Exodus 4

Amharic Gofa GFBEVF (ጌሻ ማፃፋ)

← Chapter 3 Jump to: Chapter 5 →

1ሙሰይ፥ “ኤንቲ ታና አማኖና እፅድ፥ ዎይኮ ታኒ ግያባ ስኦና እፅድ፥ ‘ጎዳይ ነዉ ቆንጭቤና’ ጊኮ ዎይጎ?” ያግድ ኦይችስ።

2ጎዳይ ሙሰኮ፥ “ነ ኩሽያን ደኤይስ አይቤ?” ያግድ ኦይችስ። “ፃምአ” ያግስ።

3ጎዳይ እያኮ፥ “አነ ሳአን የጋ” ያግስ። ሙሰይ ሄ ፃምኣ ሳአን የግን፥ ሾሽ ግድን፥ ሙሰይ እያፐ ዎፅስ።

4ሄሳፈ ጉየ ጎዳይ፥ “ነ ኩሽያ የዳዳ እያ ጎይና ኦይካ” ያግስ። ሙሰይ ባ ኩሽያ የድድ ሾሻ ኦይክ ደንን ሾሻይ እያ ኩሸን ስሚድ፥ ፃምአ ግድስ።

5ጎዳይ፥ “ነ አዋታ ፆሳይ፥ አብራሃመ፥ ይሳቃነ ያይቆባ ፆሳይ ነዉ ቆንጭዳይሳ ኤንቲ አማናና መላ ሀይሳ ኦ” ያግስ።

6ካልድ ጎዳይ ሙሰኮ፥ “ነ ኩሽያ ነ ሾጰን ናቃ” ያግስ። ሙሰይ ባ ኩሽያ ሾጰን ናቅስ። እ ከስያ ዎደ እያ ኩሸይ ባሮ ሀርገን ኦይከትዳዳ ቦፅስ።

7ጎዳይ እያኮ፥ “ነ ኩሽያ ነ ሾጰን ዛራዳ ናቃ” ያግስ። ሙሰይ ባ ኩሽያ ባ ሾጰን ዛር ናቅድ ከስያ ዎደ እያ ኩሸይ ስሚድ ሀንኮ አሳተ መላ ግድስ።

8ጎዳይ፥ “ኤንቲ ነና ዎይኮ ኮይሮ ማላታ አማኖና እፅኮ፥ ናምአን ማላታ አማናና።

9ሽን ኤንቲ ሀ ናምኡ ማላታታ አማኖና እፅኮ፥ ዎይኮ ኔኒ ግያባ ስኦና እፅኮ፥ ናይለ ሻፋፐ ሃ ኤካዳ፥ መላ ቢታ ቦላ ጉሳ። ሄ ሃይ ቢታ ቦላ ሱን ላመታና” ያግስ።

10ሙሰይ ጎዳኮ፥ “አቤት ጎዳዉ፥ ካሰካ ዎይኮ ሀእ ነ ታና ኦድሶ ኦይክዳይሳፈ ዶምን ኦድድ አማንይ ታዉ ሀነና። ታ ጌሻዳ ኦደታናዉ ዳንዳእከ፤ ታ እንፃርሳይ ሉፋ” ያግስ።

11ጎዳይ እያኮ፥ “አሳስ ዶና እምዳይ ኦኔ? ሙመ ዎይኮ ቱለ ኦይ ኦኔ? ፄልሰይነ ቆቅሰይ ኦኔ? ታና ጎዳ ግድክናዬ?

12ሀእ ኔኒ ባ፤ ኔኒ ኦደታና መላ ታ ነና ማዳና። ነ ጋናባ ታ ነዉ እማና” ያግስ።

13ሽን ሙሰይ፥ “ጎዳዉ፥ ሀያና፥ ሀራ አስ ኪታ” ያግስ።

14ሄሳፈ ጉየ ጎዳይ ሙሰ ቦላ ዳሮ ሀንቀትድ እያኮ፥ “ሌወ ግድዳ ነ እሻ አሮን ባዌ? እ ኦዳ ሎይድ ኤረይሳ ታ ኤራይስ። ሀእ እ ኔራ ጋሄታናዉ ይሸ ኦገ ቦላ ደኤስ፤ እ ነና በእያ ዎደ ዎዛናፐ ኡፋይታና።

