊዶ ኣቲን ጎዳይ ታስ ዜምፖ ጊዲዴስ።

19ኢዚ ታና ኣሆ ዴምባን ኬሲዴስ፤ ታናን ኡፋዬቲዳ ጊሻስ ታና ኣሺዴስ።

20ታ ጺሎቴ ማላ ጎዳይ ታስ ቃንጺዴስ፤ ታ ኩሼ ጌሻቴ ማላ ኢዚ ታስ ዛሪዴስ።

21ታኒ ጎዳ ኦጌ ካላዲስ፤ ታኒ ታ ጾሳ ኣጋዳ ኢታ ኦቤኬ።

22ታኒ ኢዛ ዎጋ ኡባ ናጋዲስ፤ ኢዛ ኣዛዞዛ ፖላናፔ ጉዬ ጋቤኬ።

23ታኒ ኢዛ ሲንን ሱሬ ዴኣዲስ፤ ታናቴ ናጋራፔ ናጋዲስ።

24ሄሳ ጊሻስ ጎዳይ ታስ ታ ጺሎቴ ማላ ኢሚዴስ፤ ታ ኩሼይ ኢዛ ሲንን ጌሽ ጊዲዳ ማላ ዛሪዴስ።

25ኣቤት ጎዳዉ! ኣማኔቲዛይታስ ኔኒ ኣማኔታሳ፤ ሱሬታስ ኔኒ ሱሬ።

26ጌሻታስካ ኔኒ ጌሻ፤ ጊዶ ኣቲን ጌላታስ ኔኒ ጌላ።

27ኣሽኬታ ኔ ኣሻሳ፤ ጊዶ ኣቲን ኦቶራንቻታ ካዉሻሳ።

28ኣቤት ጎዳዉ! ኔ ታስ ጾምፓሳ፤ ጾሳይ ኔኒ ታስ ማ ፖኢሳሳ።

29ኔ ማዲን ታኒ ታ ሞርኬታ ኦላይስ፤ ታ ጾሳ ዎልቃን ታኒ ኢስታ ጊምቤ ቦላራ ጉፓ ኣይስ።

30ጾሳ ኦጌይ ሱሬ፤ ጎዳ ቃላይ ኣማኔቲዛይሳ፤ ኢዛኮ ባቃቲዛ ኡባታስ ኢዚ ጎንዳሌ።

31ጾሳፌ ኣቲን ሃራ ጾሲ ኦኔ? ኑ ጎዳፔ ኣቲን ሃራ ዛላይ ኦኔ?

32ታስ ዎልቃ ኢሚዛይኔ ታ ኦጌ ሳሮ ኦዛይ ጾሳ።

33ኢዚ ታ ቶሆታ ጌኔሳ ቶሆ ማላ ሚንስ፤ ታና ቃሶሆታን ሳሮቴን ዎስ።

34ኢዚ ታ ኩሼታ ኦላ ታማርሴስ፤ ሄሳ ጊሻስ ታኒ ታ ቄሴን ጻርቂማላ ዎንዳፌዛ ዳፋዳ ዱካይስ።

35ኣሺዛ ኔ ጎንዳሌ ታስ ኢማዳሳ። ኔ ኡሻቻ ኩሼን ታና ዜምፒሳዳሳ፤ ታኮ ዚቂ ጋዳ ታና ጊታሳዳሳ።

36ታ ኦጌ ኣሳዳሳ፤ ሄሳ ጊሻስ ታ ቶሆይ ሃንዳራሺቤና።

37ታ ሞርኬታ ታኒ ዬዴ ኦይካዲስ፤ ታኒ ኢስታ ይሳና ጋካናስ ጉዬ ሲማቤኬ።

38ኢስቲ ናምኣን ዴንዶንታ ማላ ሾጫዲስ፤ ታ ቶሆ ጋርሳንካ ኩንዲዳ።

39ኦላስ ታና ዎልቃ ጊጺሳዳሳ፤ ታ ሞርኬታ ታ ሲንን ጉልባቲሳዳሳ።

40ታ ሞርኬታ ታ ሲንፌ ጉዬ ዛራ ባቃቲሳዳሳ፤ ታና ኢጺዛይታ ታኒ ይሳዲስ።

41ባንታና ማዳና ማላ ዋሲዳ፤ ጊዶ ኣቲን ኦኒኔ ኢስታ ኣሺቤና። ጎዳ ኢስቲ ጼይጊዳ፤ ጊዶ ኣቲን ኢዚ ኢስታስ ኮዪቤና።

42ጫርኮይ ፒቲዲ ኤፊዛ ጉዱላ ማላ ታኒ ኢስታ ኦዲስ፤ ኦጌን ዴኢዛ ኡርቃ ማላካ ኢስታ ዬታዲስ።

43ማካላ ኣሳፔ ታና ኣሻዳሳ፤ ኔ ታና ካዎቴታ ኣይሲዛዴ ሂስታ ሹማዳሳ፤ ታ ኤሮንታ ዴሬይ ታስ ሃሬቲዴስ።

44ታና ኤሮንታ ኣላጋ ዴሬይ ታስ ኣዛዜቴስ፤ ኢስቲ ታ ጎባቴ ሲዪዲ ታስ ዚጌቴስ።

45ኢስቲ ያሻን ካሃ ዬቴስ፤ ባንቲ ናጊዛ ሚጻፔ ኬዚዲ ኮኮሪሼ ታኮ ዬቴስ።

46ጎዳይ ዴኦ ጾሳ! ታ ዜምፒዛ ዎጋ ዛላይ ጋላቴቶ! ታና ኣሺዳ ጾሳይ ቁ ቁ ጎ!

47ኢዚ ታ ሃሎ ኬሲዛ ጾሳ፤ ካዎቴታ ታስ ሃሪሲዛ ጾሳ።

48ታ ሞርኬታፔ ታና ኣሻሳ፤ ኣቤት ጎዳዉ! ኔኒ ታ ሞርኬታ ቦላ ታና ቁ ቁ ሂስታሳ፤ ማካላንቻ ኣሳታፔ ኔኒ ታና ኣሻሳ።

49ሄሳ ጊሻስ ታኒ ኔና ካዎቴታ ሲንን ጋላታና፤ ታኒ ኔ ሱን ዬን ሳባና።

50ጾሲ ባ ካዎዳ ካዎስ ጾኖ ቦላ ጾኖ ኢሜስ። ባ ቲይዳይሳስ ኪያቴ ቤሴስ፤ ዳዊቴሲኔ ኢዛ ዜሬታስ ሜርናስ ሄሳ ኦስ።