Micah 4

Aymara 1997

← Chapter 3 Jump to: Chapter 5 →

1Qhipa urunakanxa, kawkhankkitix Tatitun utapax uka qullux suma sayt'ayatäniwa. Uka qullusti taqi qullunakat sipansa wali jach'äniwa. Taqi markanakaw ukarux jutapxani,

2walja markanakaw purintanipxarakini, akham sasa: “Jutapxam, Tatitun qullupar makhatapxañäni, Jacobun Diosapan utaparu, jupaw jiwasarux thakhip uñacht'ayistani, ukhamat thakhipanjam sarnaqañasataki.” Sión qullutpach Tatitun yatichäwinakapax mistuni, Jerusalén markat arunakapas misturakini.

3Tatit pachpaw taqi markanakar chiqapar uñjani, juparakiw walja markanakaru, wali jayankir markanakarus ch'axwatanakap t'aqjarakini. Espadanakapxa qhulliñ armanakaruw tukuyxapxani, lanzanakapsti yawthapiñatak jusinakaruraki. Janiw kawkïri markas yaqha markampi nuwantasiñatakix wakichaskxaniti, janirakiw nuwasiñatak yatichäwinaksa katuqxapxaniti.

4Ukapachasti taqinis jan axsarasaw jakasipxani, sapa mayniw uva, higo alin ch'iwipana samart'asxarakini. ¡Aka arunakasti taqi ch'aman Tatitun kipka arunakapawa!

5Yaqha markanakax pachpa diosanakaparuw jaysapxi, ukampis jiwasanakax Tatit Diosasarupuniw jaysañäni.

6Tatitux akham siwa: “Khä urunsti nayax mutuykäyäta uka ovejanakaxarux anthapisxäwa: kayu usuchjata, qarjata, ananukut ovejanakaxaru. Kawkïrinakatix qhiparapkäna ukanakampisti, mä jach'a ch'aman marka sayt'ayarakï. Naya Tatiturakiw markaxarux Sión qullutpacha, jichhata wiñaykam apnaqä.

8Jumasti Jerusalén, Sión markan sayt'asiñapa, wasitat jumax markaxan jach'a qamapa tuküta, nayrax kunjäm jach'a markäkayätatix ukhama.”

9Jichhasti, ¿kunatarak wawachasiñatak usuyasiskir warmjam warartasti? ¿Janit reyimax juman utjkxi? ¿Jan ukax amuyt'ayirinakamach jiwarxi ukatti jachta?

10Sión marka, q'iwinaqtam, wararirakim, kunjämtix mä warmix wawachasiñatak wararki ukhama, jaqinakamax jumatxa mistuwayxapxaniwa, ukatsti ch'usa pampanakan jakapxarakini, Babilonia markakamarakiw puripxani. Ukan Tatitux markaparux qhispiyani, uñisirinakapatsa qhispiyarakini.

11Jichhasti walja markanakaw jumar jan walt'ayañatakix mayacht'asipxi, ukatsti sapxiwa: “¡Jichhax Jerusalén markan aynacht'atap uñjañäni, ukham uñjasasti kusisiñäniwa!” sasa.

12Ukampis uka markanakax janiw Tatitun amuyunakapsa, amtatanakapsa yatipkiti; kunjämtix Tatitux jupanakarux trigor uñtat pich pichu jawq'suñatak apthapkani ukxa.

13¡Jerusalén marka, jichhax tukjañatak sartasim! Tatitusti siwa: “Nayaw jumarux mä urqu vacarjama ch'am churäma, waxranakamas hierrotjamarakïniwa, kayu sillunakamas broncetjamaraki, ukhamat walja markanakar t'unjañamataki. Kuna yänakaptix lunthatasiñampi jikxatatäki ukanakxa, jumaw q'al aparäta, uksti nayaruw katuyxitäta, aka uraqpachan Tatituparu.”

← Chapter 3 Jump to: Chapter 5 →