Micah 7

Aymara 1997

← Chapter 6 Jump to:

1¡Ay kunakïkan nayatakixa! Achunak apthapitat jilt'anak thaqhasir jaqjamätwa, uva, higo achunak manq'añ munasa, janiw kunsa jikxatkti, q'al apthapiwayxapxatayna.

2Aka uraqinxa janiw maynis Diosatakjam chiqap sarnaqirix utjkxiti; taqinis nuwasiñampi jiwarayasiñampik suyt'asipki; maynit maynikamarakiw aynacht'ayasisipki.

3Ñanqhanak lurañatakisti kust'atapunïpxiwa; marka apnaqirinakan yanapirinakapasti qullqik munasipki, taripirinakasti qullqxa chilltayasipxakiwa, munañaninakasti kuntix munapki ukarak lurapxi, markarux jan walirupuniw irpapxaraki.

4Jupanakat walïki ukasti mä ch'aphi alir uñtatawa; chiq lurirïki ukasti yaqha ch'aphi alir uñtatarakiwa. Ukampis luräwinakapat wayt'añ urux jutaskiwa, kuntix marka uñch'ukirix yatiykäyätam uka uruxa. Ukapachaw jupanak taypin mayjt'asiñax utjani.

5Jaqi masiman aruparux jan jaysamti, janiraki khiti yälamarus atint'asimti; warmimar parlatamatsa sum amuyasim.

6Yuqall wawanakasti awkinakaparux jisk'achapxiwa, imill wawanakas taykapatakiw sayt'asipxi, yuxch'anakasti taykch'inakapatakiw sayt'asipxi, sapa maynin uñisirinakapasti pachpa utapankirinakawa.

7Ukat nayax Tatitur suyt'añar uchasta, jupaw nayan qhispiyirixaxa, jupa Tatitusti nayarux ist'itaniwa.

8Uñisir Babilonia marka, aynacht'ataxat jan kusiskamti, aynacht'atäkasinsa sartaskakïwa; laxa ch'amakas muyuntkitan ukasa, Tatituw qhanaxaxa.

9Tatit nayraqatan juch lurta, ukat q'apisiñapsa amuk muturakïxa; ukchañkamasti, jupaw nayarux uñjitani, chiqaparuw uñjarakitani. Tatitux qhanaparuw irpitani, atipjañapsti uñjayarakitaniwa.

10Uñisirixas ukxa uñjarakiniwa, ukasti p'inqachjatarakïniwa. Uñisirixasti nayarux sarakitänwa: “¿Kawkinkarak Tatit Diosamasti?” sasa, ukampis nayatakix jupar ñiq'ir uñtat takichasita uñjañax sumäniwa.

11Jerusalén marka, pirqanakam wasitat sayt'ayañ urux niyaw purinxani, qurpanakamas jithitatayatäniwa.

12Juman ukar taqi tuqit jutapkani uka urusti niyaw purinxani: Asiriata, Egiptota, Nilo jawirata, Éufrates jawirata, jach'a qutata, jach'a qutakama; qullut qullukamaraki.

13Jaqinakan juch lurapxatapatxa, uka uraqix ch'usa wasarar tukuyatäniwa.

14¡Tatitu, markamarux uñjamaya, juman ovejanakamawa, suma uraqinakan muyuntatäkasinsa, jupanakax ch'umi manqhanakanjam jikxatasipxi! Jumästaxay nanakan awatirixaxa, nayra pachanakanjamay irpapxita, Basán, Galaad uka chiqankir suma chhuxllanakaru.

15Egiptot irpsunkta uka urux kuna muspharkañanaktix Israel markar uñacht'aykta uka pachpay uñacht'ayapxita.

16¡Yaqha markanakax ukham uñjasinxa, p'inqasipxpan, munañanïpkchi ukasa, uqara, amutu tukupxarakpan!

17¡Asirunakjama, yaqha laq'unakjam laq'a manq'apxpan! ¡Tapanakapatsti khathatt'asis mistunipxpan, axsart'asarak juman ukarus jutapxpan, nanakan Dios Tatituxa!

18Janiw yaqha Diosax jumjam utjkiti, khitinakatix markamat jilt'apki uka juk'aniruxa, ñanqha luratanakap jumax pampachtawa, jumataki sayt'asitanakapsa armaraktawa. Juman munasiñaman jach'ätap layku, q'apisiñamsa janirakiw wiñayatak katxäsktati.

19Nanakatsti wasitatay khuyapt'ayasipxita, ñanqha luratanakaxsti uraqirkamay allintxam, juchanak luratanakaxsa mä jach'a qutarjamay jaquntxarakim.

20¡Tatay, munasiñamampita, chiqa kankañamampit janikiy armasimti, kunjämtix jumax Abraham, Jacob uka nayra awkinakaxaru arskäyätas ukanakxa!

← Chapter 6 Jump to: