Exodus 16

Amharic Gofa GFBEVF (ጌሻ ማፃፋ)

← Chapter 15 Jump to: Chapter 17 →

1ግብፀፈ ከይዳ ናምአን አጌናን፥ ታማነ እቻሻን ጋላስ እስራኤለ አሳ ኡባይ ኤልማፐ ደንድድ፥ ኤልማፐነ ሲናፐ ግዶን ደእያ ሲነ ጌተትያ መላ ቢታ ይዶሶና።

2እስራኤለ አሳ ኡባይ መላ ቢታን ሙሰ ቦላነ አሮና ቦላ ዙዙምዶሶና።

3እስራኤለት ኤንታኮ፥ “ኑኒ ግብፀ ቢታን ጎዳ ኩሸን ሀይቅዳ ግዶርኮሽን። ሀር አቶ ኑኒ ያን ዎ ኡትድ አሹዋነ ሀራ ካ ኡባ ኑ ኮይዳ መላ ሞስ። ሽን ህንተ ኑና ኡባ ከስድ ሀ መላ ቢታ ኮሻን ዎሴታ” ያግዶሶና።

4ጎዳይ ሙሰኮ፥ “ታኒ ህንተዉ ሳሎፐ ካ ቡክሳና። አሳይ ጋላስ ጋላስ ከይድ፥ ሀችስ ግድያባ ማፃናዉ ኮሼስ። አሳይ ታው ኪተትያኮነ ኪተቶናኮ ታኒ ኤንታ ሄሳን ፓጫና።

5ሳምንታን ሳምንታን ኡሱፑን ጋላስ ኤንቲ ካሰ ማፀይሳስ ናምኡ ኩሸ ማፅድ ካ” ያግስ።

6ሄሳ ግሾ ሙሰይነ አሮን እስራኤለ አሳኮ፥ “ህንተና ግብፀ ቢታፈ ከስዳይ ጎዳ ግደይሳ ኦማርስ ህንተ ኤራና።

7ህንተ ጎዳ ቦላ ዙዙምዳይሳ እ ስእዳ ግሾ፥ ዎንታ ጎዳ ቦንቹዋ ህንተ በአና። ህንተ ኑ ቦላ ዙዙማናዉ ኑኒ ኦኔ?” ያግዶሶና።

8ሄሳፈ ጉየ ሙሰይ፥ “ህንተ ጎዳ ቦላ ዙዙምዳይሳ እ ስእዳ ግሾ፥ እ ህንተዉ ኦማርስ ማናዉ አሾ እመይነ ዎንታ ማናዉ ህንተ ኮይያ መላ ኡይ እመይ ጎዳ ግደይሳ ህንተ ኤራና። ህንተ ኑ ቦላ ግዶናሽን ጎዳ ቦላ ዙዙመታ” ያግስ።

9ሙሰይ አሮናኮ፥ “ኔኒ እስራኤለ አሳ ኡባ፥ ‘ጎዳይ ህንተ ዙዙን ስእዳ ግሾ፥ ይድ ጎዳ ስንን ኤቅተ’ ያጋ” ያግስ።

10አሮን እስራኤለ አሳ ኡባስ ኦድዳ ዎደ ኤንቲ መላ ቢታ ስሚድ፥ ሻራ ግዶራ ቆንጭዳ ጎዳ ቦንቹዋ በእዶሶና።

11ጎዳይ ሙሰኮ፥ “ታኒ እስራኤለታ ዙዙን ስአስ። ኔኒ ኤንታዉ ‘ኦማርስ አሾ ህንተ ማና፤ ዎንታ ህንተ ኮይዳ መላ ኡይ ኤካና። ሄ ዎደ ህንተ ታኒ ጎዳ ህንተ ፆሳ ግደይሳ ኤራና’ ያጋዳ ኦዳ” ያግስ።

13ሄ ጋላስ ኦማርስ ኩራቾት ይድ፥ እስራኤለ አሳይ ደእያ በሳ ማእዶሶና። ዎንታ ኤንታ ሄራን አክ ቢታ ማእስ።

14አካይ፥ ፅዝእዳ ዎደ ሌኦነ ላፋባይ መላ ቢታ ቦላ በንትስ። እካ ሻቻዳ ቦ።

15እስራኤለት ሄሳ በእዳ ዎደ እያ ኤሮና ግሾ፥ እሶይ እሱዋኮ፥ “ሀይስ አይቤ?” ያግዶሶና። ያትን ሙሰይ ኤንታኮ፥ “ህንተ ማና መላ ጎዳይ እምዳ ካይ ሀይሳ።

16ጎዳይ፥ ‘አሳይ እሶይ እሶይ ባዉ ኮሸይሳ መላ ሺሾ፤ ሶን ደእያ እስ እስ አስ ባ ሁጰን ናምኡ ልትሮ ኤኮ’ ያጋ” ያግድ ኪትስ።

