Mark 10

Arabic Bible Morocco Version - 2012 (الترجمة المغربية القياسية)

1الْفَصْلْ الْعَاشْرْ وْخْرَجْ يَسُوعْ مْنْ تْمَّ وْمْشَى لْجْوَايْهْ الْيَهُودِيَّة اللِّي مْنْ الجِّهَة لْخْرَى دْيَالْ وَادْ الْأُرْدُنْ، وْعَاوْدْ تّْجَمْعُو عْلِيهْ بْزَّافْ دْ الجّْمَاعَاتْ دْ النَّاسْ وْكِمَا الْعَادَة دْيَالُه بْدَا كَيْعَلّْمْهُمْ عَاوْتَانِي.

2وْقَرّْبُو لْعَنْدُه الْفْرِّيسِيِّينْ وْسْوّْلُوهْ بَاشْ يْجَرّْبُوهْ: «وَاشْ حْلَالْ يْطَلّْقْ الرَّاجْلْ مْرَاتُه؟».

3وْهُوَ يْجَاوْبْهُمْ وْݣَالْ: «بْآشْ وْصَّاكُمْ مُوسَى؟»،

4وْݣَالُو لِيهْ: «مُوسَى سْمَحْ لْلرَّاجْلْ بَاشْ يْعْطِي لْمْرَاتُه وَرْقَةْ الطّْلَاقْ وْيْصِيفْطْهَا».

5وْهُوَ يْݣُولْ لِيهُمْ يَسُوعْ: «رَاهْ عْلَى وْدّْ قْسُوحِيَّةْ قْلُوبْكُمْ كْتَبْ لِيكُمْ مُوسَى هَادْ الْوْصِيَّة،

6وَلَكِنْ رَاهْ مْنْ الْبْدُو، مْلِّي خْلَقْ اللَّهْ الدّْنْيَا، خْلَقْ بْنَادْمْ دْكَرْ وْنْتْوَى.

7هَادْشِّي عْلَاشْ غَيْخَلِّي الرَّاجْلْ بَّاهْ وْمُّه وْغَيْتَّاحْدْ مْعَ مْرَاتُه،

8وْغَيْوَلِّيوْ بْجُوجْ دَاتْ وَحْدَة، يَعْنِي مَا غَيْبْقَاوْشْ جُوجْ وَلَكِنْ غَيْوَلِّيوْ دَاتْ وَحْدَة.

9وْاللِّي جْمْعُه اللَّهْ مَا يْقْدَرْشْ يْفَرّْقُه بْنَادْمْ».

10وْمْلِّي رْجْعُو لْلدَّارْ، عَاوْدُو سْوّْلُوهْ التّْلَامْدْ دْيَالُه عْلَى هَادْ الْقَضِيَّة،

11وْݣَالْ لِيهُمْ يَسُوعْ: «اللِّي طَلّْقْ مْرَاتُه وْتّْزَوّْجْ بْوَحْدَة خْرَى، رَاهْ كَيْفْسَدْ مْعَاهَا،

12وْإِلَا طَلّْقَاتْ الْمْرَاة رَاجْلْهَا وْتّْزَوّْجَاتْ بْرَاجْلْ آخُرْ، رَاهَا كَتْفْسَدْ».

13وْجَابُو لِيهْ النَّاسْ شِي وْلَادْ صْغَارْ بَاشْ يْحَطّْ يْدِّيهْ عْلِيهُمْ، وَلَكِنْ التّْلَامْدْ خَاصْمُو عْلَى اللِّي جَابُوهُمْ.

14وْشَافْ يَسُوعْ دَاكْشِّي وْتّْقَلّْقْ وْݣَالْ: «خَلِّيوْ الدّْرَارِي يْجِيوْ لْعَنْدِي وْمَا تْحَبْسُوهُمْشْ، عْلَاحْقَّاشْ بْحَالْ هَادُو اللِّي لِيهُمْ مَمْلَكَةْ اللَّهْ.

15وْرَانِي نْݣُولْ لِيكُمْ الْحَقّْ: اللِّي مَا كَيْقْبَلْشْ مَمْلَكَةْ اللَّهْ بْحَالْ شِي وَلْدْ صْغِيرْ، عَمّْرُه مَا غَيْدْخَلْ لِيهَا».

16وْعَنّْقْ يَسُوعْ الدّْرَارِي وْحَطّْ يْدِّيهْ عْلِيهُمْ وْبَارْكْهُمْ.

