Mark 14

Arabic Bible Morocco Version - 2012 (الترجمة المغربية القياسية)

1الْفَصْلْ رْبَعْطَاشْ وْقْبَلْ عِيدْ الْفِصْحْ وْعِيدْ الْخُبْزْ الْفْطِيرْ بْيُومَيْنْ، نَاضُو الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ كَيْقَلّْبُو كِيفَاشْ يْشَدُّو يَسُوعْ بْالْحِيلَة وْيْقْتْلُوهْ،

2وَلَكِنْ ݣَالُو: «مَا نْدِيرُوشْ هَادْشِّي فْالْعِيدْ، بَاشْ مَا تْنُوضْشْ الْفُوضَى وَسْطْ الشَّعْبْ».

3وْكَانْ يَسُوعْ فْبَيْتْ عَنْيَا فْدَارْ سِمْعَانْ الْمْجْدَامْ. وْمْلِّي كَانْ ݣَالْسْ كَيَاكُلْ، دْخْلَاتْ وَاحْدْ الْمْرَاة عَنْدْهَا قَرْعَةْ الرِّيحَة دْيَالْ النَّارْدِينْ الْحُرّْ غَالْيَة بْزَّافْ، وْهَرّْسَاتْ الْقَرْعَة وْكْبَّاتْهَا عْلَى رَاسْ يَسُوعْ.

4وْمَا عْجَبْشْ الْحَالْ شِي وْحْدِينْ كَانُو حَاضْرِينْ تْمَّ وْݣَالُو: «عْلَاشْ ضَيّْعَاتْ هَادْ الرِّيحَة؟

5حِيتْ كَانْتْ تْقْدَرْ تّْبَاعْ بْكْتَرْ مْنْ تْلْتْمِيَةْ دِينَارْ وْيْتّْفَرّْقْ تَمَنْهَا عْلَى الْفُقَرَا!». وْتّْقَلّْقُو وْخَاصْمُو عْلِيهَا.

6وَلَكِنْ يَسُوعْ ݣَالْ لِيهُمْ: «خَلِّيوْهَا عْلِيكُمْ، عْلَاشْ كَتْصَدّْعُوهَا؟ رَاهْ مَا دَارْتْ مْعَايَ غِيرْ الْخِيرْ،

7حِيتْ الْفُقَرَا دِيمَا مْعَاكُمْ، وْوَقْتْمَا بْغِيتُو تْقَدْرُو تْدِيرُو مْعَاهُمْ الْخِيرْ، أَمَّا أَنَا مَا غَادِيشْ نْكُونْ مْعَاكُمْ دِيمَا،

8وْهَادْ الْمْرَاة دَارْتْ اللِّي قَدْرَاتْ عْلِيهْ، وْدْهْنَاتْ بْالرِّيحَة الدَّاتْ دْيَالِي بَاشْ تْوَجّْدْنِي لْلدّْفِينْ.

9نْݣُولْ لِيكُمْ الْحَقّْ: فِينْ مَا خَبّْرُو النَّاسْ بْهَادْ الْبْشَارَة فْالدّْنْيَا كُلّْهَا، غَادِي يْتّْكَلّْمُو عْلَى هَادْشِّي اللِّي دَارْتْ هَادْ الْمْرَاة وْيْتّْفَكّْرُوهَا».

10وْمْنْ بَعْدْ مْشَى يَهُودَا الْإِسْخَرْيُوطِي، اللِّي هُوَ وَاحْدْ مْنْ التّْلَامْدْ الطّْنَاشْ، لْعَنْدْ الرُّؤَسَا دْ رْجَالْ الدِّينْ بَاشْ يْسَلّْمْ لِيهُمْ يَسُوعْ.

11وْمْلِّي سْمْعُوهْ فْرْحُو بْكْلَامُه، وْوَاعْدُوهْ بَاشْ يْعْطِيوْهْ الْفْلُوسْ. وْبْدَا يَهُودَا كَيْقَلّْبْ عْلَى الْوْجْبَة اللِّي غَيْسَلّْمْ فِيهَا يَسُوعْ.

