Psalms 145

Amharic Tigrinya (መፅሓፍ ቅዱስ)

← Chapter 144 Jump to: Chapter 146 →

1ኦ ኣምላኸይን፥ ንጉሰይን፥ ልዕል ልዕል አብለካ ኣለኹ፤ ስምካውን ንዘለኣለመ ኣለም ክባርኽ እየ።

2ኵሉ መዓልቲ ኽባርኸካ እየ፤ ስምካውን ንዘለኣለመ ኣለም ክውድስ እየ።

3እግዚኣብሄር ዓብዪ እዩ፤ ምስጋናኡውን ብዙሕ እዩ፤ ንዕቤቱ ወሰን የብሉን።

4ውሉድ ወለዶ ንግብርታትካ ኽንእዱ እዮም፤ ሓይልኻውን ከውርዩ እዮም።

5ንኽቡር ግርማ ቅድስናኻ ኽናገሩ እዮም፤ ተኣምራትካውን ክነጋገሩ እዮም።

6ግርማ ሓይልኻውን ክናገሩ እዮም፤ ልዕልናኻውን ክነጋገሩ እዮም፤ ብርታዐኻውን ክነጋገሩ እዮም።

7ብዝሒ ሕያዋይነትካ ብሓጐስ ከውፅኡ፥ ብፅድቅኻውን ሓሴት ክገብሩ እዮም።

8እግዚኣብሄር ርሕሩሕን መሓርን እዩ፤ ንቝጥዓ ዝድንጒ ምሕረቱውን ዝበዝሐ እዩ።

9እግዚኣብሄር ንዝዕገስዎ ሕያዋይ እዩ፤ ምሕረቱውን ኣብ ልዕሊ ዅሉ ስራሑ እዩ።

10ኦ ጐይታ፥ ኵሉ ስራሕኻ የመስግነካ፤ ቅዱሳንካውን ይባርኹኻ።

11ክብሪ መንግስትኻ ይነጋገሩ፤ ሓይልኻውን ይናገሩ።

12ሓይልኻን ክብሪ መንግስትኻን፥ ንደቂ ሰባት ምእንቲ ኸፍልጡ እዩ።

13መንግስትኻ መንግስቲ ዘለኣለም እያ፤ ግዝኣትካውን ካብ ትውልዲ ናብ ትውልዲ እዩ።

14እግዚኣብሄር ብዅሉ ቓሉ እሙን እዩ፤ ብዅሉ ስራሑውን ፃድቕ እዩ። እግዚኣብሄር ነቶም ሰንከልከል ዝብሉ ዅሎም ይድግፎም፤ ነቶም ዝወደቑ ድማ የልዕሎም።

15ናይ ኵሉ ዓይኒ፥ ንኣኻ ተስፋ ይገብር፤ ንስኻውን ብእዋኑ ምግቦም ትህቦም።

16ኢድካ ትዝርግሕ እሞ፥ ንዅሉ ህይወት ዘለዎ፥ ብሰናይ ተፅግቦ።

17እግዚኣብሄር ብዅሉ መንገዱ ፃድቕ እዩ፤ ብዅሉ ስራሑውን ሕያዋይ እዩ።

18እግዚኣብሄር ንዝፅውዕዎ ዅሎም፥ ብሓቂ ንዝፅውዕዎ ዅሎም ቀረባ እዩ።

19ድልየት እቶም ዝፈርሕዎ ይፍፅም፤ ኣውያቶም ይሰምዕ፤ የድሕኖምውን።

20እግዚኣብሄር ንዅሎም ዝፈትውዎ ይሕልዎም፤ ንዅሎም ሓጥኣን ግና የጥፍኦም።

21ኣፈይ ምስጋና እግዚኣብሄር ይዛረብ፤ ኵሉ ስጋ ዝለበሰ ካብ ዘለኣለም ክሳዕ ዘለኣለም፥ ንቕዱስ ስሙ ይባርኽ።

← Chapter 144 Jump to: Chapter 146 →