17وْمْلِّي خْرَجْ يَسُوعْ لْلطّْرِيقْ، جْرَّى لْعَنْدُه وَاحْدْ الرَّاجْلْ وْطَاحْ قُدَّامُه عْلَى رْكَابِيهْ وْسْوّْلُه: «آ الْمُعَلِّمْ الْمْزْيَانْ، أَشْنُو اللِّي يْمْكَنْ لِي نْدِيرْ بَاشْ نْوْرَتْ الْحَيَاةْ الدَّايْمَة؟».

18وْجَاوْبُه يَسُوعْ: «عْلَاشْ كَتْݣُولْ لِيَّ آ الْمْزْيَانْ؟ رَاهْ مَا كَايْنْ حْتَّى شِي وَاحْدْ مْزْيَانْ مْنْ غِيرْ اللَّهْ بُوحْدُه.

19الْوْصِيَّاتْ رَاكْ كَتْعَرْفْهُمْ: مَا تْقْتَلْ، مَا تْفْسَدْ، مَا تْسْرَقْ، مَا تْشْهَدْ بْالزُّورْ، مَا تْغَشّْ، تّْهَلَّى فْبَّاكْ وْمُّكْ».

20وْهُوَ يْݣُولْ لِيهْ الرَّاجْلْ: «آ الْمُعَلِّمْ، رَانِي دْرْتْ بْهَادْ الْوْصِيَّاتْ كُلّْهُمْ مْنْ صُغْرِي».

21وْشَافْ فِيهْ يَسُوعْ بْالْمْحَبَّة وْݣَالْ لِيهْ: «نَاقْصَاكْ حَاجَة وَحْدَة: سِيرْ بِيعْ ݣَاعْ دَاكْشِّي اللِّي كَتْمْلَكْ وْعْطِي تَمَنُه لْلْمَسَاكِينْ وْغَيْكُونْ عَنْدْكْ كَنْزْ فْالسّْمَا، وْأَجِي تْبَعْنِي».

22وْتّْصْدَمْ الرَّاجْلْ مْلِّي سْمَعْ هَادْ الْكْلَامْ وْمْشَى حْزِينْ حِيتْ كَانْ لَبَاسْ عْلِيهْ بْزَّافْ.

23وْشَافْ يَسُوعْ فْاللِّي ضَايْرِينْ بِيهْ وْݣَالْ لْتْلَامْدُه: «شْحَالْ صْعِيبْ عْلَى النَّاسْ اللِّي لَبَاسْ عْلِيهُمْ يْدَخْلُو لْمَمْلَكَةْ اللَّهْ!».

24وْتّْعَجّْبُو التّْلَامْدْ مْنْ كْلَامُه، وْعَاوْدْ ݣَالْ لِيهُمْ: «آ وْلَادِي، شْحَالْ صْعِيبْ عْلَى الْوَاحْدْ بَاشْ يْدْخَلْ لْمَمْلَكَةْ اللَّهْ.

25رَاهْ دْخُولْ الجّْمَلْ مْنْ عِينْ لِيبْرَة سْهَلْ مْنْ الدّْخُولْ دْيَالْ اللِّي لَبَاسْ عْلِيهْ لْمَمْلَكَةْ اللَّهْ».

26وْتّْعَجّْبُو التّْلَامْدْ بْزَّافْ وْݣَالُو لْبَعْضِيَّاتْهُمْ: «إِيوَا عْلَى هَادْ الْحْسَابْ شْكُونْ اللِّي غَيْقْدَرْ يْنْجَا؟».

27وْشَافْ فِيهُمْ يَسُوعْ وْݣَالْ: «رَاهْ النَّاسْ مَا يْقَدْرُوشْ عْلَى هَادْشِّي، وَلَكِنْ اللَّهْ يْقْدَرْ، حِيتْ اللَّهْ قَادْرْ عْلَى كُلّْشِي».

28وْبْدَا بُطْرُسْ كَيْݣُولْ لِيهْ: «هَا حْنَا خَلِّينَا كُلّْشِي وْتْبَعْنَاكْ».

