Esther 2

Aymara 1997

← Chapter 1 Jump to: Chapter 3 →

1Ukat mä qawqha urunakatsti, Asuero reyix chuymap utt'ayasxasinxa, Vasti reinat amtasïna, kuntix reinax lurkatayna ukxata, ukhamarak reinar juchañchañ kamachi arunak mistuyatapata.

2Jilïri yanapirinakapasti sapxänwa: —Reyitakix suma uñnaqt'an jiwa tawaqunak thaqhañaw wakisi.

3Reyix jach'a markapankir sapa suyutxa yanapirinak utt'aypan, uka yanapirinakan suma uñnaqt'an tawaqunak thaqhapxañapataki. Jupanakasti, Susa suma utt'ayat markankir reyin jach'a utapan utjir warminakan utapar uka tawaqunakar irpanipxarakpan. Ukatsti warminakan utap uñjiri, reyin uñt'at Hegai sat chacharaki uka tawaqunakar uñjpan. Uka tawaqunakan suma jiwakïpxañapatakisti, Hegai chacharaki kunanakatix wakiski ukanak lurpan.

4Kawkïr tawaqutix reyin chuymapar purkirjamächini uka tawaquw Vasti lanti reinan qunuñapan qunt'asini —sasa. Uka amuyusti reyitakix wali sumänwa, ukatsti ukhampun phuqhasirakïna.

5Susa markan mä judío jaqiw jakasïna Mardoqueo sutini, jupax Jaír sat chachan yuqapänwa, Simí, Quis uka wila masita saraqir Benjaminan markapankirïnwa.

6Mardoqueo chacharux Babiloniankir Nabucodonosor reyiw Jerusalenat apanukuyäna, jupamp chiksti, Judá markankir Joaquín reyiparux apanukuyarakïnwa.

7Mardoqueox mä prima kullakanïnwa, jupasti wajcha, jan awkini, jan taykanïnwa. Ukampis Mardoqueo chachaw wawan awkinakap jiwxipan wawapat uñt'asis uywasxäna. Sutipasti Hadasá, jan ukax Ester satänwa, jupasti suma uñnaqt'ani jiwa tawaqukïnwa.

8Reyin kamachipax yatisxäna ukapachasti, walja tawaqunakaruw reyin jach'a utapan tantachapxäna, jupanakarusti Hegai sat chachaw uñjäna, Ester tawaqusti uka taypinkarakïnwa.

9Hegai chachatakisti Ester tawaqux chuymapar purkirïnwa, ukat jupax jank'akiw jiwakïñapatak suma jawisiñanak churäna, suma ajllit manq'anak churarakïna. Ukxarusti reyin utapan utjir uywatanakatxa, paqallqu q'axu tawaqunakaruw Esteran luqtiripat uchäna, ukatsti Ester tawaqurux luqtirinakamp chikaw warminakan jach'a utapan utjir mä suma utar ucharakïna.

10Ester tawaqux kuna markat jutatapsa, khitin wila masipätapatsa janiw arskänti, Mardoqueo chachaw ukanak jan arsuñapatak iwxt'äna.

11Mardoqueosti sapüruw warminakan utap uñkatasin saranaqäna, Ester tawaqux walikïskpachati, juparux sumti uñjasipkpacha janicha uk yatiñataki.

12Uka tawaqunakax tunka payan phaxsiw jiwakïpxañapatak wakichasipxirïna. Suxta phaxsix mirrat apsut aceitempiw janchinakap jawisipxäna, ukat ukxar suxta phaxsisti suma jawisiñanakampi, q'apkir qullanakampiw uchasipxarakïna. Ukham lurañ tukuyatatsti, tawaqunakax maynit maynitwa Asuero reyin nayraqatapar uñstir sarapxirïna.

13Sapa mayni tawaquw reyin utapar sarañatakix isinakat sipana, k'achachasiñ yänakat sipan ajllisipxäna, janiw khitis jark'irïkänti.

14Sapa tawaqusti arum tuqiruw reyin utapar sarirïna, qhipärmanthisti yaqha utaruw mantxarakirïna, uka uta, ukhamarak reyin uñt'atanakapsa, Saasgaz sutini reyin jaqipaw uñjäna; ukat uksarux tawaqux janiw reyin nayraqatapar uñstirïkänti, reyix munki ukkhakiw sutipat jawsasin reyin nayraqatapar uñstirïna.

15Kunapachatix Esteraru, Mardoqueon Abihail tiopan phuchhapar reyin ukar sarañ wakt'käna ukkhaxa, jupax Hegai chachan iwxt'ata isimpikiw isthapt'asiwayäna. Ester tawaqux taqinimpiw munayasïna.

16Ukatsti Tébet sata tunka phaxsi saraqataruw Ester tawaqurux Asuero reyin utapar irpapxäna, reyix paqallqüri mara uka marka apnaqkäna ukapacha.

17Asuero reyix Ester tawaquruw mayni tawaqunakat sipan wal munäna, Asuero reyin munasiñap Esterax mayni tawaqunakat sipansa juk'amp jikxatäna. Ukat reyix Esteran p'iqipar reina kankañ pillumpi asxatäna, ukatsti Vasti sat warmi lanti reinat utt'ayxarakïna.

18Ukatsti Ester reinatakix mä jach'a manq'äwi wakichayäna, uka maq'äwirusti taqi jilïr yanapirinakapampiru, markpachan yanapirinakapampiruw jawsayäna. Qullqi irsuñanaksa suyunakarux iraqtayänwa, ukatsti khuyapayasir reyjamaw walja waxt'äwinak lakirarakïna.

19Kunapachatix tawaqunakax warminakan utapat yaqha utar sarasipkäna uka uruxa, Mardoqueox reyin utap punkun qunt'atäskänwa.

20Mardoqueon iwxataparjamasti, Ester reinax janipuniw markapata, utapankirinakapatsa kuns arskänti, jan ukasti, Mardoqueo jak'an jakkäna ukkhax kuna yatichäwinaktix katuqkatayna ukhamarjamaw phuqhaskarakïna.

21Mardoqueox reyin utap punkun qunt'atäskänwa, ukchañkamaw Bigtán, Teres sutini reyin utapar mantañ punku uñjir pani jilïrinakar parlasipkir ist'äna. Jupanakax wali phiñasitapuniw Asuero reyir jiwayañatak amtasipkäna.

22Ukham jan wali amtatanakap ist'asinsti Mardoqueox Ester reinaruw yatiyir saräna. Ester reinasti Mardoqueon sutipxaruw reyir yatiyarakïna.

23Reyisti uka jan wali amtatanakxat sum yatxatayäna. Chiqätap yatisinsti, uka pani jaqinakarux jaychkatat jiwapxañapatakiw juchañchäna. Taqi ukanaksti markan sarnaqäwinakapa qillqataruw reyin nayraqatapan qillqantapxäna.

← Chapter 1 Jump to: Chapter 3 →