Deuteronomy 17

Amharic Gofa GFBEVF (ጌሻ ማፃፋ)

← Chapter 16 Jump to: Chapter 18 →

1ጎዳስ፥ ነ ፆሳስ፥ ቦርስያባይ ደእያ መሄ ዎይኮ ዶርሰ ያርሾ ኦዳ ሺሾፓ፤ ሄስ ፆሳ ስንን እፀትዳባ።

2ጎዳይ፥ ነ ፆሳይ ነዉ እምያ ካታማታፐ አዉንካ አደ ዎይኮ ማጫ ግድን ጎዳ፥ ነ ፆሳ ስንን ኢታባ ኦኮነ እያ ጫቁዋ መንድ በንትኮ፥

3ታ ኪታ አግድ፥ ሀራ ፆሳታ፥ አዋ ዎይኮ አጌና ዎይኮ ሳሎ ፆልንቶ ጎይንዳ አስ ደእኮ፥

4ሄሳ መላባ ህንተ ስእኮ፥ ሄ ኦዳ ምንድ ፕልጋ። ህንተ ኮይን፥ ሄሳ መላ ቱናባይ እስራኤለ ግዶን ኦሰትዳይስ ቱማነ ጌሽ ግድኮ፥

5ሄ ኢታ ኦዳ አድያ ዎይኮ ማጫስዉ ነ ካታማፐ ጋፃ ከሳዳ፥ ሹቻን ጫዳዳ ዎ።

6እስ አስ ናምኡ ዎይኮ ሄ ማርክ ማርካቶና ደእሽን ሀይቆፎ፤ እስ አሳ ማርካን አይ አስካ ሀይቆፎ።

7እያ ቦላ ማርካትዳ አሳት ኮይሮ እያ ሹቻን ጫዶ፤ ኤንታ ካልድ ሀንኮ አሳይ ጫዶ። ሄሳዳ ኦዳ፥ ኢታ ነ ግዶፈ ድጋ።

8ህንተ ስን ሺቅያ ሞቶይ ዴፆ ግድኮ፥ ሄስካ፥ ሸምፖ ዎ፥ ሾቸ፥ ማዱን፥ ዱማ ዱማ ሞቶታ ጎዳይ፥ ነ ፆሳይ ዶርዳ በሳ ኤሀ።

9ካህነ ግድዳ ሌወታኮነ ዳይናታኮ ሄ ሞቱዋ ሺሻ፤ ሄ ሞቱዋ ኤንቲ ፕርዶ።

10ጎዳይ ዶርዳ በሳን ኤንቲ ፕርድዳይሳዳ ኦ፤ ነ ኦና መላ ኤንቲ ኪትያባ ኡባ አኬካዳ ኦ።

11ኤንቲ ነና ታማርስዳ ህግያዳነ ኤንቲ ኦድዳ ፕርዳዳ ኦ፤ ኤንቲ ፕርድዳ ፕርዳፈ ኡሻች ዎይኮ ሀድርስ ጎፓ።

12ጎዳስ፥ ነ ፆሳስ ኦያ ዳይናስ ዎይኮ ካህንያስ ኪተቶና እፅያ አስ ደእኮ፥ ሄ ኡራይ ሀይቆ። ሄሳዳ ኦዳ፥ ኢታ እስራኤለ ግዶፈ ድጋ።

13አሳ ኡባይ ሄሳ ስእድ ያያና፤ ዛሪድ ሄሳ መላ ኢታ ኦያ አስ ዴና።

14ጎዳይ፥ ነ ፆሳይ ነዉ እምያ ቢታ ላታዳ፥ ያን ደኦ ዶምያ ዎደ፥ ነ ዩሾን ደእያ ካዎተታዳ፥ “ኑካ ኑ ቦላ ካዎ ካዎና” ያግኮ፥

15ነ ካዎና ካዎይ ጎዳይ፥ ነ ፆሳይ ነዉ ዶርዳይሳ ግዳናዉ በሴስ። ሄስካ፥ ነ አሳ ግዶፈ ዶረትዳይሳ ግዶፐ አትሽን፥ ሀራ ቢታ አስ ነ ቦላ ካዎፋ።

16ጎዳይ፥ “ሄ ኦግያራ ግብፀ ስሞፕተ” ያግዳ ግሾ፥ ሄ ካዎይ ዳሮ ፓራ ሺሻናዉ በሰና፤ ባ አሳካ ፓራ ሻማና መላ ግብፀ የዶፎ።

17እያ ዎዛና ባለና መላ ካዎይ ዳሮ ማቾ ኤኮፎ፤ ዳሮ ዎርቃነ ብራ ሺሾፖ።

18እ ባ አራታን ኡትያ ዎደ ሌወ ኮቸ ግድዳ ካህነት ናግያ ማፃፋፐ ሀ ህግያ ዱቅድ ባዉ ኤኮ።

19እ ሀ ህግያ ቃላነ ዎጋ ናጎነ ፖሎ ኤርድ ጎዳስ፥ ባ ፆሳስ፥ ያሽ ታማራና መላ፥ ሀ ማፃፋይ እያራ ደኦ፤ እካ ሀ ማፃፋ ባ ደኦ ላይ ኡባን ናባቦ።

20እ ባ ዎዛናን፥ “ታኒ ታ ላገታፐ አይስ” ግድ ባ እሻታ ቦላ ኦቶርተና። እካ ፆሳ ህግያፈ ሀድርስ ዎይኮ ኡሻች ጌና። እ ባ ካዎተን አዱሳ ላይ ካዎታና፤ እያ ናይት እስራኤለ ቢታን ዳሮ ላይ ካዎታና።

← Chapter 16 Jump to: Chapter 18 →