29وْݣَالْ لِيهْ يَسُوعْ: «نْݣُولْ لِيكُمْ الْحَقّْ، كُلّْ وَاحْدْ سْمَحْ فْدَارُه، وْلَا خُوتُه، وْلَا خْوَاتَاتُه، وْلَا مُّه، وْلَا بَّاهْ، وْلَا وْلَادُه، وْلَا الْأَرَاضِي دْيَالُه عْلَى قْبْلِي وْعْلَى قْبَلْ الْبْشَارَة،

30رَاهْ غَادِي يْتّْرَدّْ لِيهْ فْهَادْ الدّْنْيَا -وَاخَّا غَيْكُونْ التَّعَدُّو- دَاكْشِّي اللِّي سْمَحْ فِيهْ عْلَى مْيَةْ مَرَّة، مْنْ الدّْيُورْ، وْالْخُوتْ، وْالْخْوَاتَاتْ، وْالْمَّاوَاتْ، وْالْوْلَادْ، وْالْأَرَاضِي. وْفْالْآخِرَة غَتْكُونْ لِيهْ الْحَيَاةْ الدَّايْمَة.

31رَاهْ بْزَّافْ مْنْ هَادُوكْ اللِّي كَانُو هُمَ اللّْوّْلِينْ غَادِي يْوَلِّيوْ هُمَ اللّْخْرِينْ، وْبْزَّافْ اللِّي كَانُو اللّْخْرِينْ غَادِي يْوَلِّيوْ هُمَ اللّْوّْلِينْ».

32وْكَانْ يَسُوعْ وْالتّْلَامْدْ دْيَالُه مْسَافْرِينْ لْأُورْشَلِيمْ وْيَسُوعْ قُدَّامْهُمْ، وْكَانُو التّْلَامْدْ حَايْرِينْ، وْالنَّاسْ اللِّي تَابْعِينُه كَانُو خَايْفِينْ. وْجْمَعْ يَسُوعْ مَرَّة خْرَى التّْلَامْدْ الطّْنَاشْ وْبْدَا كَيْخَبّْرْهُمْ عْلَى دَاكْشِّي اللِّي غَادِي يْوْقَعْ لِيهْ،

33وْݣَالْ لِيهُمْ: «هَا حْنَا طَالْعِينْ لْأُورْشَلِيمْ، وْوَلْدْ الْإِنْسَانْ غَيْسَلّْمُوهْ لْلرُّؤَسَا دْ رْجَالْ الدِّينْ وْالْعُلَمَا دْ الشّْرَعْ، وْغَيْحَكْمُو عْلِيهْ بْالْمُوتْ وْغَيْسَلّْمُوهْ لْلشّْعُوبْ اللِّي مَاشِي يْهُودْ،

34وْغَيْضَحْكُو عْلِيهْ وْغَيْدْفْلُو عْلِيهْ وْغَيْصَوّْطُوهْ وْغَيْقْتْلُوهْ، وْمْنْ بَعْدْ تْلْتْ يَّامْ غَيْتّْبْعَتْ مْنْ الْمُوتْ».

35وْقَرّْبْ يَعْقُوبْ وْيُوحَنَّا وْلَادْ زَبَدِي لْعَنْدْ يَسُوعْ وْݣَالُو لِيهْ: «آ الْمُعَلِّمْ، بْغِينَاكْ تْدِيرْ لِينَا ݣَاعْ دَاكْشِّي اللِّي غَنْطْلْبُوهْ مْنّْكْ».

36وْسْوّْلْهُمْ يَسُوعْ: «آشْ بْغِيتُونِي نْدِيرْ لِيكُمْ؟».

37وْجَاوْبُوهْ: «وَافْقْ لِينَا بَاشْ يْݣْلَسْ وَاحْدْ مْنَّا عْلَى لِيمْنْ دْيَالْكْ وْوَاحْدْ آخْرْ عْلَى لِيسْرْ دْيَالْكْ مْلِّي تْكُونْ فْالْعَزّْ دْيَالْكْ».

38وْݣَالْ لِيهُمْ يَسُوعْ: «رَاكُمْ مَا كَتْعَرْفُوشْ آشْ كَتْطْلْبُو: وَاشْ تْقَدْرُو تْشَرْبُو مْنْ الْكَاسْ اللِّي غَنْشْرَبْ مْنُّه أَنَا، وْلَا وَاشْ تْقَدْرُو تْتْعَمّْدُو بْالْمَعْمُودِيَّة اللِّي غَنْتْعَمّْدْ بِيهَا أَنَا؟».

39وْݣَالُو لِيهْ: «إِيِّهْ نْقَدْرُو!». وْݣَالْ لِيهُمْ: «الْكَاسْ اللِّي غَنْشْرَبْ مْنُّه أَنَا، غَتْشَرْبُو مْنُّه حْتَّى نْتُمَ، وْالْمَعْمُودِيَّة اللِّي غَنْتْعَمّْدْ بِيهَا أَنَا، غَتّْعَمْدُو بِيهَا حْتَّى نْتُمَ.

