Micah 1

Aymara 1997

Jump to: Chapter 2 →

1Aka yatiyäwinakax kuntix Tatitux Moréset chiqan utjir Miqueas profetarux parlxaykän uka arunakawa. Tatitusti juparux uñacht'äwi tuqiw yatiyäna kunanakatix Samariana, Jerusalenana luraskani ukanakata, ukasti Jotán, Ahaz, Ezequías reyinakax Judá marka apnaqkän uka urunakan yatiyasïna.

2Taqi markanaka, akanak ist'apxam; taqi markpachan utjir jaqinaka, sum ist'apxam: Tatitux qullana utapatpach jumanakatak arsuni.

3Tatitux utjäwipatpach mistunini, ukatsti qullu patanakanjam jutani.

4Jupan takt'ataparusti qullunakax pampaw tukuni, kunjämatix lik'ix ninar apxatatax umatatki ukhama, qhirwa aynachanakas jalkir uman kharjatjamaw payar jist'jtani.

5Taqi akanakasti Jacobun markapan Tatitur saykatatap laykuw lurasini, Israel markan jucha luratap laykuraki. ¿Kawkinkarak Jacobun jucha luratapasti? ¡Samaria markankiwa! ¿Kawkinkarak Judá markan yaqha diosanakar yupaychañatak luratäki ukanakasti? ¡Pachpa Jerusalén markankiwa!

6Ukat Tatitux saraki: “Samaria markxa mayxaruw t'unthapï, uva yapuchañ yapu tukuyä. Markan qalanakapsa qhirwa aynacharkamaw willintarakï, Ukhamat uta qalltanakapas qhanar uñstañapataki.

7Jupanakan diosanakapas taqpach t'unthapitäniwa, ninampi nakhantayatarakïniwa. Jan wali sarnaqir warminakan qullqipampi jikxatatänwa, uka pachpa jan wali sarnaqir warminakan qullqipar tukuyatäniwa” sasa.

8Ukatpï jichhax wali jacht'asisa, q'ara kayu, q'alala ukham sarnaqäxa, qamaqir uñtat awullt'asisa, suri wawar uñtat warart'asisa.

9Samarian chhuxripasti jan qullkayawa: Judá markakama, Jerusalén markakamaw puri, kawkhantix markaxax jakki ukakama.

10Jan jumanakax jachapxamti, janirak Gat chiqan jakirinakarus yatiyapxamti. Usuchatäkasinsa Polvareda sat chiqan laq'anakapar juk'ampi qurumsupxam.

11¡Safir sat chiqan utjasiri jaqinaka, p'inqasiñansa phuqhantata, wasarar q'alalpach sarapxam! ¡Zaanán chiqan utjirinakasti janiw mistunipkaniti! ¡Bet-ésel chiqansti jachañakiw utji, Jichhax yanapanakapxa janiw katuqxapxätati!

12Marot sat chiqan utjirinakasti walpun askinak katuqañ munapxi, Tatitusti kunatix ñanqhäki ukxa pachpa Jerusalén marka punkukamaw puriyani.

13Laquis chiqan utjasirinaka, caballonakamxa carronakar chinkatapxam. Jumanakan markaman aka jan wali lurañanakasax qalltawayi, Israelitanakasa ukan juchañchjasiwayapxi, Jerusalenankirinakasa ukan juchañchjasiwayapxi.

14Moréset-gat chiqatsti jan mayampitak sarxapxam. Aczib markasti Israel markan reyinakapatakix mä sipitjamäniwa.

15Tatitux siwa: “Khitinakatix Conquista sat chiqan utjapkta ukanakatakixa, wasitat jumanakan ukarux mä atipjir khithanï, Israelan suma ajllitanakapas Adulam siski uka p'iyar imantasiriw sarxapxani.

16Jerusalén markankirinaka, wawanakamar munatam laykuxa, t'aqhisiñam uñacht'ayañatakix ñik'utamsa q'al mururasim, siwiq'aran p'iqipjam q'ararasirakim, uka wawanakamax jaya markaru katuntat apatäniwa” sasa.

Jump to: Chapter 2 →