Esther 1

Aymara 1997

Jump to: Chapter 2 →

1Asuero reyix Persia jach'a marka apnaqkäna uka urunakan taqi akanakax lurasïna. Uka markasti pataka pä tunka paqallquni suyunakanïnwa, India chiqat qalltasa Etiopía chiqakama.

2Asuero reyin marka apnaqañ jach'a utapax Susa markan utt'ayatänwa.

3Asuero reyix marka apnaqäwip kimsa mara phuqkasaxa, mä jach'a phunchhäwi luräna, taqpach irnaqirinakapampitaki, jilïr yanapirinakapampitaki, ukatsti Persankiri, medonkir ejercitonakan jilïrinakaparuw jawsayäna, suyunakan jilïr mallkunakaparux jawsayarakïnwa.

4Reyisti marka apnaqäwipan qamir kankañap uñacht'ayañ amtampiw uka phunchhäwi luräna, jach'a ch'aman markanïtapa, jupan ch'amampi apnaqatap uñacht'ayañatakiraki. Uka phunchhäwisti chika marakamänwa,

5tukuyasinsti, reyix yaqha phunchhäwimp lurarakïna, jach'a utapan utjir panqar uyu anqäxana, ukasti paqallq urünwa. Uka phunchhäwirusti Susa markan jakir taqpach jaqinakaruw jawsayäna, khitinakatix wali aytat jaqinakäpkäna ukanakaru, ukhamarak jan aytatäpki ukanakarusa.

6Reyin jach'a utap anqäxasti suma k'achacht'atänwa, janq'u, sajuna cortinanakamp warkurt'ata, uka cortinanakasti linot lurt'at chupika wiskhar chint'atänwa, uka wiskhasti qullqit lurat argollanak taypi sarakipata, mármol qalat lurat sayir pirqanakar acht'ayatänwa. Ukatsti qurita, qullqit lurat qunuñanak uchapxarakïna, uta pampax janq'umpit ch'iyarampit suma k'ajkir qalanakampi uchatänwa.

7Umañanakxa qurita lurat qirunakat umapxäna, ukanakax yaqha, yaqha luratänwa, walja vinopuniw utjäna, reyin waxt'añax wakiski ukarjama.

8Ukampisa, reyix uywatanakapan jilïrinakaparux sataynawa, jan khitirus munkir jan munkir umayapxañapataki, jan ukasti sapa mayni jawsayatanakax qawqhtix munapki ukhamarjam umapxañapaki.

9Asuero reyin utapanxa, Vasti sat reinax phunchhäwir jawsayatanakan warminakapatakix jach'a manq'äwi wakicharakïna.

10Phunchhäwin paqallq urüxipansti, reyix vinomp umjasisax wali kusisitänwa, ukatsti Mehumán, Biztá, Harboná, Bigtá, Abagtá, Zetar, Carcás, jupan munasit uka paqallqu chachanakaruw khithäna,

11kankañ pillump ucht'at Vasti reinar irptanipxañapataki, ukhamat markampi, jach'a jilïr jaqinakampix suma uñnaqt'anïtapat muspharapxañapataki.

12Ukampis reinaxa, kuntix reyix jaqinakap tuqi arskäna ukarux janiw jaysañ munkänti. Uk yatisasti reyix walpun phiñasïna, ukham phiñasitaw

13kamachinakxat yatxatatanakar jiskt'asïna, reyin saraparjamax kamachinak uñt'irinakarupuniw kuna lurañatakis jiskt'asiñax wakisïna, ukhamat lurañanakapan chiqapar uñjatäñapataki.

14Reyin yanapir jaqinakapax paqallqunïnwa: Carsená, Setar, Admata, Tarsis, Meres, Marsená, Memucán ukanaka. Jupanakax Persia, Media uka markanakan wali aytat jaqinakänwa. Marka apnaqäwinsti, yäqat jilïr jaqinakarakïnwa.

15Reyisti jupanakarux jiskt'änwa: —Kamachi arunakarjamasti, ¿kun lurañas Vasti reinaru wakisi arunakaxar jan jaysatapatxa? —sasa.

16Ukatsti jach'a tantachasïwin jilïrinakap nayraqatan Memucán chachax reyir sarakïna: —Vasti reinax ukham luratapampix janiw juma reyiruki chuymam ust'aykiti, jan ukasti taqi jilïrinakaru, Asuero reyin taqi suyupankirinakaruw ust'ayaraki.

17Kuntix reinax lurki uksti taqi warminakaw yatipxani, ukatsti chachanakaparux janiw yäqañ munkxapxaniti, jupanakax sapxaniwa: ‘Asuero reyix Vasti reinar jawsayiriw khithi, reinasti janiw arunakapar jayskiti’ sasa.

18Persa, Media markankir jilïrinakan warminakapasti, kuntix reinax lurki uk yatisin jichhürpachaw chachanakapampix jaychasipxaspa, ukatsti jisk'achasiñanakampi, jachjayasiñanakampiw utjaspa.

19Ukhamasti, reyitaki walikïchi ukaxa, mä kamachi mistuypan, uka kamachix Persia, Media uka markankir kamachinakaparu qillqantatarakïpan, jan khitinsa p'akintkaya: ‘Vasti reinax janipuniw mayampis reyin ukarux jutañapäkxiti’ sasa. Reina kankañasti yaqha aski warmiru churatäxpan.

20Aka kamachix taqpach markanakan yatiyatäñapawa, ukhamat taqi warminakax chachanakapar yäqapxani, qamirïpasa, jan utjirinïpasa —sasa.

21Ukhamasti, Memucán sat chachan amuyt'äwipax reyitakisa, amuyt'ayir jilïr jaqinakapatakis walikïnwa. Ukat ukspachaw reyix mä kamachi mistuyäna.

22Ukatsti jach'a markapan utjir suyunakaruw qillqatanakap apayäna, sapa suyun utjir markanakan arupatkam qillqt'ata, uka qillqatansti sarakïnwa chachanakax utanakapan jilïr p'iqïpxañapataki, jupan pachpa arupat utanakapan parlapxañapatakiraki.

Jump to: Chapter 2 →

Recommended Reading

Commentary Esther Commentaries → Devotional Esther Devotional Guide → Get This Bible Aymara Study Bible →