12وْفْالنّْهَارْ اللّْوّْلْ دْيَالْ عِيدْ الْخُبْزْ الْفْطِيرْ، اللِّي فِيهْ كَيْدَبْحُو الْخْرْفَانْ دْيَالْ عِيدْ الْفِصْحْ، سْوّْلُو التّْلَامْدْ يَسُوعْ: «فِينْ بْغِيتِينَا نْمْشِيوْ نْوَجّْدُو لِيكْ الْعْشَا دْيَالْ عِيدْ الْفِصْحْ اللِّي غَتَّاكُلْ؟».

13وْصِيفْطْ جُوجْ مْنْ التّْلَامْدْ دْيَالُه وْݣَالْ لِيهُمْ: «سِيرُو لْلْمْدِينَة، وْرَاهْ غَيْتّْلَاقَاكُمْ وَاحْدْ الرَّاجْلْ هَازّْ ݣْلَّة دْ الْمَا، سِيرُو تْبْعُوهْ.

14وْالدَّارْ اللِّي غَيْدْخَلْ لِيهَا، ݣُولُو لْمُولَاهَا: ݣَالْ لِيكْ سِيدْنَا فِينْ هُوَ بِيتْ الضّْيَافْ اللِّي غَنَاكُلْ فِيهْ الْعْشَا دْيَالْ عِيدْ الْفِصْحْ مْعَ التّْلَامْدْ دْيَالِي؟

15وْرَاهْ هُوَ غَيْوَرِّيكُمْ بِيتْ كْبِيرْ الْفُوقْ، مْفَرّْشْ وْمْصَايْبْ، وْتْمَّ وَجّْدُو لِينَا الْعْشَا».

16وْخَرْجُو التّْلَامْدْ بْجُوجْ وْمْشَاوْ لْلْمْدِينَة، وْلْقَاوْ كُلّْشِي كِمَا ݣَالْ لِيهُمْ يَسُوعْ. وْوَجّْدُو الْعْشَا دْ عِيدْ الْفِصْحْ.

17وْمْلِّي قَرّْبْ وَقْتْ الْعْشَا، جَا يَسُوعْ مْعَ التّْلَامْدْ الطّْنَاشْ.

18وْهُمَ ݣَالْسِينْ كَيْتّْعْشَّاوْ ݣَالْ لِيهُمْ يَسُوعْ: «نْݣُولْ لِيكُمْ الْحَقّْ: رَاهْ وَاحْدْ فِيكُمْ غَادِي يْسَلّْمْنِي، وْرَاهْ كَيَاكُلْ مْعَايَ».

19وْحَزْنُو التّْلَامْدْ دْيَالُه وْبْدَاوْ كَيْسْوّْلُوهْ وَاحْدْ مُورَا وَاحْدْ: «وَاشْ أَنَا؟»

20وْجَاوْبْهُمْ وْݣَالْ: «رَاهْ هُوَ وَاحْدْ مْنْ الطّْنَاشْ، اللِّي دَايْرْ مْعَايَ يْدُّه فْالطَّبْسِيلْ.

21رَاهْ وَلْدْ الْإِنْسَانْ غَيْمُوتْ كِمَا مْكْتُوبْ عْلِيهْ فْكْتَابْ اللَّهْ، وَلَكِنْ يَا وِيلْ هَادَاكْ الرَّاجْلْ اللِّي غَيْسَلّْمْ وَلْدْ الْإِنْسَانْ، كَانْ حْسَنْ لِيهْ كُونْ مَا تّْوْلَدْشْ».

22وْمْلِّي كَانُو كَيَاكْلُو، خْدَا يَسُوعْ الْخُبْزْ وْشْكَرْ اللَّهْ وْقَطّْعُه وْعْطَاهُمْ وْݣَالْ: «خُدُو كُولُو، هَادَا هُوَ الدَّاتْ دْيَالِي».

