Deuteronomy 24

Amharic Gofa GFBEVF (ጌሻ ማፃፋ)

← Chapter 23 Jump to: Chapter 25 →

1እስ አስ ማቾ ኤክ ስሚድ፥ እስ ኢታባ እ ቦላ ደምድ እዮ እፅድ፥ ፕርማ ዳክድ፥ የድኮ፥

2እያ ሶፐ ከያዳ፥ ሀራ አዝና ገልኮ፥

3ሄ ናምአን አዝናይ እዮ ዶሶና እፅድ፥ ፕርማ ዳክድ፥ እዮ ባ ሶፐ ከስድ የድኮ፥ ዎይኮ እዮ ኤክዳ ናምአን አዝናይ ሀይቅኮ፥

4እያ ቱንዳ ግሾ፥ ኮይሮ ኤክዳ አዝናይ፥ ዛሪድ እዮ ኤኮፎ። ሄስ ጎዳ ስንን እፀትዳባ፤ ነ ጎዳይ፥ ነ ፆሳይ ነ እምያ ቢታን ሄሳ መላ ናጋራ ኦፋ።

5ኦራ ማቾ ኤክዳ አስ ኦላስ ቦፖ፤ ሀራ ዴፆ ኦሶ ኦፎ። እስ ላይ አና ጋካናዉ አዉካ ቦና ባ ማችዉ ኡፋይሶ።

6እስ አሳ ዎፃ ዎይኮ ማይደ አጮስ ኦይኮፋ፤ ሄስ ኬ አሳይ ምያባ ይድ ሀይቆ ጉሱ።

7እስ እስራኤለ ግድዳ ባ እሻ ካይሶት ኤፍድ፥ አይለ ከሰይ ዎይኮ ሀራስ ባይዝያ ኡራይ ሀይቆ። ሄሳዳ ኦዳ ኢታ ኡራ ነ ግዶፈ ድጋ።

8ጎጋ ሀርገፈ ነና ምንዳ ናጋ፤ ሌወ ኮቸ ግድዳ ካህነት ነና ታማርስያ ኡባ ፖላ፤ ታ ኤንታዉ እምዳ ኪታ ናጋ።

9ኔኒ ግብፀፈ ከያዳ ኦገን ደእሽን፥ ጎዳይ ነ ፆሳይ ማይራም ቦላ ኦዳይሳ አኬካ።

10እስ አሳስ እስባ ታልአዳ፥ ኦይያባ ኦይቻናዉ እያ ሶ ገሎፓ።

11ኔኒ ካረን ኤቅዳሽን፥ ነ ታልእዳ ኡራይ ኦያባ ሶፐ ከስድ ነዉ እሞ።

12እ ማንቆ ግድኮ፥ ኔኒ አጮስ ኦይክዳ እያ ማኡዋ ነ ሶን አይሶፓ።

13እ ማእድ አቃና መላ ሳእ ኦማርስያ ዎደ እያዉ ጉየ ዛራ፤ እ ነና ጋላታና። ሄስ ጎዳ ነ ፆሳ ስንን ነዉ ፅሎተ ኦሶ ግድድ ታይበታና።

14ማንቆነ ማደ ኮይድ ዶካለትዳ፥ እስራኤለ ግድዳ ነ እሻ ግድን ዎይኮ ነ ካታማታፐ እሱዋን ደእያ ሀራ ቢታ አስ ናቆፋ።

15እ ሀች ኦዳይሳ ሀች ኤካናዉ ምንድ ኮይያ ግሾ፥ አው ዉሎና እያዉ ቃንፃ። ሄስ ሀኖና እፅኮ፥ ማንቆይ ጎዳኮ ዋስን ሄስ ነዉ ናጋራ ግዳና።

16ናይት ኦዳ ናጋራ ግሾ፥ አዋታ ዎናዉ በሰና፤ ቃስ አዋት ኦዳ ናጋራ ግሾ ናይታ ዎናዉ በሰና። ኦንካ ባ ኦዳ ናጋራን ናጋራን ሀይቃናዉ በሴስ።

17ሀራ ቢታ አሳ ፕርዳነ ይኦ ናይታ ፕርዳ ዎቢሶፓ፤ አምኤ ማኡዋ አጮ ግሾ ኦይኮፋ።

18ኔኒ ግብፀ ቢታን አይለ ግድዳይሳነ ጎዳይ ነ ፆሳይ ነና ያፐ ዎዝድ ከስዳይሳ አኬካ። ታኒ ነና ኪተይ ሄሳ ግሾሳ።

19ኔኒ ካ ጫክያ ዎደ ነ ዶግዳ ምርቅያ ኤካናዉ ጉየ ስሞፋ። ጎዳይ፥ ነ ፆሳይ ነ ኩሸ ኦሶ ኡባን ነና አንጃና መላ ሄሳ በተ አሳስ፥ ይኦ ናይታስነ አምኤታስ አጋጋ።

20ኔኒ ሻማሆ አይፈ ማፅያ ዎደ ዉርሳዳ ማፃናዉ ናምአን ጉየ ስሞፋ። አትዳይሳ በተ አሳስ፥ ይኦ ናይታስነ አምኤታስ አጋጋ።

21ኔኒ ዎይነ አይፈ ማፅያ ዎደ ዉርሳዳ ማፃናዉ ናምአን ጉየ ስሞፋ። አትዳይሳ በተ አሳስ፥ ይኦ ናይታስነ አምኤታስ አጋጋ።

22ኔኒ ግብፀ ቢታን አይለ ግዳዳ ደእዳይሳ ዶጎፓ። ታኒ ነና ኪተይ ሄሳ ግሾሳ።

← Chapter 23 Jump to: Chapter 25 →