15ኔኒ፥ ‘ያጋ’፥ ጋዳ እያዉ ኦዳና። ታኒ ህንተ ናምአይካ ዎይግ ኦዳነኮነ ዋትድ ኦነኮ ህንተና ታማርሳና።

16እ ነ ዶና ግድድ አሳስ ነ ግሾ ኦዳና። ኔኒ ፆሳ በሳን ግዳዳ እ ጋናባ እያዉ ኦዳና።

17ሀ ፃምአ ኤካ ባዳ እያራ ማላታ ኦዳ በሳ” ያግስ።

18ሄሳፈ ጉየ ሙሰይ ባ ቦሉዋ ዮታራኮ ስም ብድ፥ “ሀኖ ጋካናዉ አሳይ ፓፃ ደእያኮ በአናዉ፥ ታኒ ጉየ ግብፀ ታ አሳኮ ቦ?” ያግስ። ዮቶር ሙሰኮ፥ “ኤ ባ፤ ሳሮ ጋካ” ያግስ።

19ሙሰይ ምድያመ ቢታን ደእሽን ጎዳይ እያኮ፥ “ነና ዎናዉ ኮይዳ አሳት ኡባይ ሀይቅዳ ግሾ ጉየ ግብፀ ስማዳ ባ” ያግስ።

20ሙሰይ ባ ማችዉነ ባ አደ ናይታ ሀረ ቶግስድ ጉየ ግብፀ ስምስ። ሙሰይ ፆሳ ፃምአ ባ ኩሸን ኦይክድ ብስ።

21ጎዳይ ሙሰ፥ “ኔኒ ግብፀ ስማዳ ብያ ዎደ፥ ታኒ ነዉ እምዳ ዎልቃን ግብፀ ካዉዋ ስንን ማላታታ ኦናይሳ ባሎፓ። ሽን ሄሳንካ እ አሳ የዶና መላ ታኒ እያ ዎዛና ሙምሳና።

22ሄ ዎደ ታኒ ጎዳይ ግያባ ካዋስ ሀሳዳ ያጋዳ ኦዳ። ‘እስራኤል ታ ባይራ ናአ።

23እ ታዉ ጎይናና መላ እያ የዳ ጋዳ ታኒ ነዉ ኦዳስ። ሽን ኔኒ የዶና እፃዳሳ። ሄሳ ግሾ፥ ታኒ ነ ባይራ አደ ናኣ ዎና’ ያጌስ ጋዳ ኦዳ” ያግስ።

24ኦገን ሸምፖ በሳን ጎዳይ ሙሰራ ጋሄትድ እያ ዎናዉ ኮይስ።

25እያ ማችያ ስፖራ ቃራ ሹቹ ኤካዳ፥ ባ ናኣ ቃፃራሱ። ቃፃራ ሾሁዋራ ሙሰ ቶሁዋ ቦቻሱ። እያ ሙሰኮ፥ “ኔኒ ታዉ ቱማ ሱ መዳ” ያጋሱ።

26ሄሳ ግሾ፥ ጎዳይ እያ ዎና አግስ። ሄ ዎደ እያ ሙሰኮ፥ “ሀ ቃፃሩዋ ጋሶን ኔኒ አታዳሳ” ያጋሱ።

27ሄ ዎደ ጎዳይ አሮናኮ፥ “ሙሰራ ጋሄታናዉ መላ ቢታ ባ” ያግስ። እ ብድ፥ ፆሳ ዙማ ቦላ ሙሰራ ጋሄትድ እያ ዬርስ።

28ሙሰይ ግብፀ ብድ ጋናባነ ኦና ማላታታ ኡባ ጎዳይ እያ ኪትዳይሳ አሮናስ ኦድስ።

29ሙሰራነ አሮናራ ግብፀ ብድ፥ እስራኤለ ጭማታ ኡባ ሺሽዶሶና።

30አሮን ጎዳይ ሙሰስ ኦድዳ ቃላ ኡባ ኤንታዉ ኦድስ። ቃስ ሙሰይ ማላታታ ሄ አሳ ስንን ኦስ።

31ኤንትካ አማንዶሶና። ጎዳይ ኤንታዉ ቆፕዳይሳነ ኤንታ ዋይያ በእዳይሳ ስእዳ ዎደ ጉፋንድ ጎይንዶሶና።

← Chapter 3 Jump to: Chapter 5 →