Leviticus 2

Aymara 1997

← Chapter 1 Jump to: Chapter 3 →

1“Kunapachatix maynix granonakat wakichata mä luqtäwi Tatitur luqtañatak apanini ukkhaxa, suma jak'ükis ukat apaniñapawa, ukxarusti aceitempi, inciensompi warxatt'atäñapawa.

2Uksti Aaronan sacerdote yuqanakapan ukaruw aparakini, sacerdotesti aceitempi, inciensompi warxatatäkis uka jak'u jach'xatasin altarxar nakhantayxani, ukatsti Tatitutakix amtaskañatak mä suma q'apkiri waxt'ar uñtatäniwa.

3Uka jak'u waxt'at jilt'ki ukasti, aski qullanätap laykuxa, Aaronampitaki, wawanakapampitakïxaniwa.

4“Kunapachatix grano achunakat hornon qhathita mä waxt'a churäta ukkhasti, uka t'ant'ax suma jak'uta aceitempi chapt'at jan levadurani luratäñapawa, jan ukax, jan levadurani sillp'a t'ant'anakas aceitempi jawikipatäñapawa.

5“Waxt'äwimatix grano achunakat sartenar qhathiyatächixa, suma jak'uta, aceitempi chapt'at jan levadurani luratäñapawa,

6ukatsti jisk'a jisk'a pachinuqasax aceitempiw warakipäta grano achunakat waxt'äwïtap layku.

7“Waxt'äwimatix grano achunakat phukhur qhathiyatänixa, suma jak'uta aceitempi luratäñapawa.

8Ukanakampi uka waxt'a wakicht'xasasti, Tatitun nayraqataparuw apxäta, sacerdoteruw katuyxarakïta, ukatsti jupaw altarkama apxani.

9Sacerdotex ukan uka waxt'at mä juk'a aptasax altarxan nakt'ayxani ukasti, Tatitutakix amtaskañatak mä suma q'apkir waxt'ar uñtatäniwa.

10Uka waxt'at jilt'ki ukasti, Tatitutak aski qullanätap laykux Aaronampitaki, wawanakapampitakïniwa.

11“Janipuniw jumanakax Tatitur luqtañatak grano achunakat wakichat waxt'arux levadura uchapxätati. Janipuniw kuna levadurasa, misk'isa Tatitur luqtat waxt'jamax nakhantayatäñapäkiti.

12Nayraqat achunakamp chikax levadursa, misk'sa Tatitur luqtasipkasmawa, ukampis janipuniw altaran suma q'apkiri waxt'jama nakt'ayasin luqtatäñapäkiti.

13“Taqi granonakat wakichat waxt'amarux jayuñchapunïtawa, jayux Tatitumpi suma arust'äwir mantat unañchäwïtap layku.

14“Jumatix Tatitur nayrïr grano achunakat mä waxt'a luqtätaxa, ukasti suma puqurat puyanakat ch'axirt'asin ninar jamp'ikipatäñapawa.

15Ukxarusti aceitempi, inciensompiw warakipañama, grano achunak waxt'ätap layku.

16Ukatsti sacerdotew mä juk'a grano ch'axirt'atxa, aceitempi, inciensompi nakhantayxani, ukasti Tatitur jach'añchañatak amtaskañ mä suma q'apkir waxt'äniwa.

← Chapter 1 Jump to: Chapter 3 →