40وَلَكِنْ الْݣْلَاسْ عْلَى لِيمْنْ دْيَالِي وْلَا عْلَى لِيسْرْ دْيَالِي مَاشِي أَنَا اللِّي غَادِي نْعْطِيهْ، وَلَكِنْ غَادِي يْتّْعْطَى لْهَادُوكْ اللِّي وَجّْدُو لِيهُمْ اللَّهْ».

41وْمْلِّي سْمْعُو التّْلَامْدْ الْعَشْرَة هَادْ الْكْلَامْ، تْقَلّْقُو بْزَّافْ عْلَى يَعْقُوبْ وْيُوحَنَّا.

42وْعَيّْطْ لِيهُمْ يَسُوعْ وْݣَالْ: «كَتْعَرْفُو بْلِّي هَادُوكْ اللِّي كَيْحَسْبُو رَاسْهُمْ الرُّؤَسَا دْ الشّْعُوبْ هُمَ سْيَادْ هَادْ الشّْعُوبْ، وْالْمْسْؤُولِينْ الْكْبَارْ كَيْفَرْضُو السُّلْطَة دْيَالْهُمْ عْلَى كُلّْ وَاحْدْ تَحْتْ مْنّْهُمْ.

43وَلَكِنْ نْتُمَ بِينَاتْكُمْ مَا خَاصّْكُمْشْ تْكُونُو بْحَالْهُمْ، اللِّي بْغَا يْكُونْ كْبِيرْ فِيكُمْ، خَاصُّه يْوَلِّي الْخْدَّامْ دْيَالْكُمْ.

44وْاللِّي بْغَا يْكُونْ اللّْوّْلْ فِيكُمْ، خَاصُّه يْوَلِّي الْعَبْدْ دْيَالْ كُلّْشِي.

45حِيتْ حْتَّى وَلْدْ الْإِنْسَانْ مَا جَاشْ بَاشْ يْخَدْمُو عْلِيهْ النَّاسْ، وَلَكِنْ جَا بَاشْ يْخْدَمْ وْيْفْدِي بْزَّافْ دْ النَّاسْ بْحْيَاتُه».

46وْوْصَلْ يَسُوعْ هُوَ وْالتّْلَامْدْ دْيَالُه لْأَرِيحَا. وْمْلِّي كَانُو خَارْجِينْ مْنّْهَا مْعَ جْمَاعَة كْبِيرَة دْ النَّاسْ، كَانْ وَاحْدْ الْعْمَى سْمِيتُه بَارْتِيمَاوُسْ وَلْدْ تِيمَاوُسْ ݣَالْسْ فْجَنْبْ الطّْرِيقْ كَيْسْعَى.

47وْمْلِّي سْمَعْ بْلِّي يَسُوعْ اللِّي مْنْ النَّاصِرَة كَانْ دَايْزْ مْنْ تْمَّ، بْدَا كَيْغَوّْتْ وْكَيْݣُولْ: «آ يَسُوعْ بْنْ دَاوُدْ، رْحَمْنِي!».

48وْخَاصْمُو عْلِيهْ بْزَّافْ دْ النَّاسْ بَاشْ يْسْكُتْ، وَلَكِنْ زَادْ كَيْغَوّْتْ كْتَرْ وْكَيْݣُولْ: «آ بْنْ دَاوُدْ، رْحَمْنِي!».

49وْوْقَفْ يَسُوعْ وْݣَالْ لِيهُمْ: «عَيْطُو عْلِيهْ!». وْهُمَ يْعَيْطُو عْلَى الْعْمَى وْݣَالُو لِيهْ: «تْشَجّْعْ، نُوضْ! رَاهْ كَيْعَيّْطْ عْلِيكْ!».

50وْحَيّْدْ الْعْمَى جْلَّابْتُه وْنَقّْزْ وْجَا لْعَنْدْ يَسُوعْ.

51وْسْوّْلُه يَسُوعْ: «آشْ بْغِيتِي نْدِيرْ لِيكْ؟»، وْهُوَ يْجَاوْبُه الْعْمَى: «بْغِيتْ نْوَلِّي نْشُوفْ آ سِيدِي!».

52وْݣَالْ لِيهْ يَسُوعْ: «سِيرْ، الْإِيمَانْ دْيَالْكْ هُوَ اللِّي شْفَاكْ». وْفْدِيكْ السَّاعَة بْدَا كَيْشُوفْ مْنْ جْدِيدْ. وْتْبَعْ يَسُوعْ فْالطّْرِيقْ.

← Chapter 9 Jump to: Chapter 11 →