23وْمْنْ بَعْدْ خْدَا الْكَاسْ وْشْكَرْ اللَّهْ وْعْطَاهُمْ، وْهُمَ يْشَرْبُو مْنُّه كُلّْهُمْ،

24وْݣَالْ لِيهُمْ: «هَادَا هُوَ الدّْمْ دْيَالِي، الدّْمْ دْيَالْ الْعَهْدْ اللِّي غَيْسِيلْ عْلَى وْدّْ بْزَّافْ دْ النَّاسْ.

25نْݣُولْ لِيكُمْ الْحَقّْ: مْنْ الْيُومْ مَا غَنْعَاوْدْ نْشْرَبْ مْنْ عَصِيرْ الْعْنَبْ، حْتَّى يْجِي النّْهَارْ اللِّي غَنْشَرْبُه جْدِيدْ فْمَمْلَكَةْ اللَّهْ».

26وْمْنْ بَعْدْ سَبّْحُو اللَّهْ وْخَرْجُو وْمْشَاوْ لْجْبَلْ الزِّيتُونْ.

27وْݣَالْ لِيهُمْ يَسُوعْ: «فْهَادْ اللِّيلَة غَتْسَمْحُو فِيَّ كُلّْكُمْ، حِيتْ مْكْتُوبْ فْكْتَابْ اللَّهْ: غَنْضْرَبْ السّْرَّاحْ وْيْتّْشَتّْتُو الْخْرْفَانْ دْيَالْ الْقْطْعَة دْ الْغْنَمْ.

28وَلَكِنْ مْنْ بَعْدْمَا نْتّْبْعَتْ مْنْ الْمُوتْ، غَنْسْبَقْكُمْ لْلْجَلِيلْ».

29وْݣَالْ لِيهْ بُطْرُسْ: «وَاخَّا يْشَكُّو فِيكْ كُلّْهُمْ، أَنَا عَمّْرِي مَا نْشْكّْ فِيكْ!».

30وْݣَالْ لِيهْ يَسُوعْ: «نْݣُولْ لِيكْ الْحَقّْ: رَاهْ فْهَادْ اللِّيلَة وْقْبَلْ مَا يْصِيحْ الْفْرُّوجْ جُوجْ دْ الْمَرَّاتْ، غَتْنْكَرْنِي تْلَاتَة دْ الْمَرَّاتْ».

31وَلَكِنْ بُطْرُسْ بْقَى كَيْݣُولْ وْكَيْأَكّْدْ: «وَاخَّا نْعْرَفْ نْمُوتْ مْعَاكْ مَا غَادِيشْ نّْكْرَكْ!» وْهَادْشِّي اللِّي ݣَالُو لِيهْ التّْلَامْدْ كُلّْهُمْ.

32وْمْشَاوْ لْوَاحْدْ الجّْنَانْ سْمِيتُه جَتْسِيمَانِي، وْݣَالْ لْلتّْلَامْدْ دْيَالُه: «ݣَلْسُو هْنَا بِينْمَا نْصَلِّي».

33وْمْنْ بَعْدْ دَّا مْعَاهْ بُطْرُسْ وْيَعْقُوبْ وْيُوحَنَّا، وْبْدَا كَيْحَسّْ بْالْهَمّْ وْالْغَمّْ.

34وْهُوَ يْݣُولْ لِيهُمْ: «نْفْسِي حْزِينَة بْزَّافْ حْتَّى لْلْمُوتْ، بْقَاوْ هْنَا وْسَهْرُو».

35وْبَعّْدْ عْلِيهُمْ شْوِيَّة وْسْجَدْ عْلَى الْأَرْضْ وْبْدَا كَيْصَلِّي بَاشْ إِلَا مُمْكِنْ يْبَعّْدْ عْلِيهْ اللَّهْ السَّاعَة دْيَالْ الْعْدَابْ.

