Exodus 24

Amharic Gofa GFBEVF (ጌሻ ማፃፋ)

← Chapter 23 Jump to: Chapter 25 →

1ጎዳይ ሙሰኮ፥ “ኔኒ፥ አሮን፥ ናዳብ አብዮዳነ እስራኤለ ጭማታፐ ላፑን ታሙ አሳት ታኮ ዙማ ቦላ ከይድ፥ ሃሆን ኤቅድ፥ ጉፋንድ፥ ታዉ ጎይንተ።

2ሽን ኔኒ ነርካ ታኮ ሺቃ፤ ሀራት ታ ማት ሺቆፖ። ቃስ አሳይካ ኔራ ዙማ ቦላ ከዮፖ” ያግስ።

3ሙሰይ ብድ፥ ጎዳ ቃላነ ዎጋ ኡባ አሳስ ኦድን፥ አሳ ኡባይ እስ ቃላን፥ “ጎዳይ ግዳባ ኡባ ኑኒ ኦና” ያግዶሶና።

4ሙሰይ ጎዳይ ኦድዳባ ኡባ ፃፍስ። ዎንተ ጋላስ ጉራ ደንድድ፥ ዙማ ጋርሳን ያርሾ በሰ ጊግስስ። ታማነ ናምኡ እስራኤለ ሼሻታ ሱንን፥ ታማነ ናምኡ ሹቻ ቱስ ኤስስ።

5እስራኤለ ፓንታ እ ኪትን፥ ኤንቲ ብድ ፁሳ ያርሹዋነ እስፈተ ያርሹዋስ ኮርማታ ሹክድ፥ ጎዳስ ያርሽዶሶና።

6ሙሰይ መህያ ሱፈ ባጋ ኤክድ ከርያን ትግስ፤ አትዳ ባጋ ሱ ያርሾ በሳን ርጭስ።

7ሄሳፈ ጉየ ጫቆ ማፃፋ ኤክድ፥ አሳስ ናባብን፥ ኤንቲ፥ “ጎዳይ ግዳባ ኡባ ኑኒ ኦና፤ ኑኒ እያ ኪታ ፖላና” ያግዶሶና።

8ሄሳፈ ጉየ፥ ሙሰይ ሄ ሱ ኤክድ፥ አሳ ቦላ ርጭድ፥ ኤንታ፥ “ጎዳይ ህንተዉ ሀ ኪታታ እምያ ዎደ ህንተራ ገልዳ ጫቁዋ ምንያ ሱይ ሀይሳ” ያግስ።

9ሙሰይ፥ አሮን፥ ናዳብ፥ አብዮዳነ እስራኤለ ጭማታፐ ላፑን ታማይ ዙማ ቦላ ከይድ፥

10እስራኤለ ፆሳ በእዶሶና። እያ ቶሁዋፐ ጋርሳን ሳሎዳ ጌይዳ፥ ሳንፓረ ጌተትያ ሹቻፈ ኦሰትዳባ ዳንያ ደምባ በሲ ደኤስ።

11ሽን ፆሳይ እስራኤለ አሳ ሀላቃታ ዎቤና። ኤንቲ ፆሳ በእዶሶና፤ እያ ስንን ምዶሶናነ ኡይዶሶና።

12ጎዳይ ሙሰኮ፥ “ኔኒ ታኮ ዙማ ቦላ ሃ ከያዳ፥ ሀይሳን ጋምአ። ታ አሳይ ታዉ ኪተታና መላ ናምኡ ሎቸ ሹቻታ ቦላ ታ ኩሸን ታ ፃፍዳ ህገታ ነዉ እማና” ያግስ።

13ሙሰይነ እያዉ ኪተትያ እያሱይ ባናዉ ደንድዶሶና፤ ሙሰይ ፆሳራ ጋሄታናዉ ዙማ ቦላ ከይስ።

14ሙሰይ እስራኤለ ጭማታኮ፥ “ኑኒ ህንተኮ ስማና ጋካናዉ ሀይሳን ጋምእተ። አሮንነ ሁር ሀይሳን ህንተራ ደኦሶና፤ ኦድ ደእያ ኦንካ ኤንታኮ ቦ” ያግስ።

15ሙሰይ ዙማ ቦላ ከይዳ ዎደ ሻራይ ዙማ ማእስ።

16ጎዳ ቦንቾይ ሲና ዙማ ቦላ ኡትስ። ሄ ሻራይ ኡሱፑን ጋላስ ዙማ ቦላ ማእስ፤ ላፑን ጋላስ ጎዳይ ሻራ ግዶን ግድድ ሙሰ ፄግስ።

17ዙማ ቦላ ቆንጭዳ ጎዳ ቦንቾይ እስራኤለታስ ታማ ላጮ ዳንድ በንትስ።

18ሄሳፈ ጉየ፥ ሙሰይ ዙማ ሁጵያ ከይድ ሻራ ግዶ ገልስ፤ ያን ኦይታሙ ጋላስነ ኦይታሙ ቃማ ጋምእስ።

← Chapter 23 Jump to: Chapter 25 →