Esther 4

Aymara 1997

← Chapter 3 Jump to: Chapter 5 →

1Mardoqueox taqi kunatix utjkäna ukanak yatisinxa, isip ch'iyanuqasïna, llakisiñat chhankha isimpiw ist'asïna, p'iqipxarusti qhillampiw warxatasïna, wararisa, jachasisaw markan sarnaqäna.

2Ukhampachaw reyin utap punkurux purïna. Ukampis chhankha isimp isthapitax janiw reyin utapar mantañax wakiskänti.

3Kawkha suyunakarutix reyin qillqatapax purkäna ukkhanxa, ukhamarakiw judionakax walpun llakisipxäna, jupanakax llakisiñatsa ayuno lurapxäna, jacht'asisa, wararisaw llakkañ ayqupxäna, waljaniw jupanakat qhillxar ikipxäna, ukatsti chhankha isinakampiw isthapisipxarakïna.

4Ester reinar luqtirinakampi, juparu uñjir chachanakampix kunatix markan utjkäna ukanak reinar yatiyapxäna. Reinasti uk yatisin wal llakthaptäna, ukatsti Mardoqueorux isinak apayäna chhankha isi lanti uchasiñapataki, ukampis Mardoqueox uka isxa janiw katuqasiñ munkänti.

5Ukat Ester reinax Hatac sat chachar jawsäna, ukhamarak reyin utap uñjir jilïriru, ukatsti kunatsa Mardoqueox chhankha isimp isthapitäpacha uk jiskt'ayiriw khithäna.

6Hatac chachasti Mardoqueomp parliriw saräna. Jupax marka plazankaskänwa, reyin utap punku uñkatasina.

7Mardoqueosti kunanakatix yatiskäna ukanak taqpach jupar yatiyäna, Amán chachax qawqha qullqtix judionakan jiwarayatäñapatak churañ amtkatayna uks yatiyarakïnwa.

8Ukatsti Susa markan judionakar jiwarayañatak reyin arsutapa qillqatat waraqata Ester reinar churañapatak katuyäna, ukhamat jupan taqpach yatiñapataki. Ester reynarusti jupa kipka reyimpi parlt'asa markapan qhispitäñapatak achikt'añapatakiw mayirakïna.

9Hatac chachasti kutt'xasin Ester reinaru kunanaktix Mardoqueox siskatayna ukanak yatiyäna.

10Ester reinasti wasitat Hatac chachar Mardoqueo ukar khithäna, akham sasa:

11“Reyir luqtirinakasa, reyin apnaqat suyunakankir jaqinakasa mä kamachi utjatap yatipxi, khitinakatix reyin jan jawskata jupar uñjiri utap manqhir mantapkani ukaruxa, chachäpasa, warmïpasa, jiwayatäñatak juchañchatawa. Reyitix uka jaqit khuyapt'ayasisin quri thujrup aytaspa ukkhakiw jiwañat qhispispa. Nayarusti, niya kimsa tunka uruw reyix jan jawsaykxituti” sasa.

12Mardoqueosti Ester reinan yatiyäwip katuqasinxa,

13reinarux akham iwxarakïna: “Ester, janiw jumaxa, reyin utapankatam laykukiti judeankir jaqïkasax jiwañat qhispkätati.

14Jichhatix jumax jan kuns kamskäta ukaxa, judionakan qhispiyasiñapax yaqha tuqit jutani. Ukampis jumasa, awkiman wila masinakapas jiwaraniwa. ¡Inas jumax markamankirinakar akham llakisiñanakan yanapt'añatak reinat utt'ayatäsksta!” sasa.

15Ester reinasti akham sasaw Mardoqueorux iwxarakïna:

16“Saram, Susa markankir taqi judionakar tantachthapim, ukatsti, nayatak ayuno lurapxpan, kimsa urumpi, kimsa arumampix jan kuns manq'apxpati, janirak kuns umapxpati. Nayampi, nayar luqtir uywatanakampisti uka kipkarak lurapxä; uka qhipat reyimp parlirix sarä, ukham lurasax kamachi p'akintañaxächin ukasa. Jiwayapxitan ukasti, jiwayasipkakitpan” sasa.

17Mardoqueosti sarasinxa, kunjämtix Ester reinax amuyt'aykäna ukhamarjamaw phuqharakïna.

← Chapter 3 Jump to: Chapter 5 →