36وْݣَالْ: «آ بَّا! آ الْآبْ! نْتَ قَادْرْ عْلَى كُلّْشِي، بَعّْدْ عْلِيَّ هَادْ الْمْحْنَة، وَلَكِنْ مَاشِي كِيفْ بْغِيتْ أَنَا، لَكِنْ كِيفْ بْغِيتِي نْتَ».

37وْمْنْ بَعْدْ رْجَعْ لْعَنْدْهُمْ وْلْقَاهُمْ نَاعْسِينْ، وْݣَالْ لْبُطْرُسْ: «آ سِمْعَانْ، وَاشْ نْعَسْتِي؟ وَاشْ مَا قْدَرْتِيشْ تْسْهَرْ حْتَّى سَاعَة وَحْدَة؟

38سْهْرُو وْصَلِّيوْ بَاشْ مَا تْطِيحُوشْ فْالتَّجْرِبَة، رَاهْ الرُّوحْ قْوِيَّة وَلَكِنْ الدَّاتْ ضْعِيفَة».

39وْمْشَى عَاوْتَانِي وْصْلَّى نَفْسْ الصّْلَاة.

40وْعَاوْدْ رْجَعْ وْلْقَاهُمْ نَاعْسِينْ، حِيتْ غْلَبْ عْلِيهُمْ النّْعَاسْ، وْمَا عَرْفُو بْآشْ يْجَاوْبُوهْ.

41وْرْجَعْ عَنْدْهُمْ فْالْمَرَّة التَّالْتَة وْݣَالْ لِيهُمْ: «وَاشْ بَاقْيِينْ نَاعْسِينْ وْمْرْتَاحِينْ؟ كُلّْشِي كْمَلْ! السَّاعَة قَرّْبَاتْ. هَا هُوَ وَلْدْ الْإِنْسَانْ غَادِي يْتّْسَلّْمْ لْلْيْدِّينْ دْيَالْ الْمُدْنِبِينْ.

42نُوضُو نْمْشِيوْ! هَا هَادَاكْ اللِّي غَيْسَلّْمْنِي، جَايْ!»

43وْفْدِيكْ السَّاعَة مْلِّي كَانْ كَيْتّْكَلّْمْ يَسُوعْ، وْصَلْ يَهُودَا اللِّي هُوَ وَاحْدْ مْنْ الطّْنَاشْ، وْمْعَاهْ جْمَاعَة كْبِيرَة مْسَلّْحِينْ بْالسّْيُوفَ وْالزّْرَاوْطْ، صِيفْطُوهُمْ الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ وْالشّْيُوخْ.

44وْهَادَاكْ اللِّي غَيْسَلّْمْ يَسُوعْ كَانْ عْطَاهُمْ وَاحْدْ الْعَلَامَة وْݣَالْ لِيهُمْ: «الرَّاجْلْ اللِّي غَنْبُوسُه رَاهْ هُوَ هَادَاكْ، شْدُّوهْ! وْدِّيوْهْ وْعْسُّو عْلِيهْ مْزْيَانْ».

45وْفْدِيكْ السَّاعَة قَرّْبْ يَهُودَا لْيَسُوعْ وْݣَالْ لِيهْ: «آ سِيدِي!» وْبَاسُه.

46وْهُمَ يْشَنْقُو عْلِيهْ وْشْدُّوهْ.

47وْوَاحْدْ مْنْ هَادُوكْ اللِّي كَانُو حَاضْرِينْ مْعَ يَسُوعْ جْبْدْ السِّيفْ، وْضْرَبْ الْعَبْدْ دْيَالْ رَئِيسْ رْجَالْ الدِّينْ، وْهُوَ يْقْطَعْ لِيهْ وْدْنُه.

