Micah 4

Amharic Tigrinya 2011

← Chapter 3 Jump to: Chapter 5 →

1በተን ዳሕሮት መዓልትታት ኪኸውን እዩ፡ እቲ ደብሪ ቤት እግዚኣብሄር ኣብ ርእሲ ኣኽራን ኪጸንዕ፡ ኣብ ልዕሊ ኹድኹዶታት ከአ ልዕል ኪብል እዩ። ህዝብታት ድማ ናብኡ ኺውሕዙ እዮም።

2ሕጊ ኻብ ጽዮን፡ ቃል እግዚኣብሄር ከአ ካብ ዮርሳሌም ኪወጽእ እዩ እሞ፡ ብዙሓት ህዝብታት ኪከዱ፡ ንዑናይ ናብ ከረን እግዚኣብሄርን ናብ ቤት ኣምላኽ ያእቆብን ንደይብ፡ ንሱ ኸአ ጎደናታቱ ኺምህረና እዩ፡ ንሕናውን ብመገድታቱ ኺንመላለስ ኢና፡ ከአ ኪብሉ እዮም።

3ኣብ መንጎ ብዙሓት ህዝብታት ኪፈርድ፡ ንብርቱዓት ህዝብታት ድማ ክሳዕ ርሑቕ ኪዳንዮም እዩ። ንሳቶም ከአ ኣስያፎም ንማሕረሻታት፡ ኩናውቶም ድማ ንገዘሞታት ኪሰርሕዎ እዮም፡ ህዝቢ ኣብ ልዕሊ ህዝቢ ሰይፊ ኣይኬልዕልን እዩ፡ ደጊምሲ ውግእ ኣይኪምሀሩን እዮም።

4ኣፍ እግዚኣብሄር ጐይታ ሰራዊት ተዛሪብዎ እዩ እሞ፡ ነፍሲ ወከፍ ኣብ ትሕቲ ተኽሊ ወይኑን ኣብ ትሕቲ ኦም በለሱን ኪቕመጥ እዩ፡ ዜፍርሆም ከአ የልቦን።

5ኩሎም እቶም ህዝብታት ነፍሲ ወከፎም በብስም ኣምላኾም ኪመላለሱ እዮም፡ ንሕናውን ንዘለአለም ብስም እግዚኣብሄር ኣምላኽና ኽንመላለስ ኢና።

6በታ መዓልቲ እቲኣ ነታ ሓንካስ ክእክባ ነታ እተሰጎትን ነታ አነ ዘጨነቕክዋን ክሕብረን እየ፡ ይብል እግዚኣብሄር።

7ነታ ሓንካስ ንተረፍ፡ ነታ ናብ ርሑቕ እተሰጎት ከአ ብርቱዕ ህዝቢ ኺገብረን እየ። እግዚኣብሄር ድማ ኣብ ልዕሊኦም ኣብ ከረን ጽዮን ካብ ሕጂ ንዘለአለም ኪነግስ እዩ።

8ኣታ ግምቢ መጓሰ፡ ኣታ ኹርባ ጓል ጽዮን፡ ናባኻ ኽትመጽእ፡ እወ እታ ጥንታዊት ግዝኣት፡ እታ መንግስቲ ጓል ዮርሳሌም ክትመጸካ እያ።

9እምበኣርሲ ስለምንታይ ደአ ዓው ኢልኪ እትጭድሪ፡ ከም እትሐርስ ሰበይቲ ቕልውላው ዚሕዘክስ፡ ንጉስዶ ኣብ ማእከልኪ የሎን፡ መኻሪኸዶ ጠፊኡ እዩ፡

10ኣቲ ጓል ጽዮን፡ ሕጂ ኻብታ ኸተማ ኽትወጺ፡ ኣብ መሮር ከአ ክትሰፍሪ፡ ክሳዕ ባቢሎን ድማ ክትመጺ ኢኺ። ኣብኡ ኽትድሕኒ ኢኺ፡ ኣብኡ እግዚኣብሄር ካብ ኢድ ጸላእትኺ ኺብጀወኪ እዩ እሞ፡ ከም እትሐርስ ሰበይቲ አቕለለውን ተጨነቕን።

11ሕጂ ኸአ፡ ትርከስ፡ ኣዒንትና ድማ ናብ ጽዮን ይጠምታ፡ ዚብሉ ብዙሓት ህዝብታት ተአከቡኺ።

12ንሳቶም ግና ሓሳብ እግዚኣብሄር ኣይፈለጡን ምኽሩውን ኣየስተውዐሉን፡ ንሱስ ከም እንዳእቲ ናብ ዓውዲ ይእክቦም አሎ።

13ኣቲ ጓል ጽዮን፡ ቀርንኺ ሓጺን፡ ሾኾናኺ ድማ ነሓሲ ኽገብሮ እየ እሞ፡ ተንስኢ ኣኺዲ፡ ብዙሓት ህዝብታት ከአ ክትሰባብሪ ኢኺ፡ ኣነውን ዘመቲኦም ንእግዚኣብሄር፡ ሃብቶም ድማ ንጐይታ ኹላ ምድሪ ክቕድሶ እየ።

← Chapter 3 Jump to: Chapter 5 →