Psalms 104

Amharic Gamo (ጋሞ ማጻፋ)

← Chapter 103 Jump to: Chapter 105 →

1ታ ሼምፖዬ! ጎዳ ታ ጾሳ ጋላታ! ኣቤት ጎዳ ታ ጾሳዉ! ኔኒ ኣይ ኬና ጊታ! ኔኒ ቦንቾኔ ቴማ ማይኣዳሳ።

2ኔኒ ኣፋላ ማላ ፖኦ ቁማኣዳሳ፤ ሳሎታካ ዱንካኔ ማላ ቶላዳሳ።

3ኔ ኬ ሳሎ ጉፋን ቦላን ኬጻዳሳ፤ ሻራ ኔስ ፓራ-ጋሬ ኬሳዳሳ፤ ጫርኮ ቄፌ ቶጋዳ ባሳ።

4ኔኒ ጫርኮታ ኔ ኪታንቻ፥ ታማ ላጮካ ኔ ኣይሌ ኬሳሳ።

5ኔኒ ሳኣ ዮቻ ቦላ ኤሳዳሳ፤ ኢዚ ሜሪ ሜርናስካ ቃጼና።

6ዎጋ ጊታ ኣባ ቢታ ቦላን ኣፋላ ማላ ሚጫዳሳ፤ ሃካ ጊታ ዙማታ ካሚዴስ።

7ጊዶ ኣቲን ኔ ሴሪን ሃቲ ኪቺዳ፤ ኔ ኣዛዞ ሲዪዲ ኤሶን ባቃቲዳ።

8ኢስቲ ጊታ ዙማታፔ ዱጌ ሾባታ ዎዳ፤ ኔኒ ኢስታስ ጊግሲዳሶ ጎጊዳ።

9ሃቲ ሲሚዲ ቢታ ካሞንታ ማላ፥ ኢስቲ ኣንታ ማላ ዛዋ ኤሳዳሳ።

10ኔኒ ፑልቶታ ሾባን ፑልቲሳሳ፤ ሃ ዙማታ ጊዶራ ዱጌ ጎጊሳሳ።

11ባዞ ዶኣቲ ኡባይ ኢዛፔ ኡዬቴስ፤ ሃሪዲዳቲካ ሳሞስ ኢዛፔ ኡዪ ኣሌቴስ።

12ሳሎ ካፎቲ ሃ ማታን ባንታ ኬ ኬጼቴስ፤ ሚ ሃጋታ ጊዶንካ ዬጼቴስ።

13ኔኒ ጊታ ዙማታ ቦላን ሳሎፔ ኢራ ቡኪሳሳ፤ ቢታካ ኔ ኩሼ ኦሶ ኣይፌን ኩንዳሳ።

14ኔኒ ሜሄስ ማታ፥ ኣሳስ ካ ሞኪሳሳ፤ ሄሳን ኣሳይ ቢታ ኦዲ ካ ሺሼስ።

15ኣሳ ዎዚና ኡፋይሲዛ ዎይኔ፥ ሲን ሺጪሲዛ ዛይቴኔ ዎልቃ ኢሚዛ ካ ዴሜስ።

16ጎዳ ሚቲ፥ ኢዚ ቶኪዳ ሊባኖሴ ዚጋቲ ዳሮ ኢራ ኡዪ ካሌቴስ።

17ኢስታን ካፎቲ ባንታ ኬ ኬጼቴስ፤ ዚጊሌቲካ ዚጋ ቦላ ኬጺዲ ዴኤቴስ።

18ቃ ዙማታ ቦላን ዉሻቲ ዴኤቴስ፤ ቃሴ ጉፓሌቲ ሹቻ ጎንጎሎን ቆቴቴቴስ።

19ዎዳ ቆዳ ኤሪሳናስ ኔኒ ኣጊና ሜዳሳ፤ ኣርሼይ ባ ዉሊዛ ዎዴ ኤሬስ።

20ኔኒ ማ ኤሂዛ ዎዴ ሳኣይ ቃሜስ፤ ዎራ ዶኣቲካ ኬዚዲ ዎጼሬቴቴስ።

21ዎዳላ ጋሞቲ ማና ሚሻስ ዋሴቴስ፤ ኢስቲ ባንታስ ሚዛ ሚሽ ጾሳፌ ኮዬቴስ።

22ኣርሼይ ሞኪዛ ዎዴ ጉዬ ሲሚዲ ባንታ ኣቆሶን ኢቼቴስ።

23ሄ ዎዴ ኣሲ ባ ኦሶስ ኬዜስ፤ ሳኣይ ቃማና ጋካናስ ኦስ።

24ኣቤት ጎዳዉ! ኔ ኦሶይ ኣይ ኬና ዳሮ! ኔ ኣ ኤራቴን ኔኒ ኢስታ ኡባ ሜዳሳ፤ ኔ ሜዳ ሜታቲ ቢታ ኩሚዳ።

25ሃና ኣባያ ጊታኔ ኣሆ፤ ቆዳይ ባይንዳ ቃጺዛ ሜቴቲ፥ ጉቲኔ ጊታቲ ኢዚን ኩሚዳ።

26ኢዚ ቦላን ማርካቤቲ ሲሜሬቴቴስ፤ ቃሴ ኔኒ ሜዳ ሌዋታኔ ጌቴቲዛ ሚሚንቴይ ኢዚን ካኤስ።

27ኮሺዛ ዎዴ ኔ ኢስታስ ሚዛዝ ኢማና ማላ ኢስቲ ኡባይ ኔኮ ጼሌቴስ።

28ኔኒ ኢስታስ ኢሚዳ ዎዴ ኢስቲ ሺሼቴስ፤ ኔኒ ኔ ኩሼፔ ዬጊን ኢስቲ ሎኦ ሚሽ ካሌቴስ።

29ኔኒ ኔ ሲን ጌንዛ ዎዴ ዳጋሜቴስ፤ ኔ ኢስታ ሼምፖ ኤኪዛ ዎዴ ሃይቄቴስ፤ ዱጌ ቢታንካ ሲሚ ጌሌቴስ።

30ጊዶ ኣቲን ኔኒ ኢስታስ ኔ ኣያና ኪቲዳ ዎዴ ሃራቲ ሜቴቴስ፤ ቢታካ ኦራጺሳሳ።

31ጎዳ ቦንቾይ ሜርናስ ዴኦ፤ ጎዳይ ባ ኦሶን ኡፋዬቶ።

32ኢዚ ቢታ ጼሊን ቢታይ ቃጼስ፤ ቃሴ ኢዚ ዙማታ ቦቺን ዙማቲ ጩዋቴቴስ።

33ታኒ ዴኢዛ ላይ ኡባን ጎዳስ ዬጻና፤ ታኒ ሼምፖራ ፓጻ ዴኢዳ ዎዴ ኡባን ታ ጾሳስ ዬጻና።

34ታኒ ጎዳን ኡፋዬቲዛ ጊሻስ ታ ዎዚና ቆፋይ ኢዛ ኡፋይሶ።

35ናጋራንቻቲ ቢታፌ ዬቶ፤ ሃይሳፌ ሲንስ ኢታቲ ዶፔቶ። ታ ሼምፖዬ! ጎዳ ጋላታ! ጎዳ ጋላታ!

← Chapter 103 Jump to: Chapter 105 →