Leviticus 1

Aymara 1997

Jump to: Chapter 2 →

1Tatitux Moisesaruw jupamp Jikisiñ Carpatpach jawsäna, ukatsti sarakïnwa:

2“Israelitanakampi parlam, jupanakarusti sarakim, kunapachatix maynix uywanak nayar luqtañatak apankani ukkhaxa, urqu vacanaka jan ukax, urqu ovejanakapat apaniñapawa.

3“Luqtañ uywatix nakhantayañatak urqu vacänixa, ukax jan kuna kamacht'atäñapawa. Katuqatäñatakisti, Tatitun nayraqatapana, jupampi Jikisiñ Carpar mantañäkis ukawjan luqtatäñapawa,

4uka uywan p'iqipxar amparampi luqxatasa. Ukhamat uka uywan jupa lanti juchanakapat pampachatäñatak katuqatäñapataki.

5Urqu vacarux Tatitun nayraqatapan kharinukuni; ukxarusti Aaronan sacerdote yuqanakapaw wila luqtapxani, ukatsti Tatitump Jikisiñ Carpar mantañawjan altaran thiyanakaparuw ch'allakipapxani.

6Khititix uka uywa nakt'at luqtkani ukasti, lip'ichi kharsusin aychap kharinuqxani,

7sacerdotenakasti altarxaru nina aqtayapxani, lawanaksa sum suk'xatapxani,

8ukxaru uka kharinuqat aychsa, p'iqipsa, jiphillanakan lik'ipsa uchañataki.

9Khititix luqtkani ukasti uka uywan jiphillanakapsa, chhuchhullinakapsa umampiw jariqañapa, uksti sacerdotew altarxar taqpach nakhantayani, Tatitutak mä suma q'apkir luqtäwïñapataki.

10“Luqtañ uywatix nakhantayañatak oveja tamapata jan ukax, cabra tamapat churatäkani ukax, jan kamacht'at mä urqüñapawa,

11ukasti Tatitun nayraqatapan altarat amstäxan kharinukutäñapawa. Aaronan sacerdote yuqanakapasti altararuw puspach thiyapat wilampi ch'allakipapxani;

12ukatsti uywan aychap kharinuqapxani, uka kharinuqat aychanaksti sacerdotew p'iqimppacha, jiphillanakan lik'ipamppacha altarxan ninax aqaski ukxar uchani.

13Khititix luqtkani ukasti uka uywan jiphillanakapsa, chhuchhullinakapsa umampiw jariqañapa, uksti sacerdotew altarxar taqpach nakhantayani, Tatitutak mä suma q'apkir luqtäwïñapataki.

14“Nakhantayañatak Tatitur luqtäwitix mä jamach'ïnixa, ukax mä qhurukutüñapawa, jan ukax mä paloman chhiwchhipäñapawa.

15Sacerdotew uka palomxa altaran luqtani: p'iqip q'iwiqasax altarat mä thiyar wilap ch'aqsuyasaw nakhantayani.

16Ukatsti kutupxa jiphillanakamppacha, altarat inti jalsu tuqiru, kawkharutix qhillxa wartanipxirïki ukkharuw liwtanxani.

17Ukxarusti uka palomxa chhiqhanakat katt'asaw ch'iyjañapa, jan payar jaljtayasa, ukatsti sacerdotew altarxan ninax aqaski ukxar uka paloma nakhantayani, Tatitutak mä suma q'apkir luqtäñapataki.

Jump to: Chapter 2 →