Deuteronomy 2

Amharic Gofa GFBEVF (ጌሻ ማፃፋ)

← Chapter 1 Jump to: Chapter 3 →

1ሄሳፈ ጉየ፥ ጎዳይ ታና ኪትዳይሳዳ፥ ኑኒ ዞኦ አባ ኤፍያ ኦግያ ኦይክድ ጉየ ስሚድ መላ ቢታ መቶትሸ፥ ደረይ ዳርያ ሳይረ ቢታን ዳሮ ጋላሳ ቶይላትሸ ዩይዳ።

2ሄሳፈ ጉየ፥ ጎዳይ ታኮ ሀይሳዳ ያግስ።

3“ሀ ደረይ ዳርያ ቢታ አዱሳ ዎደ ዩይዳይስ ህንተዉ ግዳና፤ ፑደሀ ባጋ ስሚድ ቢተ።

4አሳ ኔኒ ያጋዳ ኪታ፤ ‘ሳይረን ደኤይ ኤሳዌ ናይታ ህንተ እሻታ ግድያ ግሾ ኤንታ ቢታራ ህንተ ካንታ። ኤንቲ ህንተዉ ያያና፥ ሽን ህንተ ኬህ ናገትተ።

5ታኒ ኤንታ ቢታፈ ቶሆይ የያ በሳ መላ ህንተዉ እሞና ግሾ ኤንታራ ኦለቶፍተ። ታኒ ደረይ ዳርያ ሳይረ ቢታ ላታ ኦዳ ኤሳዌስ ኮይሮታዳ እማስ።

6ህንተ ምያ ካነ ኡያ ሃ ኤንታፈ ሚሸን ሻምተ’ ” ያጋዳ ኪታ።

7ጎዳይ ህንተ ፆሳይ ህንተ ኦዳባ ኡባ አንጅስ፤ ህንተ ሀ ዎልቃማ መላ ቢታን ሄመትያ ዎደ ህንተና ናግስ። ኦይታሙ ላይ ኡባን ጎዳይ ህንተ ፆሳይ ህንተራ ደእስ፤ ህንተዉ አይባካ ፓጭስቤና።

8ሄሳ ግሾ፥ “ኑኒ ኑ እሻታ ግድያ ኤሳዌ ናይት ደእያ ሳይረ ቢታራ ካንድ ብዳ። ቃስ ኤላታነ ኤፅዮን-ጋብራ ካታማታፐ ደንድድ፥ ማፅነ አባኮ ጋያ ኦግያ አግድ፥ ሞአበ መላ ቢታራ አዳ።

9ጎዳይ ታኮ፥ ‘ታኒ ኤንታ ቢታፈ አይባካ ህንተዉ እሞና ግሾ፥ ሞአበ አሳራ ካጨቶፍተ ዎይኮ ኤንታ ኦሎፕተ። ኤራ ካታማ ታኒ ላታ ኦዳ ሎፀ ኮቻስ ኮይሮ እማስ’ ” ያግስ።

10(ሄ ቢታን ካሰ ምኖነ ዳሮ ግድዳ፥ ቃስ አናቀ ኮቻታዳ አዱሰ ግድዳ ኤምመታ ጌተትያ አሳት ደእዶሶና።

11ኤንቲ አናቀታዳ ራፋይመታ ጌተቶሶና። ሽን ሞአበ አሳይ ኤንታ ኤምመታ ግድ ፄጎሶና።

12ሆራ ቢታ አሳይ ካሰ ሳይረን ደእዶሶና፥ ሽን እስራኤለ አሳይ ላታና መላ ጎዳይ ኤንታዉ እምዳ ቢታን ኤንቲ ኦዳይሳዳ ኤሳዋ ኮቻት ሆራታ ኤንታ ቢታፈ ሾድዶሶና። ቃስ ባንታ ስንፈ ኤንታ ይስድ ኤንታ በሳን ኡትዶሶና።)

13ጎዳይ ኑኮ፥ “ሀእ ደንድተ፥ ዛረአዳ ሻፋ ፕንተ” ያግን፥ ኑኒ ዛረዳ ሻፋ ፕንዳ።

14ኑኒ ቃደስ-ባርነፈ ደንድድ፥ ዛረዳ ሻፋ ፕናና ጋካናዉ ሀስታማነ ሆስፑን ላይ አስ። ሄ ዎደ ጎዳይ ኤንታዉ ጫቅዳይሳዳ ኦላስ ጋክዳ አደ ኡባይ ዉርስ።

15ዱንካንዳ ጉታፐ ኤንቲ ኩመ ያና ጋካናዉ፥ ጎዳ ኩሸይ ኤንታ ቦላ ዴፅስ።

16ኦላስ ጋክዳ አደ አሳ ኡባይ ኩመ ይዳፐነ አሳ ግዶፈ ሀይቅድ ዉርዳፐ ጉየ፥

17ጎዳይ ታኮ፥

18“ኤራ ኦግያራ ሀች ህንተ ሞአበ ቢታ ካንታ።

19ህንተ አሞነ አሳ ቢታ ጋክያ ዎደ ኤንታ ቦቾፍተ ዎይኮ ኤንታራ ኦየቶፍተ። አሞነ አሳታ ቢታፈ አይብባካ ታኒ ህንተዉ ላታ ኦዳ እምከ። ታኒ ሄ ቢታ ሎፀ ኮቻስ ላታ ኦዳ ኮይሮ እማስ” ያግስ።