48وْجَاوْبْهُمْ يَسُوعْ وْݣَالْ: «مَالْكُمْ جَايِّينْ بْالسّْيُوفَ وْالزّْرَاوْطْ بَاشْ تْشَدُّونِي بْحَالْ شِي شْفَّارْ؟

49يَاكْ كْنْتْ كُلَّ نْهَارْ مْعَاكُمْ فْبِيتْ اللَّهْ كَنْعَلّْمْ وْمَا شْدِّيتُونِيشْ! وَلَكِنْ هَادْشِّي وْقَعْ بَاشْ يْتّْحَقّْقْ دَاكْشِّي اللِّي فْكْتَابْ اللَّهْ».

50وْدِيكْ السَّاعَة سْمْحُو فِيهْ كُلّْهُمْ وْهَرْبُو.

51وْتْبْعُه وَاحْدْ الشَّابْ مَا لَابْسْ وَالُو مْنْ غِيرْ يْزَارْ مَلْوِي عْلِيهْ، وْهُمَ يْشَدُّوهْ.

52وَلَكِنْ سْمَحْ فْلِيزَارْ وْهْرَبْ عْرْيَانْ.

53وْدَّاوْ يَسُوعْ عَنْدْ الرَّئِيسْ دْ رْجَالْ الدِّينْ، وْتّْجَمْعُو تْمَّ ݣَاعْ الرُّؤَسَا دْ رْجَالْ الدِّينْ وْالشّْيُوخْ وْالْعُلَمَا دْ الشّْرَعْ.

54وْتْبَعْ بُطْرُسْ يَسُوعْ مْنْ بْعِيدْ حْتَّى لْدَاخْلْ دْيَالْ دَارْ رَئِيسْ رْجَالْ الدِّينْ، وْݣْلَسْ مْعَ الْخْدَّامَا كَيْسْخُنْ قُدَّامْ الْعَافْيَة.

55وْكَانُو الرُّؤَسَا دْ رْجَالْ الدِّينْ وْݣَاعْ كْبَارْ الْمَحْكَمَة، كَيْقَلّْبُو عْلَى شِي شْهَادَة ضْدّْ يَسُوعْ بَاشْ يْقْتْلُوهْ، وَلَكِنْ مَا لْقَاوْشْ.

56حِيتْ بْزَّافْ اللِّي شْهْدُو عْلِيهْ بْالزُّورْ، وَلَكِنْ مَا كَانُوشْ مْتَّافْقِينْ عْلَى شْهَادَة وَحْدَة.

57وْنَاضُو شِي وْحْدِينْ وْشْهْدُو عْلِيهْ بْالزُّورْ وْݣَالُو:

58«سْمَعْنَاهْ كَيْݣُولْ: غَنْرَيّْبْ هَادْ بِيتْ اللَّهْ اللِّي مْبْنِي بْيْدّْ بْنَادْمْ، وْفْتْلْتْ يَّامْ غَنْبْنِي وَاحْدْ آخُرْ مَا مْبْنِيشْ بْيْدّْ بْنَادْمْ».

59وَاخَّا هَادْشِّي، مَا كَانْتْشْ الشّْهَادَة دْيَالْهُمْ كَتْتَّافْقْ.

60وْنَاضْ الرَّئِيسْ دْ رْجَالْ الدِّينْ فْالْوَسْطْ وْسْوّْلْ يَسُوعْ وْݣَالْ: «وَاشْ مَا غَتْجَاوْبْ حْتَّى بْشِي حَاجَة عْلَى هَادْشِّي اللِّي كَيْشَهْدُو بِيهْ هَادُو ضْدّْكْ؟».

61وَلَكِنْ يَسُوعْ بْقَى سَاكْتْ، وْمَا جَاوْبْ حْتَّى بْكْلْمَة. وْعَاوْدْ سْوّْلُه الرَّئِيسْ دْ رْجَالْ الدِّينْ وْݣَالْ لِيهْ: «وَاشْ نْتَ هُوَ الْمَسِيحْ وَلْدْ اللَّهْ الْمُبَارَكْ؟».

