Song of Solomon 2

Aymara 1997

← Chapter 1 Jump to: Chapter 3 →

1Nayax Sarón pampanakankir panqarätwa, qhirwanakankir lirio panqarätwa.

2Nayan munasitaxax warminak taypin, ch'aphinak taypinkir rosa panqarjamawa.

3Nayan munasitaxax chachanak taypin ch'uminkir quqanak taypin manzano quqar uñtatawa. ¡Kunja sumas nayatakix ch'iwipar qunt'asiñaxa! ¡Achupasti lakaxatakix sinti muxsarakiwa!

4Manq'añ utaparuw nayarux irpitu, munasiñap nayarux uñacht'ayitu.

5¡Pasasat lurat tortanakamp churapxita, manzananak manqt'ayapxita, nayax munasiñat jiwt'irpachätwa!

6¡Jupax ch'iqa amparapampi p'iqit katt'akitaspa, kupi amparapampisti qhumantt'arakitaspa!

7Jerusalenankir warminaka, nayaw achikt'asipxsma: ch'uminkir tarujanak layku, cabritonak layku, munasitaxar jan ikit sartayapxamti, ¡kunapachkamatix munki ukkhakam ikt'asiskpan!

8¡Munasitaxax niyaw purisinki! ¡Arupxa niyaw ist'xarakta! Qullunak patanjam thuqtas thuqtasaw juti, jisk'a qullunak patanjam t'isktas t'isktasaw juti.

9Nayan munasitaxax mä tarujar uñtatawa, mä jisk'a taruja qallur uñtatawa. ¡Akaxay punku qhipäxankxiwa, ventanaruw makhatani, reja qhipäxat uñch'ukisisinki!

10Munasitaxasti situwa: “Munasitaxay sartasxam; jinay sarañäni” sasa.

11¡Uñjam! Juyphipachax sarxiwa, jallunakas juyphimp chikaw sarawayxi.

12Pampanakan panqaranakas niyaw misturxi, q'uchusiñ pachas purinxarakiwa, qhurukutunakan uxutapas uraqisan niyaw ist'asxi.

13Higo quqanakas achunakanïxiwa, uva yapunakan panqaranakapas sumaw q'aphiraki. Munasitaxay, sartasxam; munasitaxay, jinay sarañäni.

14“Qarqanakar imantasiri palomaxay, jaqhi jamas manqhanakan imantasiri palomaxay, ajanum uñkatt'ayita, arsutam ist'ayarakita. ¡Jumar uñjañax munkayawa! ¡Parlatam ist'añas wali muxsawa!” sasa.

15Tiwulanakar katurapxam, nanakan uva yapunakax tukjir tiwul qallunakar katuranipxam, uva yapunakasan panqaraskatap layku.

16Munasitaxax nayankiwa, nayasti jupankaraktwa. Jupax rosa panqaranak taypin uywanakap awatisi.

17Nayan munasitaxay, uru janïr tukuskipana, janïr chhapthapkipan kutt'anxam; tarujar uñtata, taruj qallur uñtatay, quntu patanakanjam t'iskunxam.

← Chapter 1 Jump to: Chapter 3 →