20[ሄ ቢታይ ካሰ ያን ደእያ አሳይ ፄገትያ ሱን ራፋይመታ ቢታ ጌተትድ ፄገቴስ። ቃስ አሞነት ኤንታ ዛምዙመታ ግድ ፄጎሶና።

21ኤንቲ አናቀታዳ አዱሰ፥ ምኖነ ዳሮ ደረ፥ ሽን ጎዳይ ኤንታ ይስን፥ አሞነት ኤንታ ቢታ ላትድ ኡትዶሶና።

22ጎዳይ ሳይረን ደእያ ኤሳዌ ኮቻስ ኦዳይሳዳ፥ ኤንታ ቦላ ኦስ። ሄስካ እ ሄ ቢታን ደእያ ሆራታ ይስን፥ ኤሳዌ ኮቻይ ኤንታ ቢታ ላትድ ሀች ጋካናዉ ኡትዶሶና።

23ጋዛ ጋካናዉ ደእያ ሄራን ደእያ አዌት፥ ካፍቶረ ቢታፈ ይዳ ካፍቶረት ኤንታ ይስድ ኤንታ ቢታን ኡትዶሶና።]

24ቃስካ ጎዳይ ኑኮ፥ “ደንድተ፤ አርኖና ሻፋ ፕንተ። ሄኮ፥ አሞረ ቢታ አስ ግድዳ ሀሰቦና ካዋ ስሆናነ እያ ቢታ ታ ህንተ ኩሸን አዳ እማስ፤ እያ ኦልድ እያ ቢታ ላትተ።

25ሀችፈ ዶምን ሳሎፐ ጋርሳን ደእያ አሳ ኡባይ ህንተዉ ያያና መላ ታኒ ኦና። ኤንቲ ህንተባ ስእያ ዎደ ኡባን ያሻን ኮኮራና” ያግስ።

26ሄሳፈ ጉየ፥ ቅደሞታ መላ ቢታፈ ሀሰቦና ካዋ ስሆናስ ኪታንቾታ ቦላ ሀይሳዳ ያጋዳ ሳሮ ቃላ ኪታስ።

27“ኑና ነ ቢታራ አርክ፤ ኑኒ ዎጋ ኦግያ ፃላላ ኦይክድ ባና፤ እያፐ ኡሻች ዎይኮ ሀድርስ ጎኮ።

28ኑኒ ምያ ካስነ ኡያ ሃስ ሚሸ ቃንፃና። ኑ ኮየይ ነ ቢታራ ካን አ ፃላላ።

29ሳይረን ደእያ ኤሳዌ ኮቻትነ፥ ኤራን ደእያ ሞአበ ኮቻት ኑና አዳይሳዳ ጎዳይ ኑ ፆሳይ፥ ኑስ እምያ ቢታስ ዮርዳኖሰ ሻፋ ኑኒ ፕናና ጋካናዉ ያራ ኑና አ” ያጋስ።

30ሽን ሀሰቦና ካዎይ ስሆነይ ኑና አና እፅስ። ጎዳይ ህንተ ፆሳይ ሀእ ኦዳይሳዳ እያ ህንተ ኩሸን አድ እማናዉ ኮይዳ ግሾ እያ ዎዛና ሙምስስድ፥ ኦቶራንቾ ኦስ።

31ሄሳፈ ጉየ ጎዳይ ታኮ፥ “ሄኮ፥ ስሆናነ እያ ቢታ ታ ነዉ አዳ እሞ ዶማስ፤ ሀእ ፆናዳ እያ ቢታ ላታ” ያግስ።

32ስሆነይ ባ ኦላንቾታ ኡባ ኤክድ ያሃፃ ጌተትያ በሳን ኑራ ኦለታናዉ ከይስ።

33ሽን ጎዳይ ኑ ፆሳይ ኑስ እያ አድ እምን፥ እያ፥ እያ አደ ናይታነ እያ ኦላንቾታ ኡባ ኑኒ ዎዳ።

34ሄ ዎደ ኑኒ እያ ካታማታ ኡባ ኦይክድ፥ እያን ደእያ አደ፥ ማጫነ ናአ ኡባ አሾና ይስዳ።

35ኤንታ መህያነ ኑኒ ኦይክዳ ካታማታፐ ድእዳይሳ ፃላላ ኑስ ኤክዳ።

36አርኖና ዛንጋራ ጋፃን ደእያ አሮኤራፐነ ሄ ዛንጋራ ግዶን ደእያ ካታማፐ ብድ ጋላዳ ቢታ ጋካናዉ ኑራ ኤቀትዳ እስ ካታምካ ዴና። ጎዳይ ኑ ፆሳይ ኤንታ ኡባ ኑ ኩሸን አድ እሚስ።

37ሽን ኑኒ አሞነ ቢታኮ፥ ያቦቃ ሻፋ ጋፃን ደእያ ቢታኮ፥ ገዘ ቢታን ደእያ ካታማታኮነ ጎዳይ ኑ ፆሳይ ኑኒ ቦና መላ ድግዳ በሳ ኡባ ሺቅቦኮ።

← Chapter 1 Jump to: Chapter 3 →