62وْجَاوْبْ يَسُوعْ: «أَنَا هُوَ! وْغَتْشُوفُو وَلْدْ الْإِنْسَانْ ݣَالْسْ عْلَى لِيمْنْ دْيَالْ اللَّهْ الْقَادْرْ عْلَى كُلّْشِي، وْجَايّْ فْسْحَابْ السّْمَا!».

63وْشَرّْݣْ الرَّئِيسْ دْ رْجَالْ الدِّينْ حْوَايْجُه ، وْݣَالْ: «مَا بْقَى عَنْدْنَا مَا نْدِيرُو بْالشّْهُودْ!

64رَاكُمْ سْمَعْتُو كْلَامْ الْكُفْرْ، آشْ بَانْ لِيكُمْ؟». وْكُلّْهُمْ حْكْمُو عْلِيهْ بْلِّي يْسْتَاهْلْ الْمُوتْ.

65وْبْدَاوْ شِي وْحْدِينْ كَيْدْفْلُو عْلِيهْ، وْغْطَّاوْ لِيهْ وْجْهُه وْضْرْبُوهْ وْسْوّْلُوهْ: «يَالَّاهْ تّْنَبّْأْ؟». وْنَاضُو الْخْدَّامَا كَيْصَرْفْقُوهْ.

66وْمْلِّي كَانْ بُطْرُسْ مَازَالْ لْتَحْتْ فْالْمْرَاحْ دْيَالْ الدَّارْ، جَاتْ وَحْدَة مْنْ الْخْدَّامَاتْ دْيَالْ الرَّئِيسْ دْ رْجَالْ الدِّينْ.

67وْغِيرْ شَافْتْ بُطْرُسْ وْهُوَ كَيْسْخُنْ، حَقّْقَاتْ فِيهْ وْݣَالْتْ: «حْتَّى نْتَ كْنْتِ مْعَ يَسُوعْ اللِّي مْنْ النَّاصِرَة!».

68وَلَكِنْ نْكَرْ وْݣَالْ: «مَا عْرَفْتْشْ وْمَا فْهَمْتْشْ آشْ كَتْݣُولِي!». وْخْرَجْ وْمْشَى لْلدّْخْلَة دْيَالْ الدَّارْ، وْفْدِيكْ السَّاعَة صَاحْ الْفْرُّوجْ.

69وْعَاوْتَانِي شَافْتُه الْخْدَّامَة وْبْدَاتْ كَتْݣُولْ لْهَادُوكْ اللِّي كَانُو تْمَّ: «هَادَا رَاهْ وَاحْدْ مْنّْهُمْ!».

70وْنْكَرْ مَرَّة خْرَى. وْمْنْ بَعْدْ شْوِيَّة ݣَالُو لِيهْ هَادُوكْ اللِّي كَانُو تْمَّ: «بْلَا شْكّْ نْتَ وَاحْدْ مْنّْهُمْ، حِيتْ نْتَ مْنْ الْجَلِيلْ».

71وْبْدَا كَيْلْعَنْ وْكَيْحْلَفْ: «أَنَا ݣَاعْ مَا كَنْعْرَفْ هَادْ الرَّاجْلْ اللِّي كَتْهَضْرُو عْلِيهْ!».

72وْفْدِيكْ السَّاعَة صَاحْ الْفْرُّوجْ لْلْمَرَّة التَّانْيَة. وْهُوَ يْتّْفَكّْرْ بُطْرُسْ الْكْلَامْ اللِّي ݣَالْ لِيهْ يَسُوعْ: «قْبَلْ مَا يْصِيحْ الْفْرُّوجْ جُوجْ دْ الْمَرَّاتْ، غَتْنْكَرْنِي تْلَاتَة دْ الْمَرَّاتْ». وْبْدَا كَيْبْكِي بْزَّافْ.

← Chapter 13 Jump to: Chapter 15 →