Leviticus 4

Aymara 1997

← Chapter 3 Jump to: Chapter 5 →

1Tatitux Moisesaruw parläna akham sasa:

2“Israelitanakar sarakim: Maynitix jan amuyaskasina Tatitun kamachinakap p'akintas juch lurani, ukatsti kunatix jan wakiski ukanak lurani ukaxa, akham lurañapawa:

3“Jilïr sacerdotetix juch luranixa, uka jucha luratapan taqi jaqinakxar puritap laykux, mä k'umar urqu vaca uka jucha luratapat luqtañapa.

4Ukatsti Tatitun nayraqataparuw apani Tatitump Jikisiñ Carpar mantañäkis ukkharu; ukan amparap uywan p'iqipxar luqxatani, ukatsti Tatitun nayraqatapan kharinuqxani.

5Ukatsti jupa kipkaw vaca qallun mä juk'a wilap katusin Tatitump Jikisiñ Carpar apani,

6ukan luk'anap wilar juricht'asini, Tatitun nayraqatapan paqallqu kutiw ch'allt'arakini, kawkïritix qullan utan velopäkix uka tuqiru.

7Sacerdotesti mä juk'a wila aptasin q'apkiri incienso uchañäkis uka altaran waxranakaparuw jawirt'ani, ukasti Tatitump Jikisiñ Carpan jikxatasi; ukat jilt'iri wilsti, nakhantat waxt'a churañäkis uka altar kayuruw taqpach wartxarakini, kawkïritix Tatitump Jikisiñ Carpa mantañäkis ukankki ukkharu.

8Ukatsti juchat luqtatäkis uka vaca qallutxa taqpach lik'inakap apsxarakini,

9maymurunaksti lik'imppacha, jikhani lik'inakamppacha, k'iwchxankki uka lik'inakamppacha, maymurunakamp chika apsxani,

10kunjämatix sumankthapiñatak luqtat urqu vacat apsutäkix ukhama. Ukatsti, sacerdotew nakhantayañatak luqtañ altarxar nakhantayxani.

11Vaca qallun lip'ichipamppacha, taqi aychapamppacha, p'iqipamppacha, kayunakamppacha, jiphillanakamppacha, kuna jilt'anakatix utjki ukanakamppacha,

12jan ukax maypach urqu vaca qallu, campamentot anqäxar mä q'uma chiqar apsuwayxani, kawkhantix altaran nakhayat qhillax warañäki ukkharu; ukan lawanak uchasa, qhilla patxan ninampi phichkatxani.

13“Taqi israelit jaqinakatix jan amuyaskasin kuna jan walsa lurapxanixa, ukat janirak jupanakat maynis amuykani Tatitun kamachinakap p'akintapxatapata, ukhamat juchañchjasipxchi ukaxa,

14kunapachatix uka jucha luratax yatisxani ukapachaw juchapat taqini mä urqu vaca wilañcha luqtapxani. Tatitump Jikisiñ Carpa nayraqataruw apapxani,

15ukan Tatitun nayraqatapan taqi jilïri jaqinakax uka urqu vacan p'iqipxar amparanakap luqxatapxani, uka pachpanarak kharinukupxani.

16Ukxarusti jilïri sacerdotew uka urqu vacan mä juk'a wilapa Tatitump Jikisiñ Carpar apani,

17ukatsti luk'anapampi wilar juricht'asaxa, paqallqu kutiw Tatitun nayraqatapan ch'allt'ani, velo uñkatasinkki ukkharu.

18Ukan mä juk'a wilampi Tatitun nayraqatapankki uka altaran waxranakaparuw jawirt'ani. Ukat taqpach wila jilt'irïki uksti, Tatitump Jikisiñ Carpar mantañäkis ukkhankki uka waxt'a luqtaña altaran kayuparuw wartani.

19Ukhamarakiw uka urqu vacat taqpach lik'inaka apsxani, ukatsti altarxaruw nakhantayxani,

20jan ukax, uka urqu vacampix kunjämatix juchat wilañcha mä yaqha urqu vaca luqtapkän uka kipkarakiw luqtañapa, ukhamat sacerdotex jupanakan juchanakapat pampachatäñ jikxatani, ukatsti juchanakapax pampachatäxaniwa.

21Ukatsti uka urqu vacax campamentot anqäxar apsusin nakhantayatäxaniwa, kunjämatix nayraqat urqu vacax nakhantayatäkän ukhama, taqi israelit jaqin juchapat wilañcha luqtatätap layku.

22“Mä jilïritix jan amuyaskasina Tatit Diosapan kamachi arunakap p'akintanixa, uka jilïrix juchanipunïniwa.

23Kunapachatix uka jucha luratapa amuyasxani ukapachasti mä jan kuna kamacht'at chivo waxt'a luqtañatak apxarakini.

24Uka chivon p'iqipxaru amparap luqxatasin Tatitun nayraqatapan kharinukxani, kawkhantix uywanakax nakhantayañatak kharinukutäki ukkhana, jucha luratat wilañcha luqtäwïtap layku.

25Ukxarusti sacerdotex juchat wilañcha luqtat chivon mä juk'a wilap luk'anapar juricht'asaxa, altaran waxranakaparuw jawirt'ani; ukat jilt'ki uka wilsti, pachpa altaran kayuparuw wartxani,

26ukatsti taqpach lik'i altarxar nakhantayxarakini, kunjämatix sumankthapiñatak luqtat lik'i nakhantayapki ukhama. Sacerdotex ukham lurasaw jilïritakix juchapat pampachatäñ jikxatani, jilïrin juchapasti pampachatäxaniwa.

27“Mä markankir jaqitix jan amuyaskasina Tatitun kamachi arunakap p'akintanixa,

28kunapachatix jucha luratap amuyasxani ukapachasti, mä jan kamacht'at cabra waxt'a luqtañatak apxani.

29Ukatsti uka cabran p'iqipxaruw amparap luqxatani, ukat kawkhantix uywanakax nakhantayañatak kharinukutäki ukkhan kharinukxani.

30Ukatsti sacerdotex mä juk'a wilampi luk'anap juricht'asax altaran waxranakaparuw jawirt'ani, ukat jilt'ki uka wilsti, pachpa altaran kayuparuw wartxani.

31Lik'inakapsti, kunjämtix sumankthapiñatak luqtatäki uka uywanakat apsutaxa, uka kipka apsutarakïniwa, uka lik'sti altarxaruw nakt'ayxani Tatitutak suma q'apkiri waxt'ata, ukhamat sacerdotex uka jaqitakix juchapat pampachatäñ jikxatani, uka jaqin juchapasti pampachatäxarakiniwa.

32“Uka jaqitix jucha luratapat luqtañatak mä oveja apanini ukapachax jan kamacht'at qachu oveja apanini.

33Ukatsti amparap ovejan p'iqipxar luqxatani, ukat jucha luratapat luqtatäñapatak kharinukxani, kawkhantix uywanakax nakhantayatäñatak kharinukutäki ukawjana.

34Ukatsti sacerdotex mä juk'a wilampi luk'anap juricht'asax altaran waxranakaparuw jawirt'ani, ukat jilt'ki uka wilsti, pachpa altaran kayuparuw wartxani.

35Lik'inakapsti, kunjämtix sumankthapiñatak luqtatäki uka uywanakat apsutaxa, uka kipka apsutarakïniwa, uka lik'sti Tatitutak suma q'apkir waxt'at altarxar nakt'ayxani, ukhamat sacerdotex uka jaqitak juchapat pampachatäñ jikxatani, juchapasti pampachatäxaniwa.

← Chapter 3 Jump to: Chapter 5 →