17እስራኤለት ኪተትዳይሳዳ ኦዶሶና፤ ባጋይ ዳርስድ፥ ባጋይ ጉድ ሺሽዶሶና።

18ኤንቲ ሺሽድ ልትሮን ማክያ ዎደ ዳርስ ሺሽዳይሳስ ፓላህቤና፤ ጉ ሺሽዳይሳስካ ፓጭቤና። እሶይ እሶይ ባዉ ኮሸይሳ መላ ሺሽስ።

19ሙሰይ ኤንታኮ፥ “ኦንካ እያፐ ዎንታስ አሾፎ” ያግድ ኪትስ።

20ሽን ኤንታፈ እሶት እሶት ሙሰይ ኦድዳይሳ ስኦና እፅድ ዎንታስ ምንጅዶሶና። ኤንቲ ምንጅዳይስ ጉፁንትድ ፅንቅስ። ሄሳ ግሾ ሙሰይ ኤንታ ቦላ ሀንቀትስ።

21ዎንታ ዎንታ አሳ ኡባይ ባንታዉ ኮሸይሳ መላ ሺሼስ። አዋይ ምችያ ዎደ ሳአን አትዳይስ ትልኤስ።

22ኡሱፑን ጋላስ ኤንቲ ካሰ ሺሽያ ናምኡ ልትሩዋ ቦላ እያ መላ ጉጅድ እስ እስ አሳስ ኦይዱ ልትሮ ሺሾ። ያትን እስራኤለ ሀላቃት ብድ ሄሳ ሙሰስ ኦድዶሶና።

23ሙሰይ ዛሪድ፥ “ዎንቶይ ሸምፖ ጋላስ ግድድ ጎዳ ቦንችያ ጌሻ ሳምባታ። ሄሳ ግሾ፥ ህንተ ኡክያባ ኡክተ፤ ዶይስያባ ዶይስተ። ዎንቶስ ዎተ” ያግስ።

24ኤንቲ ሙሰይ ኪትዳይሳዳ ዎንቶስ ዎን፥ ፅንቅቤና ዎይኮ ጉፁንትቤና።

25ሙሰይ ኤንታኮ፥ “ሀይሳ ሀች ሚተ፤ ሀች ጎዳ ቦንችያ ሸምፖ ሳምባታ ግድያ ግሾ፥ ህንተ ሀች ደንባን ደመከታ።

26ህንተ ካ ኡሱፑን ጋላሳታን ሺሻናዉ ዳንዳኤታ፥ ሽን ላፑን ጋላሳይ ሸምፖ ጋላስ ግድያ ግሾ አይብ ካካ ሄ ዎደ ዴና” ያግስ።

27ላፑን ጋላሳን እስ እስ አሳይ ሺሻናዉ ከይዶሶና፥ ሽን አይኮካ ደምቦኮና።

28ያትን፥ ጎዳይ ሙሰኮ፥ “ታ ኪታነ ታ ህግያ ህንተ ናጎና እፀይ አዉደ ጋካናሴ?

29ታኒ ህንተዉ ሳምባታ እምዳይሳ አኬክተ። ኡሱፑን ጋላሳን እ ህንተዉ ናምኡ ጋላሳ ካ እመይ ሄሳ ግሾሳ። ላፑን ጋላሳን ኦንካ ካረ ከዮና ባ ሶን ባ ሶን ጋምኦ” ያግስ።

30ሄሳ ግሾ፥ አሳይ ላፑን ጋላሳን ሸምፕስ።

31እስራኤለ አሳይ ሄ ካ ማና ግድ ፄግዶሶና። ማናይ ዴቦ አይፈ መላ ግድድ ቦ። እ ኤሳራ ኡክዳ ኡይዳ ማልኤስ።

32“ታኒ ህንተና ግብፀ ቢታፈ ከስዳ ዎደ መላ ቢታን ሙዝዳይ ማና ግደይሳ ያና የለተይ በአና መላ እያፐ ናምኡ ክሎ ግራመ ዎተ” ያግድ ጎዳይ ኪትዳይሳ ሙሰይ እስራኤለ አሳስ ኦድስ።

33ሙሰይ አሮናኮ፥ “ናምኡ ክሎ ግራመ ማና ኤካዳ ፃሮን ቆላዳ ያና የለተስ ጎዳይ ጎይነትያ በሳን ዎ” ያግስ።

34ጎዳይ ሙሰ ኪትዳይሳዳ፥ አሮን ማና ጎዳ ስንን ታቦትያ ግዶን ዎስ።

35እስራኤለት ባንታ ደእያ ካናነ ቢታ ዛዋ ይድ ጋካናዉ ኦይታሙ ላይ ማና ምዶሶና።

36ሄ ዎደ አሳይ ማክያ ሚሸይ ላታማነ ናምኡ ልትሮ ኦይኬስ።

← Chapter 15 Jump to: Chapter 17 →